Eksodo 15
15
O llilabipe e Moiseseko
1Ondaka o Moises ta e israelitura llilabie gaia llili ando liubao e Devleke:#Apo 15.3.
Ka llilabav ando liubao e Devleke
kai gia sukar dobisarda
kana chudia ande mora e grasten ta e llenen kai llana pe lende.
2Mo llilabipe si e Devleke#Sal 118.14; Is 12.2.
kai si mi zor ta mo braduipe.
Vou si mo Del, ta ka blagosiv le.
Vou si o Del me dadeko, ta ka dav le liubao.
3O Del llanel te marelpe.
¡Jeova, si leko anav!
4O Del chudia ande mora
e bordona e Faraonoke
ta i leke boñikonen. Ta leke mai lache kapitanura
tasile ande Mora e Loli.
5Peletar chak andre sargo barra,
ta e bari mora ucharda len.
6Ioi Devla,
cho zuralo va o chacho saia
kai zatrisarda e dusmanonen.
7Ta che bare zoriaia peradan
e llenen kai vazdinaile pe tute.
Bichaldan chi joli
ta phabile sargo patra.
8Phurdian zurale ta o pai chidinailo.
E valura vazdinaile sargo zido
ta po maskaral e mora cherdili ledo.
9O dusmano phenda:
Ka llav pala lende lligo ni ka malavav len,
ta ka fulavav so ka lav lendar
lligo ni ka achav pochindo.
Ka ikanav o jarni,
ta mo va ka zatril len.
10A tu phurdian ta e mora ucharda len,
ta lleletar chak andre sargo o molivi ande mora divi.
11Ioi Devla,
¡Ni iek del nasti thovelpe prema tu!
¡Niko inai santo ta baro sargo tu!
¡Chere ezgode bare ta chudo!
12¡Thodan chi zor ta e phuv ucharda len!
13Che volimaia inllare
gale foro kai braduisardan.
Che zoriaia inllare len kai cho santo cher.
14Kana ogola phuvia ka llanen le ka izdran daratar.
Bari duk ka perel pe phuv katar e filisteura.
15E kapitanura katar o Edom ni llanena so ka cheren,
ta sa e kananeura ta e moabitura ka isdran daratar ta ka jasaren pi zor.#Nm 20.14-21; 21.13-15.
16Ioi Devla,
¡Te perel pe lende iek bari dar!
¡Te achen sargo barra
pala e zor che vasteki,
lligo ni ka nakhel cho foro,
gua foro kai braduisardan!
17Ioi Devla,
inllar amen te zivi kai cho burdo santo,
kai o than kai tu ezvirisardan te zivi
kai o santuario kai tu Devla vazdian che vastenchar.
18¡O Del ka charoil ostade!
E Maria llilabel
19Kana e Faraonoke bordona ta leke llene kai llana pe gra die ande mora, o Del cherda o pai e morako te perel upral pe lende. A e israelitura nakhle e mora sargo pe phuv e suki. 20Ondaka e porauka Maria e phei e Aaronoki, lia iek pandero ta sa e diskinie liepe pala la, chelimaia ta basalena e panderura, 21a voi llilabela lenge gia:
Llilaben ando liubao e Devleke,
kai gia sukar dobisarda
kana ucharda ande mora e grasten ta e llenen kai llana pe gra.
O pai o cherko
22O Moises cherda e israelen te durion katar e Mora e Loli. Ondaka von lleletar po pusto kai ikhardol Chur, ta trin llive phirde pe gua pusto, ta ni malade pai. 23Kana avile ande Mara, nasti pile o pai kai saia kote, soke o pai saia cherko. Goleke thode o anav katar gua than Mara.
24Ondaka e llene thode te den orba bilachi e Moiseseki, ta phenena:
¿So ka pia akana? 25Ondaka o Moises molisailo e Devleke, ta o Del sikada leke iek kas. O Moises chudia o kas ando pai, ta o pai cherdilo guglo. Ta kote o Del zumada len, ta dia len iek zakono te sai zivin prema lete.
26Ta o Del phenda lenge:
Te thovena sa tumari sama ande so me, o Del tumaro Gazda phenav tumenge, ta te cheren so si mange drago, ta te kandena me zakonura, me ni ka bichalav ni iek katar e zatranie kai bichalden pe ejipsiura, soke me sem tumaro Del kai sastarav tumen.
27Mapalal avile ando Elim, kote sea desudui lenorra paieke kai liken katar e phuv, ta eftavardes palmere, ta kote inzarde pe chare pasa o pai.
Currently Selected:
Eksodo 15: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
