Eksodo 28

E patave e poponenge

Ek 39.1-31

1Maskar e israelitura ka muke pasa tute che phlale e Aarone ta leke chaurren o Nadab, o Abiu, o Eleazar ta o Itamar, te sai aven me popura. 2Cher patave sante che phlaleke e Aaroneke, te sai prenichil letar. 3A tu de orba sa e llenenchar kai si bizai e lietar, gole llenenchar kai me diem len o bizaipe te cheren ezgode sukar te sai cheren e patave e Aaronoke, ta gia vou te avel mo popo dino mange. 4E patave kai si te cheren si gala:

O pektoral, o efod, o gertachi, o fistano suvdo sukar, o dikhlo katar o lino ta o kavisi. Gia ka cheren patave sante che phlaleke Aaroneke ta leke chaurrenge, te sai cheren o rado sargo popura murne. 5E llene kai ka cheren e patave ka thoven sunakai, chiti purpura, chiti lolo ta o lino bangardo.

6O efod morabi te avel sunakuno, chiti vuneto, chiti purpura, chiti lolo, ta lino bangardo, suvdo sukarimaia. 7Ta dui kavisura minone pe dume pe dui riga istarde, ta gia ka phanglion. 8O kavisi kai llal upral katar o efod te phangliol, ka avel sunakuno. O efod ta o kavisi katar iek kotor ka avel sunakuno, katar o chiti vuneto, chiti purpura, chiti lolo ta lino bangardo.

9Ta le dui barra kai ikhardon kornalina, ta pisisar pe lende e anava katar e chaurre katar o Israel, 10prema sar biandile, sov anava pe iek barr ta sov anava pe o gua barr. 11O lleno kai ka pisil e anava pe barra ka avel iek lleno kai radil ando sunakai, gia sar pisinpe e sellura. Mapalal cher te phanglion e dui barra truial iekhe alkavenchar sunakune. 12Ta thov e dui barra upral pe dume katar o efod, barra te denpe golli e chaurre katar o Israel. Gia ka inllarel o Aaron pe pe dume lenge anava angla o Del, te sai denpe golli lendar. 13Ka chere e alkave sunakune, 14ta dui solorre sunakune, kai ka chere len khuvde sargo sibe, ta ka thove len truial katar e alkave.

15Ta ka chere o pektoral e krisako but sukar sargo o efod, sunakuno, e chitetar vuneto, chiti purpura, chiti lolo ta lino bangardo.#Nm 27.21; Dt 33.8; Esd 2.63; Nej 7.65. 16Ka avel stare rigengo bangardo pe dui riga, te avel le bis ta dui sentimetrura pe suako rig. 17Ta ka ucharele lache barrenchar minone thode pe star fisie. E purvi fisia morabi te avel la iek rubi, iek krisolito ta iek esmeralda. 18E duito fisia, iek esmeralda, iek safiro ta iek diamante. 19O trito fisia, iek jasinto, iek agata ta iek amatista. 20E starto fisia, iek berilo, iek onise ta iek jaspe. Sa ka aven thode ande alkave sunakune. 21Morabi te aven desudui, soke desudui si e chave katar o Israel. Pe suako barr ka pisilpe sargo iek sello, iek anav katar e desudui viche.

22O pektoral ka chere leke sinlliria desneto sunakune, bangarde sargo solurre. 23Cher dui alkave sunakune, ta thov len pe dui riga katar o pektoral. 24Mapalal thov e dui sinlliria sunakune ande dui alkave kai si pe dui riga upre katar o pektoral, 25ta ka chere dui alkave, ta ka phandelen pe dume katar o efod pe rig anglal. 26Cher ios dui alkave sunakune, ta thov len pe dui riga tele katar o pektoral pe iek rig katar o pektoral andral. 27Ta cher ios dui alkave sunakune ta phandelen anglal katar e dui riga katar o e efod, tele kai o suvtipe ta cherricha upre katar o kavisi katar o efod. 28Ondaka ka phanglion e alkave katar o pektoral e alkavenchar katar o efod iekhe solea vuneto, te sai o pektoral achel upral katar o kavisi katar o efod ta te na mukliardol o pektoral katar o efod. 29Ta o Aaron ka inllarel e anava katar e chave katar o Israel po pektoral katar e kris pe po lio, kana ka del ande chara e Devleki, te sai vou delpe golli lendar ostade. 30Ta thov ando pektoral katar e kris o Urim ta o Tumim, te sai avel po lio e Aaronoko kana ka avel angla o Del. Gia o Aaron ka inllarel suako drom e kris katar e chave e Israeleke pe po lio angla o Del.#Nm 27.21; Esd 2.63; Nej 7.65.

31Ka chere o gertachi katar o efod sa ando vuneto, 32ta po maskaral letar iek putardipe ta gua putardipe ka avel bangardo, gia sar si e chechermave morchake te na pharradol. 33Truial katar o gertachi ka chere sargo septelie cherde chitetar vuneto ta chiti lolo, ta maskar lende kampanille sunakune truial. 34Iek kanpanilla sunakuni iek suvtipe sukar, aver kanpanilla sunakuni aver suvtipe, pe sa truial o gertachi. 35O Aaron morabi te inllarel pe pete o gertachi kana ka cherel o rado popoko, ta ka asundol kana vou ka del ande chara angla o Del ta kana ka likel te na merel.

36Ta i ka chere iek kotor sunakuno sukar, ta ka pisi pe lete gia sar pisilpe iek sello: Santidad e Devleke. 37Ta ka thovele iekhe solea vuneto, ta ka avel upral katar e mitra. Pe rig angluni katar e mitra ka avel. 38Ta gia ka avel po chikat e Aaronoko, ta o Aaron ka inllarel o bilachipe kai cheren e israelitura pe ezgode sante ta kana ka den so si dino, a o kotor ka avel pe leko chikat suako drom, te sai len o zao e Devleko.

39Ka chere iek fistano suvdo sukar katar o lino, ta ka chere iek mitra katar o lino, o kavisi morabi te avel suvdo but sukar. 40E chaurrenge katar o Aaron cher lenge fistanura, kavisura ta mitre te klichin sukarimatar.

41Gia morabi te furiave che phlale e Aarone ta leke chaurren, ta mapalal morabi te thove pe lenge sore zeitino te sai avel len sa o gazdaripe, ta te aven mange me popura. 42Ta i cher lenge sostea katar o lino, te ucharen len katar o kuko llik kai e changa. 43Ta o Aaron ta leke chaurre ka inllarenlen pe pete kana ka den ande chara e Devleki e chidinimaki, o kana ka aven pasa o altar, kana cheren o rado poponengo ande chara e Devleki, te na cheren ni iek bilachipe te na meren. Gava si iek zakono ostade leke ta leke porodoke.

Currently Selected:

Eksodo 28: BACHRO

Highlight

Copy