Eksodo 16

O Del bichalel o mana

1Ondaka sa e israelitura likiste katar o Elim ta katar o Sinai. Gua llive saia o desupanch katar o duito chon, sar kai likistea katar o Ejipto. 2Ta kote po pusto saurre thode te den orbe katar o Moises ta katar o Aaron. 3Ta phenena e Moiseseke ta e Aaroneke:

¡Mai sukar avilaia o Del te cherdaia amen te mera ando Ejipto! Kote amen besaia pasa e kavie masenge ta jaia lligo ni pherdivaia, a tumen anden amen saurren po pusto te sai mundaren amen bokhatar.

4Ondaka o Del phenda e Moiseseke:

Me ka cherav te del peke marrno katar o miloso. E llene morabi te liken suako llive ta ka chiden so trubul len samo gole lliveseke. Mangav te dikhav ko ka kandel me alava ta ko ni ka kandel.#Jn 6.31.

5A o sovto llive, kana ka lacharen so si te inllaren kai pe chera, ande gua llive morabi te chiden dui droma mai but so inllarena ande ogola llivesa.

6Ondaka o Moises ta o Aaron phende e israelenge:

Pasa racha tumen ka llanen kai o Del si kai ikanda tumen katar o Ejipto, 7ta thiarinako rano ka dikhen e zor e Devleki, soke vou asunda kai dien leke orbe. ¿A ko sam amen te den amare orbe bilache?

8Ta i phenda o Moises:

Pasa racha o Del ka del tumen mas te jan, ta thiarinako rano ka del tumen but marrno, soke vou asunda kai dien leke orbe. Soke ¿Ko sam amen te den amare orbe bilache? Kake orbe dien tumen si e Devleke.

9Mapalal o Moises phenda e Aaroneke:

Phen gia sa e israelenge:

Aven pase angla o Del, soke vou asunda tumare orbe.

10Kana o Aaron dela orba e israelenchar, sa von dikhle po pusto ta e zor e Devleki sikadili ande iek oblako. 11Ta o Del dia orba e Moisesea ta phenda leke:

12Asundem sar dena orba e israelitura. Akana de orba lenchar ta phen lenge: Pasa racha tumen ka jan mas, ta thiarinako rano ka jan marrno lligo ni ka chalion. Gia ka llanen kai me sem o Del tumaro Gazda.

13Ta isto ande gua llive kana lela te perel e riat avile e chiriklia kai pherde o pero, ta thiarinako rano pechaia peke truial e chare.#Nm 11.31-32. 14Ta kana achila te pechal, dikhila upral po pusto vareso sargo iv. 15Ta sar e israelitura ni llanena so saia, kana dikhle le phenena iek avereke: ¿A so si gava? A o Moises phenda lenge: Gava si o marrno kai o Del ka del tumen te jan.#1 Kor 10.3. 16Gava si so o Del phenda te cheren: Te chidel suako lleno tumendar so trubul le te jal prema e llene kai si ande leki chara, te lel dui kile pe suako lleno.

17Ta e israelitura cherde le gia. A aver chidie mai but a aver mai cherricha, 18chidie prema e orba kai achilea, ta gua kai chidia mai but ni achilale katar so chidiaia ta ni gua kai chidiaia mai cherricha ni achilale katar so chidiaia, suako lleno chidia so trubulale te jal.#2 Kor 8.15.

19Mapalal o Moises phenda lenge:

Niko nasti mukel niso te jal thiara.

20A aver lendar ni kandie e Moisese ta mukle vareso thiarinake, a so gurude pherdila cherme ta khandela. Ondaka o Moises jolailo lenchar.

21Ta gia suako lleno chidela thiarinako rano so trubulale te jal, soke o tatipe e khameko bilavela so achela. 22A o llive sovto chidie dui droma mai but marrno, star kile pe suako lleno. Ondaka e gazda katar o foro llele te phenenle e Moiseseke, 23A o Moises phenda lenge:

Gava si so o Del phenda te cheren, thiara si o santo sabado e Devleko, chiraven allive so si te chiraven, ta thoven te chirol so si te chiradol, ta guruven thiarinake sa so ka achel tumen.#Ek 20.8-11; 31.12-17; Ek 35.1-3.

24Ta cherde gia sar o Moises phendaia lenge te cheren, gurude e thiarinake so achilalen ta ni cherda cherme ta ni khandia. 25Ondaka o Moises phenda:

Jan allive kai si o sabado e Devleko, soke ande gava llive tumen ni ka malaven niso ande umalia.

26Sai ka chiden le ande sov llive, a ando eftato llive kai si sabado, ni ka avel niso.

27A nesave lendar llele ando eftato llive te chiden vareso, a ni malade niso. 28Ondaka o Del phenda e Moiseseke:

¿Pe gachin ios ka phagen tumen me zakonura ta so sikadem tumen?

29Dikhen kai me o Del, diem tumen o llive sabado, goleke o sovto llive dav tumen marrno duie llivesenge te jan, goleke ando eftato llive saurre morabi te achen ande pe chare ta niko te na likel lendar.

30Ondaka o foro ni radisarda o eftato llive.

31Ta e israelitura ikharde Mana so chidena, ta saia parrno sargo simicha katar o silantro, ta guglo sargo phalia kai pe lende si aullin.#Nm 11.7-9.

32Mapalal o Moises phenda:

Gala si e alava kai mukla o Del: Pheren dui kile Mana, ta guruvenle tumare porodoke, te sai dikhen o marrno kai me dien tumen po pusto kana ikandem tumen katar o Ejipto.

33A o Moises phenda e Aaronoke:

Le iek bardako ta thov ande lete dui kile Mana. Ta mapalal anle angla o Del te sai gurudol tumare porodoke.#Ebr 9.4.

34Ta o Aaron anda o bardako angla e arka katar e alava te sai avel gurudino gia sar o Del phendaia e Moiseseke te cherel.#Ek 25.10-22; 37.1-9.

35Gia si sar jale Mana e Israelitura saranda burs lligo ni avile ande phuv kai sea manusa. Jale lligo ni avile llik kai resela e phuv katar o Kanaan.#Jos 5.12.

36Dui kile kai si o diesmo katar iek efa.

Currently Selected:

Eksodo 16: BACHRO

Highlight

Copy