Jon 3

Gute Nikodemus polou ke Yesus

1Gute kene dong ka angaine Nikodemus. Iye gute namor ke osep Yuda ina e iye gute Farisi ina. 2Iye la polou ke Yesus ke epmes gesa e wai ke iye langane. “Rabai imeile wom gute parerengen ina ka me ke Ida Tapolngon. Ngawai langane kesua langka Ida Tapolngon dong kap wom kovok amkaranga omdue elio arit ina ka nisngen ka omdue kovok.” 3E Yesus koli wai langane. “Ngawai lokono ke wom. Langka gute polou oku langka mimi edimor kovok iye karanga dong ke omur ka Ida Tapolngon plaue kovok.” 4Deka Nikodemus wai ke Yesus langane. “Lange ka gute ka namor kodong karanga polou oku langka mimi edimor? Iye karanga sep ke mimi ila armok ke tna pele e tna divir iye blang kovok.” 5E Yesus koli wai langane. “Ngawai ke wom lokono langane. Langka gute polou oku ke aki e ke Ano Itau kovok iye karanga sep ke omur ka Ida Tapolngon plaue kovok. 6Alo ka titnada tidivir ite tidivir pampamu lite vala e alo ka Ano Itau due ite itopolou oku iye due ante tipolou oku. 7Emdigrik ke lou pelengon kovok alo ka ngawai ma ompolou oku langka mimi edimor. 8Iteile engen didi ila elio e ipu la ke omur omur. Amkaranga emklingen engen ina ngusngon e dau amkaranga emile iye me ke omur ge koke la ke omur ge kovok. E langane ke osep ka Ano Itau due isak tipolou oku.”

9Deka Nikodemus pmi Yesus langane. “Lange ka elio ane karanga polou?” 10Deka Yesus wai ke iye langane. “Wom gute parerengen ina ke osep Israel ina e dau emile lou pelengon lana ine kovok i? 11Ngawai ke wom lokono langane. Imawai ke wan ka imeile ine e imapalongo lumu ke wan ka imavati e dau umu osep ka aitno lumu dagar ke limem pelengon kovok. 12Ngawai ke umu ke wan ka taklak ina e aitno lumu dagar ke lou pelengon kovok. Deka lange ka aitno lumu karanga la dagar ke lou pelengon alo ka ngawai ke umu ke wan ka omur heven ina? 13Gute kene vala tito sep ke omur heven. Iye Gute Ka Polou Langka Osep ka oglou iye duru ke omur heven blang. 14Eriar langka Moses kakai mota bras tito ke akai palma alo ka iye dong ke omur ka dong adai vala ma osep tidue Gute Ka Polou Langka Osep tito ke akai. 15Ma osep ka aitno lisak la dagar ke iye tidue urok mosongon ka dong vala dong.”

16“Ida Tapolngon lana iye ke osep ka pula keniye ka tidong ke taklak deka iye pagei Otno Arang ka kene vala ke osep. Ma osep seisei ka aitno lisak la dagar ke iye timete kovok. Aurou. Ma tidue urok mosongon ka dong vala dong. 17Ida Tapolngon pagei Otno Arang ke taklak ma iye wade osep kovok. Aurou. Iye pagei iye ma iye lua osep ke urok elio epmes ina. 18Gute sei ka aitno la dagar ke iye ma Ida Tapolngon wade iye kovok e gute sei ka aitno la dagar ke iye kovok Ida Tapolngon wade iye kodong kesua aitno la dagar ke Ida Tapolngon Otno Arang ka kene vala kovok. 19Elio ka Ida Tapolngon wade osep batne langane. Ida Tapolngon ila bublongon polou ke osep kodong e dau aitno lisak itau ke bublongon tonari kovok. Aurou. Aitno lisak itau ke aivoro kesua urok elio soulu lokono. 20Kesua osep ka pula keniye ka tidue elio soulu aitno lisak engil ke bublongon e ma time ke bublongon kovok lama bublongon nis osep ke urok elio soulu. 21E osep seisei ka tididi Ida Tapolngon ka iye elio lokono batne e tidue elio itau time ke bublongon ma osep tile malak urok elio itau ka tidue polou batne tini Ida Tapolngon.”

Jon palongo osep malak ke Yesus

22Mase Yesus kap ila disaipel tipolou ke omur Judia e tidong sasi boto e Yesus paunim osep. 23E Jon blang paunim osep ka armok Ainon ka dong olwo boto ke Armok Salim kesua aki pula dong ke omur are. E aling aling osep pula isak kla ke Jon ma iye paunim isak. 24Kesua alo ari osep tidue Jon sep ke kalabus dau kovok.

25E Jon ila disaipel leklou tituk orsak pulu kap gute Yuda ina kene ke inarak apu ka tigrong pampamu lisak ma tidong eip e itau ke Ida Tapolngon bitna. 26Deka isak kla ke Jon e tiwai langane. “Rabai gute ka amwai ke osep ine alo ka iye dong kap wom ke aki Jordan burla iye paunim osep blang. E osep pula pula isak kla ke iye.” 27E Jon koli wai ke isak langane. “Gute karanga due wan ka Ida Tapolngon kare ke iye vala. 28Umu tona umeile oglou ngawai langane. ‘Ngong gute Krais ka Ida Tapolngon rere ma iye lua osep ke urok elio epmes ina kovok. E Ida Tapolngon pagei ngong ngamgo ke iye vala.’ 29Alo ka gute gi apmang deka gute tonari polou apmang ila boget. E gute ka iye gute ka gi oku tonari ila aten iye dong para ma iye klingen ke gute e aitno neser alo ka iye klingen gute tonari kreine. E oku ane lou ketirngen omba lokono langka gute tonari ila ketirngen. 30Ma Yesus angaine polou omba e angain ngong duru e polou daudeng.”

31“Gute ka me ke omur heven mole osep ka pula keniye. E gute ka taklak ane ina due elio ka taklak ina e wai ke wan ka taklak ina. E gute ka me ke omur heven mole wan ka pula keniye. 32Iye wai ke wan ka iye vati kodong e klingen kodong ke omur heven e gute kene vala klingen ila pelengon e aitno dagar ine kovok. 33Gute ka klingen ila pelengon e aitno dagar ke iye ane langka iye wai langane. ‘Ida Tapolngon ila pelengon iye pelengon lokono.’ 34Kesua gute ka Ida Tapolngon pagei me napapra ila pelengon e Ida Tapolngon due Ano Itau ila arit bon ke iye. 35Ida Tapolngon ka Pmada lana iye ke Otno Arang e kar wan ka pula keniye ke limla ma iye plaue. 36Osep seisei ka aitno lisak la dagar ke Ida Tapolngon Otno Arang ma tidue urok mosongon ka dong vala dong. E osep seisei ka tipli iye ma tidue mosongon ka dong vala dong kovok e Ida Tapolngon aitno ila engil ma dong ke isak.”

Currently Selected:

Jon 3: ANT

Highlight

Copy