Eksodo 18

O Jetro llal kai o Moises

1O Jetro o popo katar o Madian ta sastro e Moiseseko, llangla sa so cherdaia o Del pala o Moises ta pe foroia o Israel, ta i llangla kai o Del ikandaia len katar o Ejipto. 2Kana o Moises saia ando Ejipto, bichalda pe rromia e Sefora ando Madian, ta o Jetro inllardala, 3ta i lake duie chaurren. Iek lendar ikhardola Gerson, soke o Moises phendaia: Sema sargo avere phuviengo ande iek phuv kai inai murni,#Ek 2.21-22; Ech 7.29. 4a o gua ikhardola Eliezer, soke phenda:

O Del me dadeko avilo te pomozil man, ta braduisarda man katar o jarni e Faraonoko.

5O Moises inzardaia pi chara po pusto pasa o burdo e Devleko, ta incha llelo o Jetro, ta inllarda pea leke rromia ta leke chaurre e Moiseseke. 6Ta phenda e Moiseseke:

Me, cho sastro o Jetro, avilem te dikhav tut che rromiaia ta che duie chaurrenchar.

7Ta o Moises llelo te lel pe sastre. Ta dia tenemava angla le ta chumidia le, ta mapalal die ande chara. 8Ta kote o Moises phenda leke sa so cherdaia e Faraonoke ta e ejipsionenge te sai pomozil e israelen, ta sa e duk kai nakhle po drom, ta sar o Del braduisarda len.

9O Jetro veselisailo pala o baro volipe kai o Del sikadaia e israelenge kana braduisarda len katar e va e ejipsionenge, 10ta phenda:

Blagosime te avel o Del, kai braduisarda tumen, foro katar o Israel, katar o va e Faraonoke ta e ejipsionenge.

11Braduisarda tumen katar e silne ejipsiura kai dukhavena tumen. Akana llanav kai o Del si mai baro neko sa e dela.

12Ondaka o Jetro dia kurbanura e Devle, ta avilo o Aaron ta e phure katar o Israel te jan e Jetroia, o sastro e Moiseseko, angla o Del.

O Moises thovel aver krisaria

Dt 1.9-18

13Thiarinako o Moises beslo te chinel krisa e israelenge, ta von avena lete thiarinako rano lligo ni perela e riat. 14Kana dikhla o sastro e Moiseseko o rado kai liaia, phenda leke:

¿Soke lian pe tute sa gava rado? E llene aven tute thiarinako rano lligo ni perel e riat. ¿Soke chere gava rado korkorre? 15A o Moises phenda leke:

Soke e israelitura aven mande te puchen e Devle.

16Kana si maskar lende joli, aven mande te sai phenav lenge ko si o dosalo, ondaka sikavav lenge o zakono e Devleko ta leke alava.

17A o Jetro phenda leke:

Inai sukar so chere, 18soke tu ka chinio ta i sa o foro kai si tuia. Gava rado si but pharo chuke, ta nasti ka cherele korkorre. 19Asun akana mo avazi. Me ka sikavav tut, ta o Del ka avel tuia. Tu morabi te ave angla o Del ando anav e foroko, ta te mange letar vou te lacharel gala ezgode. 20Ta morabi te sikave len e zakonura e Devleke, ta sikav len sar morabi te zivin ta so si te cheren. 21Ta ezvirisar maskar o foro murusen bizai, te daran katar o Del, ta te aven chache, murusa te na roden te len love kojaimaia. Nesave lendar thov len pe milia llene, averen pe stotina llene, avere pe pinda, ta averen pe des. 22Von si kai ka chinen e kris e foroke suako drom, ta e bare krisa ka anen len tute, a von ka chinen e krisa mai minone. Gia ka lokhiaven o pharipe kai si pe tute, ta von ka pomozin tut te inllarele. 23Te cherdan gala ezgode, ta o Del te phenel chuke te cherelen, tu sai ka terpi, ta i o foro ka llaltar veselo kai pe chare.

24O Moises asunda o avazi pe sastroko, ta cherda sa so phenda leke. 25O Moises ezvirisarda llenen bizai maskar sa o Israel ta thoda len te krisin e foro pe milia, pe stotina, ta pe des. 26Von chinena krisa suako drom, ta e krisa mai bare anena len kai o Moises, ta von chinena sa ogola krisa. 27Mapalal o Jetro llelotar kai pi phuv, ta mukla e Moisese.

Currently Selected:

Eksodo 18: BACHRO

Highlight

Copy