Eksodo 29

E popura aven dine e Devleke

Lv 8.1-36

1Gava si so ka chere te aven von dine mange popura:

Le iek telcho ta dui busne te na aven nasuale, 2ta marrne kai ande lende inai levadura, marne kai andelende inai levadura cherde e zeitinoa, ta phalia kai ande lende inai levadura makhle ando zeitino, 3ta thov len ande iek kotaricha te sai inllarelen ande chara e Devleki, ta ka aven dine e telchoia ta e duie busnenchar. 4Mapalal inllar e Aarone ta leke chaurren kai o udar katar e chara chidinimaki, ta naiar len e paiea. 5Ta mapalal ka le e patave poponenge, ta ka thove po Aaron o fistano ta o gertachi katar o efod, ta isto efodea ta e pektoralea phande len e kavisea kai si le o efod. 6Ta thov e mitra pe leko soro. Ta upral pe mitra ka thove e diadema santa. 7Mapalal le o zeitino kai thodol pe so si dino, ta thov le po soro e Aaronoko. 8Ta ka chere te aven leke chaurre pase, ta thov pe lende e fistanura. 9Ta ka thove po Aaron ta pe leke chaurre o kavisi ta ka chichidele. Gia ka de len o gazdaripe, ta lengo rado poponengo ka avel iek zakono ostade. Gia ka aven dine mange o Aaron ta leke chaurre.

10Mapalal ka inllare o telcho angla e chara chidinimaki, ta o Aaron ta leke chaurre ka thoven pe va upral po soro e telchoko. 11Ta kote angla o Del, kai o udar katar e chara chidinimaki, mundar e telcho. 12Ondaka le o rat ta mak che naiea e singa katar o altar, ta chude katar gua rat kai achila kai e porrne katar o altar. 13Ka ikane sa e khoi kai ucharel leke porra, e khoi kai ucharel leko buko, leke dui bubreskura ta e khoi kai si upral pe lende, ta phabar len upral po altar. 14A o mas, e morchi ta e gosnia e telchoke, phabarlen avri katar o pero, soke si iek kurbano pala o bilachipe.

15Le iek katar e dui bakre singenchar, ta cher o Aaron ta leke chaurre te thoven pe va upral pe leko soro. 16Ta mapalal mundarle, ta leke ratea mak upral leke dui riga kai si truial katar o altar. 17Mapalal chinle pe kotora, jalav leke porra ta leke porrne, ta thov len upral pe leke kotora ta upral pe leko soro. 18Ta ka phabare sa e bakre singenchar upral po altar, gua si kurbano kai khandel sukar e Devleke, gua si so delpe phabardo e Devle.#Ef 5.2; Flp 4.18.

19Ondaka ka le ogole bakre singenchar, ta o Aaron ta leke chaurre ka thoven pe va upral pe leko soro. 20Ta mundar le ta le cherricha katar leko rat, ta thov le po Aaron ta pe leke chaurre pe lengo kan o chacho telorre, pe lengo palcho katar lengo va o chacho, ta pe lengo palcho katar lengo porrno o chacho. Mapalal e ratea katar o busno mak e riga upral katar o altar. 21Ta katar o rat kai ka achel po altar, ta katar o zeitino kai thodol pe so si dino, ka makhe e Aarone ta lake patave, ta leke chaurren ta i lenge patave. Gia von ka aven chinade e Devleke o Aaron ta leke chaurre ta i lenge patave.

22Mapalal ka le katar o bakro singenchar e khoi kai si pe leki pori ta kai si upral katar leke porra ta katar leke buke, ta le leke dui bubreskura ta e khoi kai ucharel len, ta leki plieska e chachi, soke si iek bakro singenchar katar e santifikasion katar e popura. 23Katar e marrne kai pe lende inai levadura kai si ande kotaricha angla o Del, le iek marrno cherdo e zeitinoia, ta iek katar e phalia, 24ta thov sa gala ezgode ande va e Aaronoke ta leke chaurrenge, ta gola ezgode ka miskolen sargo so si dino kai morabi te miskolpe angla o Del. 25Mapalal le gala ezgode katar lenge va, ta phabar len po altar e kurbanoia kai khandel sukar e Devleke. Gava si so si dino phabardo e Devleke.

