Luk 23

Tipaur Yesus ke Pailot bitna

(Matyu 27.1-2 e Matyu 27.11-14 e Mak 15.1-5 e Jon 18.28-38)

1Deka isak keniye titito e tipaur Yesus la ke Pailot. 2Tipolou ke Pailot bitna e tisin elio vri ke Yesus e tiwai langane. “Imavati gute ane pagolgol imi osep Yuda ina aitno limi. Iye waiki imekli takis ke Sisar kovok e wai iye tona gute Krais ka Ida Tapolngon rere ma iye lua osep e iye vri mgo ke isak.” 3E Pailot pmi Yesus langane. “Wom gute ka vri mgo ke osep Yuda ina?” Deka Yesus koli wai ke iye langane. “Wom tona amwai ine.” 4Deka Pailot wai ke osep loulou ina ka omba e osep pula pula langane. “Ngaklingen lumu pelengon e aitno lungong mter lumu sinngen elio ke gute ane batne dong kovok.” 5E tiwai dagar langane. “Gute ane sruk osep aitno lisak ke omur Judia keniye nogrum ke omur Galili e me ke armok ane.” 6Alo ka Pailot klingen pelengon tonari iye pmi isak langane. “Gute ane gute Galili ina i?” 7E alo ka iye ile Yesus me ke omur Galili ka Herot plaue iye vai iye ke Herot. Kesua alo ari Herot dong ke Jerusalem blang.

Yesus dong ke Herot bitna

8Alo ka Yesus polou ke Herot bitna Herot aitno itau kesua ke tauni kodong iye klingen omon ke wan bitna bitna ka Yesus due e waiki vati iye. Iye waiki vati Yesus due elio arit ina gesa. 9E Herot pmi Yesus ke pmingen pula e Yesus koli wai ke Herot kovok. 10Deka osep loulou ina ka omba e osep ka tile itau ke Moses ila sogongon tivri olwo boto e tiwai dagar e tisin elio vri ke Yesus. 11Deka Herot kap ila osep ola ina tidue elio soulu e tiwai apok ke iye. E titnei Yesus ke molo ka itau lokono e tivai iye iding ke Pailot. 12E langane. Oglou Herot e Pailot aitno lisak soulu pulu e nogrum ke oklou are aitno lisak itau pulu.

Pailot waiki songon Yesus la

(Matyu 27.15-26 e Mak 15.6-15 e Jon 18.38—19.16)

13Deka Pailot gi osep loulou ina ka omba e osep kaunsil ina e osep leklou ma time tiduni pulu ke bitna. 14E iye wai ke isak langane. “Umapaur gute ane me ke ngong e umawai iye sruk osep aitno lisak ma aitno lisak soulu ke osep gavman ina. Ngaklingen ila pelengon ke omtomu e aitno lungong mter lumu sinngen elio ke gute ane batne dong kovok. 15E Herot aitno mter langane blang kesua iye vai iye iding ke ite. Gute ane due elio gesa ma imemter iye ma iye mete ine kovok. 16-17Ke batne ane ma ngaules iye e ngasongon iye la.”#23.16-17 — Osep leklou ka tile pelengon Grik itau aitno lisak mter langka pelengon leklou dong ke ves ane. Pelengon tonari langane. E apu langane dong. Ke tobor kene kene ke rogo omba tonari Pailot songon gute kene ka dong ke kalabus iye la ke osep.

Pailot wai ma tinilim Yesus ke ina akai

18E osep ka pula keniye tidaiku langka kre lisak kene lang-ane. “Umemter gute are ma iye mete e omsongon Barabas ke imi.” 19Ke oglou osep Rom ina tidue Barabas sep ke kalabus kesua iye sruk osep aitno lisak ma tidue evlei ke gavman ke armok are e silang blang iye due burwa ke gute gesa. 20E Pailot waiki songon Yesus la e iye wai ke isak ine blang. 21E aling aling tidaiku omba langane. “Umenilim iye ke ina akai. Ma iye mete ine.” 22E aling eklu ina Pailot wai ke isak langane. “Ina lange ma iye mete? Iye due elio soulu lange? Ngaklingen ila pelengon e aitno lungong mter ila elio soulu dong ke iye ma iye mete ine kovok. Ma ngawai ke osep tiules iye deka ngasongon iye la.” 23E tidaiku omba e tiwai dagar ma tinilim iye ke ina akai e sasi boto sasi boto urok pelengon mole Pailot ila pelengon. 24Deka Pailot didi urok pelengon e iye wai ma Yesus mete. 25E iye songon gute ka dong ke kalabus kesua iye sruk osep aitno lisak ma tidue evlei ke gavman e iye due burwa ke gute gesa. Iye gute ka osep tiwaiki Pailot songon iye la. E Pailot vai Yesus ke osep ola ina ma tididi wan ka osep tiwaiki tidue.

