Luk 24

Yesus poga tito ke ina denga

(Matyu 28.1-10; Mak 16.1-8; Jon 20.1-10)

1Ke oklou kene ina ke wik ke kotkotu lokono apmang tikalke wel e wan ka amna itau ka tikere kodong e isak kla ke denga. 2Alo ka tipolou tivati opmu ka oglou kading denga ina ekreng bitna tabulbul la kodong. 3E alo ka tisep ke denga tivati Ida Puda Yesus pampamu ine kovok. 4Aitno lisak mter pula ke elio ane deka lokono osep orwo ka titnei klos ka bublo omba tivri olwo boto ke isak. 5E apmang tilim omba lokono e timanik e tidue bara lisak duru ke taklak. Tidue langane e osep orwo tiwai ke isak langane. “Ina lange umekrim gute ka ila mosongon dau dong ke iye airavu ke osep ka timete kodong? 6Iye dong ane kovok e iye poga tito kodong. Omtomu sisir pelengon ka iye wai ke umu alo ka iye dau dong ke omur Galili. 7Iye wai langane. ‘Osep ma tikar Gute Ka Polou Langka Osep ke osep epmes ina limsak. Ma tinilim iye ke ina akai e mase oklou eklu mela yagos deka ma Ida Tapolngon due poga tito blang.’” 8Deka apmang amtarsak sisir Yesus ila pelengon tonari.

9Deka tisongon denga e ti-bauluk kla e tipalongo osep disaipel songotno kene e osep leklou blang ine. 10Apmang ka tipalongo osep aposel urok isak Maria ka armok Makdala ina e Joana e Maria ka Jems tna e apmang leklou ka tidong kap isak. 11E osep aitno lisak dagar ke urok pelengon kovok kesua aitno lisak mter isak kaka e tiwai pelengon adai vala. 12* E dau Pita tito suong ke denga e bitna duru e vati denga aitno. Iye vati molo vala dong adai deka iye iding ke ila ninu e aitno mter pula ke elio ka polou.#24.12 — Osep leklou ka tile pelengon Grik itau aitno lisak mter langka Luk sogo pelengon ka dong airavu ke sta (*) orwo kovok. E gute silang sogoe ke batne.

Osep orwo tivati Yesus ke ekreng

(Mak 16.12-13)

13Umoklingen. Ke oklou tonari osep orwo ke Yesus ila disaipel tididi ekreng e isak kla ke armok Emeus ka dong langka kilomita songotno kene ke Jerusalem. 14E tiwai pulu ke elio ka pula keniye ka tipolou. 15Alo ka tiwai e tipmi pulu ke elio tonari Yesus polou ke isak e lila la kap isak. 16E wan langka dangdang amtarsak ma tikaranga tile iye Yesus kovok. 17Deka Yesus pmi isak langane. “Umawai pulu ke wansua alo ka umelila umala?” Deka tivri e amtarsak langka aitno lisak soulu. 18E gute kene ke isak ka angaine Kliopas koli wai langane. “Wom gute kaulei ke Jerusalem e wom kene vala emile elio ka polou ke armok ane oku ane kovok i?” 19E iye pmi isak langane. “Elio lange?” E tikoli tiwai langane. “Wan ka la ke Yesus ka Nasaret ina. Iye gute napaprangan ina e iye arit iye ke ila pelengon e ila elio ke Ida Tapolngon bitna e ke osep ka pula keniye amtarsak blang. 20Osep loulou ina ka omba e udo osep kaunsil ina tikar iye ke osep Rom ina limsak ma tiwai iye mete deka tinilim iye ka ina akai e iye mete. 21E aitno limi waiki iye gute ka ma lua osep Israel ina ke urok elio epmes ina. E silang blang eknikane elio tonari polou oklou eklu la kodong. 22E apmang leklou ke imi tidue imi imedigrik. Isak kla ke ina denga ke kotkotu lokono. 23E tivati pampamu ine kovok. Deka time ke imi e tipalongo limem tivati ano ke ensel orwo ka tiwai Yesus dau dong ke mosongon. 24Deka osep arang leklou ke imi isak kla ke ina denga e tivati wan keniye eriar langka apmang tiwai ine. E tivati Yesus kovok.” 25Deka Yesus wai ke isak langane. “Umu kaka lokono e aitno lumu la dagar suong ke pelengon ka oglou osep napaprangan ina tiwai ine kovok. 26Umeile langane kovok i? Gute ka Ida Tapolngon rere Krais ma iye lua osep ma namani elio soulu paide deka ma iye dong itau lokono kap Ida Tapolngon.” 27Deka iye nogrum ke Moses ila sogongon e osep napaprangan ina keniye urok sogongon e iye parere isak ke Ida Tapolngon ila pelengon keniye ka la ke iye.

