Eksodo 26

E chara e Devleki

Ek 36.8-38

1Cher e chara e Devleki dese kortinenchar katar o lino bangardo, chiti vuneto, purpura ta lolo, ta ka suve pe lende dui kerubinura but sukar. 2Sa gala kortine morabi te avel len isto gola pole, desudui pole ta dopas lungimatar ta dui pole bulimatar. 3Suv panch kortine iek pe iek, ta isto gia ogola, 4ta thov alkave katar o solo vuneto truial katar e purvi kortina katar ogola kortine. 5E purvi katar e kortine ta i e duito katar ogola kortine, morabi te chere lenge pinda alkave, te sai achen iek angla aver. 6Ta i cher pinda ganchura sunakune te sai istardon iek umpa kortine ogole umpaia kortine, te sai e chara avel cherdi katar iek kotor chiti.

7Ta i cher desuiek kortine katar e bal e busniake, te sai ucharen e chara e Devleki. 8Sa gala kortine morabi te avel len isto gola pole, desutrin pole ta dopas lungimatar, ta dui pole bulimatar. 9Ta suv panch kortine iek pe iek katar iek rig, ta aver sov pe aver rig, ta e sovto eftato kortina ka bangarela angla e chara e Devleki. 10Mapalal ka chere pinda alkave pe iek rig katar e purve kortine kai phanden, ta aver pinda alkave po duito kortine. 11Ta cher pinda ganchura katar o tuch ta te phangliol pe alkave, gia te avel iek kotor chiti kai ucharel le sa. 12A sar e kortine katar e chara si mai bare, dopas katar so achel ka thovele palal katar e chara e Devleki. 13Gia ka achel uchardi e chara pe dui riga palal e kotorea kai achilo mai baro, saranda ta star sentrimetura pe suako rig palal.

14Ta ka chere iek techo te uchare upral e chara, gua techo ka cherele katar e morcha e busnenge makhle ando lolo, uchardo upral katar aver techo cherdo katar e morcha katar o tejon.

15Ta ka chere e charake kai si e Devleki iek table katar o kas kai ikhardol akasia te aven orta. 16Suako tabla morabi te avel la star pole ta dopas lungimatar, ta sovardes ta panch sentimetrura bulimatar, 17ta te aven la dui espige gia te sai e table achen phangle iek pe iek. Cher gia sa e table e charake kai si e Devleki. 18Kana ka cherelen, cher bis table pe rig katar o sur, 19ta cher saranda riga rupune telal tala e table kai te besen. Suako tabla morabi te avel la dui riga rupune telal, kai te besen lake dui espige.

20Ta i pe ogoia rig katar e chara e Devleki pe rig katar o norte, ka chere bis table, 21ta i kote ka chere saranda riga rupune telal katar e table kai te besen, ta gia te avel pe suako tabla dui riga rupune. 22A pe rig palal katar e chara e Devleki, pe rig katar likel o kham, cher sov table, 23ta ka chere dui table ios pe dui riga kai si palal katar e chara e Devleki. 24E dui table kai si pe rig palal ka aven ande iek than phangle kai si e purvi alkava. Sa e table morabi te avel len star pole ta dopas lungimatar, ta sovardes ta panch sentimetrura bulimatar, ta morabi te achen phangle maskar pete katar e dui putardipe pe suako putardipe. Gia morabi te cherdol e duie tablenchar e eskinenge. 25Ka aven ondaka ojto table ta lenge desusov riga rupune kai te besen, dui riga urupune telal katar suako tabla.

26Ta ka chere panch pulsura katar o kas kai ikhardol akasia e tablenge kai si pe iek rig katar e chara e Devleki, 27ta panch pulsura e tablenge kai si ande chara pe rig palal karing perel o kham. 28Ta o pulso kai si po maskaral ka nakhel po maskaral katar e table, katar iek rig llik kai ogoia rig. 29Ta mapalal ka uchare e table truial ando sunakai, ta cher lenge alkave sunakune. E pulsura ka aven ucharde ando sunakai te nakhen andar e alkave. 30Cher e chara e Devleki isto gia sar sikadili chuke po burdo.

31Cher iek kortina katar o chiti vuneto, purpura, lolo, ta lino bangardo. Ka avel cherdo but sukarimaia, ta thov pe late kerubinura. 32Ta mapalal iekhe ganchonenchar sunakune, umblaven len pe star direkura cherde katar o kas kai ikhardol akasia ucharde ando sunakai. Ta suako kas morabi te avel thodo pe iek rig rupuni. 33Unblav ondaka e kortina telal katar e ganchura, ta kote palal katar e kortina, thov e arka katar e alava. Gia e kortina ka blazil tumenge te fulavel o than santo katar o than santisimo.#Ebr 6.19; 9.3-5. 34Mapalal ka thove o propisiatorio upral katar e arka katar e alava po than santisimo. 35Ta ka thove e o stali avri katar e kortina, ta o kandelero angla o stali pe rig sur katar e chara e Devleki. A o stali ka thovele pe rig katar o norte.

36E chara e Devleki ka chere lake iek udar chiteko vuneto, purpura, loli ta chiti katar o lino lacho. 37Cher e kortinake star direkura katar o kas kai ikhardol akasia, ta ka uchare len ando sunakai, ta kote kai besen e direkura ka avel cherdo ando sunakai ta panch riga tuchne lenge.

Currently Selected:

Eksodo 26: BACHRO

Highlight

Copy