26Ta ka le o brek katar o bakro singenchar kai si katar e santifikasion kai si e Aaronoki, ta ka miskole sargo so si dino kai morabi te miskolpe angla o Del, ta gua kotor ka avel chiro. 27Ta ka thove pe iek rig o brek katar so si dino kai ka miskon le, ta e plieska kai si dini, soke si e kotora katar o bakra singenchar kai santifikinpe ta kai thodon pe iek rig e Aronoke ta leke chaurrenge. 28Ta gala kotora ka aven e Aronoke ta leke chaurrenge. Gava si iek zakono ostade e israelenge: Gava so si dino ka den le e israelitura sargo iek kurbano te lachardon e Devlea.

29E patave sante e Aaronoke ka aven mapalal leke chaurrenge kana von ka aven dine, kana ka len o gazdaripe te aven popura. 30A gua katar leke chaurre kai achela pe leko than te avel popo, kana ka avel ande chara e Devleki e chidinimaki te radil, morabi efta llive te inllarel pe pete gola patave.

31Mapalal le o bakro sungenchar kai si dino, ta chirav leko mas pe iek than santo. 32O Aaron ta leke chaurre ka jan o mas katar gua bakro ta o marrno katar e kotaricha kai o udar katar e chara e chidinimaki. 33Ka janle soke sea dine te sai len o prostipe katar o bilachipe, te sai pherdon tumare va ta te aven dine mange. A aver llene nasti ka janle, soke gua jape si santo. 34A thiarinako te achela marrno o mas kai si dino, phabar so achila, ta niko te na jal le, soke si santo.

35Cher sa gala ezgode e Aaronoia ta leke chaurrenchar prema sa so phendem chuke. Efta llive ka furiave len gazdarimatar. 36Ta de suako llive iek telcho kurbano pala o prostipe, chistosar o altar, iekhe kurbanoia upral pe lete pala o bilachipe ta thov zeitino upral po altar te sai chistole. 37Efta llive ka de upral po altar kurbanura pala o bilachipe, gia ka avel dino e Devleke. Ta ka avel iek altar santisimo. Ta vareso te dodila o altar ka avel santifikado.

So delpe suako llive

Nm 28.1-8

38Gava si so morabi te de po altar: Dui bakre iekhe bursenge suako llive, 39iek lendar ka dele thiarinako rano, a ogua ka dele pasa racha. 40Kana ka de o purvo bakro ka de dui kile katar o mai lachi arina amime iekhe litroia zeitino maslinkako, ta katar so si dino ka perave iek litro mol. 41Ta ogole bakre ka dele kurbano pasa racha e ezgodenchar kai si dine, e arina, e mol, ta katar so si dino phabardo kai khandel sukar e Devleke. 42Gava kurbano kai si dino phabardo ande mo liubao, ka cheren le akana ta i sa tumare viche kai ka aven mai angle. Ka denpe suako drom angla ma kai o udar katar e chara chidinimaki kai kote si kai ka maladivav tuia te dav tuia orba. 43Kote ka maladivav e israelenchar, ta e chara ka avel santa soke me ka avav kote. 44Ta ka santifikiu e chara e Devleki kai chidiniaon ta i o altar, ta ka santifikiu e Aarone ta leke chaurren te aven popura murne. 45Me ka ziviu maskar e israelitura, ta ka avav lengo Del. 46Ta gia ka llanen kai me sem o Del lengo Gazda, kai ikandem len katar o Ejipto te sai ziviu maskar lende. Me sem o Del lengo Gazda.

Currently Selected:

Eksodo 29: BACHRO

Highlight

Copy