28Tipolou olwo boto ke armok ka isak kla ine e bitna lanka Yesus dau lila la. 29E tiwai dagar ke iye langane. “Omdong kap imi kesua kirui kodong e isuk boto epmes polou.” E Yesus la dong kap isak. 30Alo ka tidong ke bota e tiwaiki tingen Yesus due bret gesa e wai tenkyu ke Ida Tapolngon ine e tuktuke e kare ke isak. 31Deka langka amtarsak pal e tivati malak e tile iye. E suong iye dong kap isak kovok. 32E tiwai pulu langane. “Alo ka iye wai ke ite alo ka itedidi ekreng e iye palongo udo ke Ida Tapolngon ila pelengon lana ine aitno lite neser omba i?” 33Deka alo ari lokono titito e tiding ke Jerusalem e tipolou ke ila disaipel songotno kene e osep leklou ka tiduni pulu kap isak. 34E osep ka tiduni pulu tiwai ke isak langane. “Are lokono. Ida Puda poga tito ke ina denga e iye polou ke Saimon bitna.” 35Deka osep orwo tonari tipalongo urok ke wan ka polou ke isak alo ka tididi ekreng. E ke elio ka tile iye Yesus alo ka iye tuktuk bret.

Yesus polou ke ila disaipel amtarsak

(Matyu 28.16-20 e Mak 16.14-18 e Jon 20.19-23)

36Alo ka isak dau tiwai Yesus polou e vri airavu ke isak. *E iye wai ke isak langane. “Aitno lumu dong epen.”#24.36 — Osep leklou ke tile pelengon Grik itau aitno lisak mter langka Luk sogo pelengon ka dong airavu ke sta (*) orwo kovok. E gute silang sogoe ke batne. 37E tidigrik omba e tilim ke iye kesua aitno lisak mter tivati ano gesa. 38Deka Yesus wai ke isak langane. “Ina lange umelim e aitno lumu orwo ke ngong? 39Umavati lungu e kongu. Ngong tona ngadong ane. Umakai tarna lungong e ma umeile omur ine. Kesua ano gesa pampamu ine e erine dong kovok e pampamu lungong e eri lungong tidong.” 40#24.40 — Osep leklou ka tile pelengon Grik itau aitno lisak mter langka Luk sogo pelengon ka dong airavu ke sta (*) orwo kovok. E gute silang sogoe ke batne. Alo ka iye wai langane iye nis isak ke kamla e limla. 41E aitno lisak neser e mter pula dau aitno lisak orwo ke iye. Deka Yesus pmi isak langane. “Upu ngangon dong ane ma ngangene koke aurou?” 42E tikar iye lodu emkil ka tikamlue kodong. 43Deka iye due lodu e ngene ke amtarsak. 44Deka iye wai ke isak langane. “Alo ka ngong dau ngadong kap umu ngawai ke umu langane. Wan ka pula keniye ka dong ke Moses ila sogongon e dong ke osep napaprangan ina urok sogongon e dong ke Buk Song ka lana ine me ke ngong ma tipolou lokono.” 45E iye lua isak ma tikaranga tile omur ke Ida Tapolngon ila pelengon lana ine. 46E iye wai ke isak langane. “Osep tonari tisogo langane. ‘Gute Krais ka Ida Tapolngon rere ma iye lua osep ma namani elio soulu deka ke oklou eklu ina ma iye poga tito ke ina denga.’ 47E osep ma tinapapra ila pelengon ke osep ka pula keniye. Ma tinogrum ke Jerusalem e kla ke omur ka pula keniye. Ma tinapapra langane. ‘Umabauluk aitno lumu e aitno lumu la dagar ke Ida Tapolngon e ma iye sak lumu elio epmes ina la.’ 48E ma umapalongo osep urok ke wan ka umavati. 49Umoklingen. Oglou Livou wai promis ma iye pagei Ano Itau duru ke umu e isuk boto ma ngapagei iye ke umu. E umodong ke armok ane la lama umodue Ida Tapolngon ila arit.”

Ida Tapolngon due Yesus bauluk tito ke omur heven

(Mak 6.19-20; Aposel 1.9-12)

50Yesus paur ila disaipel olwo boto ke Betani deka iye kakai limla tito e wai ma Ida Tapolngon due ila kerengen duru dong ke isak. 51Alo ka iye dau wai langane ke isak iye songon isak e tito la ke omur heven. 52Deka tilotuim iye. E mase tiding ke Jerusalem e aitno lisak neser omba.#24.52 — Osep leklou ka tile pelengon Grik itau aitno lisak mter langka Luk sogo pelengon ka dong airavu ke sta (*) orwo kovok. E gute silang sogoe ke batne. 53E aling aling tidong ke Ida Tapolngon ila ninu e tikakai angaine tito la egim.

Currently Selected:

Luk 24: ANT

Highlight

Copy