Eksodo 35

O zakono katar o sabado

Ek 31.12-17

1O Moises chidia sa e israelen ta phenda lenge:

O Del phenda mange so te cheren: 2Sai ka radilpe sov llive, a o eftato llive ka avel tumenge iek llive santo, te na radin ando liubao e Devleko. Vareko ande gua llive te radila ka avel chinado leke te merel.#Ek 20.8-11; 23.12; 31.15; 34.21; Lv 23.3; Dt 5.12-14. 3Kaigo te zivina tumen ni ka phabare iag ando sabado.

So si dino e Devleke charake

Ek 25.1-9

4O Moises dia orba sa e israelenge ta phenda lenge:

Gava si so phenda o Del te cheren: 5Chiden maskar tumende iek ofrenda e Devleke. Sa gola kai mangen te den iek ofrenda e Devle, te na cheren le pe zor te cheren le elietar. Morabi te anen sunakai, rup, tuch, 6chiti vuneto, purpura, lolo, lino lacho, bal busnenge, 7morcha katar o bakro makhle ando lolo, morcha katar e tejonura, kasta katar e akasia, 8zeitino te kletosaren, meriso e zeitinoke katar so si dino, ta e taimanoke kai khandel sukar, 9barra kai ikhardon onise ta aver barra lache te sai thodon po efod ta po pektoral katar o mai baro popo.

E ezgode katar e chara e Devleki

Ek 39.32-43

10Sa gola kai si bizai kai cheren radura sukar morabi te aven ta te cheren sa so o Del phenda te cheren: 11E chara e Devleki pe charaia kai ucharel la, lake ganchura, lake table, lake alkave, lake pulsura lake riga kai thodon, 12e arka ta lake pulsura, o propisiatorio, e kortina e charaki, 13o stali ta lake pulsura ta sa lake ezgode, ta o marrno kai si dino e Devleke. 14O kandelero te kletosarel, leke ezgodenchar ta leke lampare, o zeitino lamparengo, 15o altar katar o taimano, ta leke pulsura, o zeitino kai thodol pe so si dino, o taimano kai khandel sukar, e kortina katar o udar e charaki, 16o altar kai den e kurbanura ta e rejilla tuchni, leke pulsura ta sa leke ezgode, o lelleno ta e rig kai thodol, 17e kortine kai llan pe bar pe pulsonenchar ta e riga kai thodon e kortine kai delpe ande bar, 18e chile e charake, e chile katar e bar ta leke sole, 19e patave kai radilpe lenchar ande chara e Devleki, e patave sante katar o popo e Aaron, ta e patave leke chaurrenge te radin sargo popura.

O foro anel e ofrenda

20Ta avile sa e israelitura kai o Moises. 21Ta mapalal sa gola kai likista katar lengo lio ta chachimaia, irisaile ta ande iek ofrenda e Devleke te sai cherdol e chara e Devleki te chidiniaon, ta so trubula te cherdon e patave sante. 22Avile murusa ta i diskinie, ta sa von anena e lietar, lanchura, angrusta, sklave ta but ezgode sunakune. Ta suako lleno anda iek ofrenda sunakuni kai dia e Devleke. 23Sa gola kai saia len chiti vuneto, chiti lolo, lino lacho, bal katar e busnia, o morcha katar e busne makhle ando lolo, o morcha katar e tejonura, anenalen. 24Gola kai dena iek ofrenda rupuni o tuchni, anenalen angla o Del. A ko saia len kasta kai ikhardon akasia, anenalen te cheren sa so trubula. 25Sa e diskinie kai sea bizai kai cheren ezgode sukar, kai khuven pe vastenchar, anena chiti vuneto kai cherena khuvdo, chiti lolo ta lino lacho. 26Ta sa e diskinie bizai kai cherena radura sukar kai likista katar lengo lio, khuvde e bal katar e busnia. 27E birovuria katar o Israel ande barra kai ikhardon kornalina, ta aver barra lache te sai thovenlen po efod ta po pektoral katar o baro popo. 28Ta i ande merisura, zeitino te kletosarel, o zeitino katar so si dino ta o zeitino e taimanoke kai khandel sukar.

29Sa e murusa ta sa e diskinie katar o Israel kai avila lenge te pomozin te sai cherdol so o Del phendaia e Moiseseke te cherel, ande pi ofrenda kai likista katar lengo lio te den e Devle.

E llene ezvirime te cheren e chara e Devleki

Ek 31.1-11

30O Moises phenda e israelenge:

Dikhen, katar e vicha e judaeki o Del ezvirisarda e Bezaleele kai si o chaurro katar o Uri ta unuko katar o Ur, 31ta pherda le katar o duo e Devleko ta bizaipe, te acharel ta te llanel te cherel ezgode but sukar, 32te cherel ezgode sunakune, rupune ta tuchne, 33te radil barra lache jaliarde ta rado sukar e kastenchar. 34Ta le, ta e Aoliabe chaurro katar o Ajisamak, kai si katar e vicha katar o Dan, dia len o bizaipe te sikaven, 35Ta pherdan len bizaipe te cheren varesavo rado sukar, te cheren ezgode neve kai nikada aver llene ni cherdea, te suven chiti vuneto purpura, lolo, ta lino lolo, ta te khuven varesavo rado sukar.

Currently Selected:

Eksodo 35: BACHRO

Highlight

Copy