Osep ola ina tinilim Yesus ke ina akai

(Matyu 27.32-44 e Mak 15.21-32 e Jon 19.17-27)

26E alo ka osep ola ina tipaur iye la tisoson gute kene ka angaine Saimon ka ila armok batne Sairini. Iye lila ke omur ka lelei Jerusalem e me ke armok. Tikis iye e tidue Yesus ina akai dong ke agune e tipagei iye la batne ke Yesus. 27E osep pula pula tididi iye e apmang pula aitno lisak soulu e tikngis omba ke Yesus. 28E Yesus bauluk e wai ke isak langane. “Umu apmang Jerusalem ina umekngis ke ngong kovok. Aurou. Umekngis ke umu tona e titopmu. 29Umoklingen. Mase ma osep tiwai langane. ‘Apmang ka isak opon e apmang ka tidivir mimi kovok e tipainim mimi kovok aitno lisak itau itau.’ 30E ma tiwai ke gigri omba e gigri daudeng langane. ‘Umegene ke imi e umakading imi.’ 31Kesua langka osep tidue elio langane ke ngong ka langka akai ka olune dong ine ma tidue wansua ke umu ka umodong langka akai ka kakrak?”

32E osep ola ina tipaur osep orwo blang ka isak osep soulu bitna ma timete blang. 33Alo ka tipolou ke omur ka tisire omur ka baraine erine tinilim Yesus ke ina akai e tinilim gute soulu bitna kene ke galna gala e tinilim gute soulu bitna silang ke galna odung. 34E Yesus wai itau ke Ida Tapolngon langane. “Livou amsak urok elio kesua tile omur ke wansua ka tidue kovok.” E osep ola ina tiuri opmu ka nisngen dong ine e tiwade Yesus ila klos ine. 35Osep tivri e tipalem wan ka polou e osep kaunsil ina tidue apok ke iye e tiwai langane. “Iye lua osep leklou e oku ane langka iye gute ka Ida Tapolngon rere Krais ma iye lua osep ma iye lua iye tona blang.” 36E osep ola ina blang tidue apok ke iye e tipolou olwo boto ke iye e tiwaiki tikar iye galou wain ka meli. 37E tiwai ke iye langane. “Langka wom gute ka vri mgo ke osep Yuda ina omlua wom tona.” 38E tidue sogongon dong egim ke Yesus ka wai langane. “Gute ane gute ka vri mgo ke osep Yuda ina.”

39E gute soulu bitna kene ka mana ke ina akai wai pelengon soulu ke Yesus langane. “Wom gute Krais ka Ida Tapolngon rere ma omlua osep i? Omlua wom tona e omlua imi blang.” 40E gute soulu bitna silang wai dagar ke iye langane. “Omdue anit ke Ida Tapolngon kovok i? Kesua tiwai emmete langka tiwai iye mete. 41E tidue elio osuk ke ite kesua oku ane udo elio ngen ite. E iye due wan gesa ka soulu kovok.” 42Deka iye wai ke Yesus langane. “Yesus emtem sisir ngong alo ka emiding e emvri mgo ke omur ka pula keniye.” 43E Yesus koli wai ke iye langane. “Ngawai lokono ke wom langane. Eknikane ma omdong kap ngong ke omur ka itau lokono.”

Yesus mete

(Matyu 27.45-56 e Mak 15.33-41 e Jon 19.28-30)

44Oklou airavu polou e aivoro kading omur are la lama iding ke 3 kilok ke kirui. 45Osep tikaranga tivati oklou kovok e molo ka botom ka dong ke Ida Tapolngon ila ninu notrum ke emkil orwo. 46E Yesus daiku omba langane. “Livou ngakar anngong ke wom.” Iye wai langane deka iye mete.

47E alo ka gute ka plau osep ola ina buno kene vati wan ka polou iye kakai Ida Tapolngon angaine tito la egim e wai langane. “Lokono gute ane iye gute ka osuk lokono e ila elio vri ke iye kovok.” 48Alo ka osep pula pula ka tiduni pulu ma tipalem elio ane tivati wan ka polou aitno lisak soulu e aitno lisak kro ine e timluk omun lisak. Elio ane nisngen ke elio ka aitno lisak soulu. Deka isak kla tiding ke urok ninu ninu. 49E Yesus ila saten kap apmang ka tididi iye nogrum ke alo ka iye songon omur Galili e me ke Jerusalem tivri mawa boto e tipalem wan ka polou.

Osep tiyas Yesus pampamu ine

(Matyu 27.57-61 e Mak 15.42-47 e Jon 19.38-42)

50E ari gute kene dong ka angaine Josep. Iye me ke armok Arimatea ka dong ke omur Judia. E iye gute kaunsil ina ka ila elio itau e osuk. 51E aitno kene ke wan ka osep kaunsil ina lelkou tilalo e tidue kovok. E iye dong para ke alo ka omur ka Ida Tapolngon plaue ma polou. 52E iye la ke Pailot e pmi iye ma iye karanga due Yesus pampamu ine. 53E iye due Yesus pampmau ine duru ke ina akai e dugume ke molo ka okou. Deka iye due sep ke denga ka osep tiyase ke opmu ka oglou gute gesa pampamu ine munu ine kovok. 54Oklou are oklou ka tirere wan ka oklou sabat ina e isuk boto oklou sabat polou. 55E apmang ka time ke omur Galili e tididi Yesus ke Jerusalem tididi Josep e tivati denga tonari e tivati elio lange ka Josep due ma Yesus pampamu ine munu ine. 56Deka isak kla ke urok ninu e tikere wel e wan ka amna itau ka tiwaiki tisake ke Yesus pampmau ine. E tididi Moses ila sogongon e timtong ke oklou sabat.

Currently Selected:

Luk 23: ANT

Highlight

Copy