Eksodo 36

1Goleke, o Bezalel ta o Aoliab, ta sa e llene kai llanena te radin sukar, ta kai o Del dia len bizaipe te acharen te cheren sukar sa so si ande chara e Devleki, von ka cheren so o Del phenda te cheren.

E llene anen lache ofrende

2O Moises ikharda e Bezaleele ta e Aoliabe ta sa e llenen kai o Del pherdaia lengo lio bizaipe, ta lendar likista te aven te radin. 3Ta von lie katar e va e Moiseseke e ofrenda kai e israelitura andea, te sai thovenpe po rado katar e chara e Devleki. Ta e israelitura anena e lietar suako llive thiarinako rano e ofrende.

4Pe gachin anena kai e llene kai radina ande chara e Devleki, achile katar po rado 5ta llele te phenen e Moiseseke:

E llene anen mai but neko so trubul e radoke kai o Del phenda te cheren.

6Ondaka o Moises cherda te asundol ande sa o pero te na anel ni iek murus ni diskinia ios ofrende te den e charakake. Gia achade e foro te na den ios ofrende, 7soke saia len pe gachin ezgode te radin, kai i achela len.

Cheren e chara e Devleki

Ek 26.1-37

8Katar e llene kai radina mai sukar, gola si kai cherde e chara. Von cherde e chara e Devleki dese kortinenchar katar o lino bangardo, vuneto, purpura ta lolo, ta suvde pe lende kerubinura but sukar. 9Suako kortina saia la desudui pole ta dopas lungimatar, ta dui pole bulimatar. Sa e kortine saia len isto gola pole. 10E panch kortine suvde len iek averiaia, isto gia cherde ogole panlle kortinenchar. 11Mapalal thode nesave alkave solenchar vunete truial katar e purve kortine, ta isto gia cherde truial katar e mai paluni kortina katar o duito kortine. 12Katar e purve kortine ta katar o duito kortine, cherde lenge pinda alkave, gia achile e alkave iek angla aver. 13Ta i cherde pinda ganchura sunakune te sai istardon e kortine iek averiaa, ta gia e chara e Devleki cherdili.

14O Bezalel cherda desuiek kortine katar e bal e busnienge, te cherel iek chara te ucharel o santuario. 15Suako kortina saia la desutrin pole ta dopas lungimatar, ta dui pole bulimatar. Sa e kortine saia len isto gola pole. 16Ta suvda panch kortine iek averiaia, pe iek rig, a ogola sov kortine suvda len iek pe iek pe ogoia rig. 17Mapalal cherda pinda alkave truial e kortina kai phandena e purve kortine, ta cherda aver pinda alkave truial katar ogola kortine. 18Ta i cherda pinda ganchura tuchne te sai phandel sa e chara.

19Te sai ucharel e chara, o Bezalel cherda aver chara katar e morcha e bakrenge makhle ando lolo. Ta upral pe late cherda aver katar e morcha katar e tejonura ta thodala upral. 20Mapalal cherda e table katar o kas kai ikhardol akasia e charake, ta thoda len but orta. 21Suako tabla saia la star pole ta dopas lungimatar, ta sovardes ta panch sentrimetrura bulimatar. 22Ta saia la dui kafrina kastune te sai achel phangli avere tablaia. Sa e table katar o santuario cherda len gia. 23Cherda bis table pe rig katar o sur, 24ta cherda saranda riga tuchne te sai thodon telal katar e table. Suako tabla saia la dui riga telal te thodon lake dui kafra kastune. 25Ta pe ogoia rig katar o santuario, pe rig katar o norte, cherda aver bis table, 26pe saranda rigenchar tuchne, gia te avel telal katar suako tabla dui riga kai de thodol. 27Pe rig katar o santuario katar perel o kham cherda sov table, 28ta dui table ios pe dui riga palal katar o santuario. 29Gala table sea sargo iek, ta sea phangle upral llik kai e purvi alkava. Gava si so cherda e duie tablenchar pe dui riga katar o santuario, 30goleke sea ojto table pe desusov riga rupune. Telal katar suako tabla sea dui riga te thodon.

31Ta o Bezalel cherda panch pulsura cherde katar o kas kai ikhardol akasia e tablenge katar iek rig katar o santuario, 32panch pulsura e tablenge katar ogoia rig katar o santuario ta aver panch pulsura e tablenge kai si palal katar o santuario, karing perel o kham. 33Ta cherda o pulso kai si po maskaral te nakhel po maskaral katar e table katar iek rig pe ogoia rig. 34Mapalal ucharda e table ando sunakai, ta cherda lenge alkave sunakune te sai nakhavel andral e pulsura kai si ucharde ando sunakai.

35Ta i cherda e kortina katar o chiti vuneto, chiti purpura, chiti lolo ta lino bangardo, ta pe lende suvda dui kerubinura but sukar. 36Mapalal, iekhe ganchonenchar sunakune, unblada len pe iek pulsura katar o kas kai ikhardo akasia, kai sea ucharde ando sunakai ta thode pe star riga rupune.

37Ta o udar katar e chara cherda le iekhe kortinaia katar o chiti vuneto, chiti lolo ta lino bangardo, cherdo but sukar. 38Ta i cherda panch pulsura pe ganchonenchar, ta pe panch riga tuchne kai thodon, ucharda e riga upre katar e pulsura ando sunakai ta i leke alkave.

Currently Selected:

Eksodo 36: BACHRO

Highlight

Copy