Jon 2

Yesus due aki lumus polou aki wain

1Elio tonari polou deka oklou epmes orwo mela yagos e gingen polou ke armok Kena ka dong ke omur Galili. E Yesus tna dong ke gingen tonari. 2E osep tiwai ke Yesus kap ila disaipel ma time ke gingen blang. 3Mase alo ka osep tinim aki wain yagos Yesus tna wai ke iye langane. “Inarak aki wain yagos.” 4E Yesus koli wai langane. “Aiya ina lange amwai ke ngong ine? Oklou ka ma ngadue wan gesa dau polou kovok.” 5E Yesus tna wai ke osep bokongon ina langane. “Wan ka iye wai ke umu ine umodue.” 6E aki tarna lumakene ka tidue ke opmu tidong are e aki langka lita buno kene karanga dong ke isak kene kene. Tidong ke osep Yuda ina inarak apu ke tigrong limsak e wan bitna bitna ine. 7E Yesus wai ke osep bokongon ina langane. “Umeitip aki tarna ke aki.” Deka titip aki la lama aki tarna bon. 8Deka Yesus wai ke isak blang langane. “Oku ane umodue aki gesa e umakalke la ke gute ka plau gingen ina ngangon.” Deka tidue langane. 9E gute ka plau gingen ina ngangon inim aki ka polou aki wain e iye ile omur ge ka aki wain tonari me ine kovok. E osep bokongon ina ka tidue aki tile ine. Deka gute tonari gi ke gute ka gi oku ma iye wai ke iye. 10E iye wai langane. “Osep ka pula keniye leklou tidue aki wain itau mgo deka alo ka osep tinim pula tidue aki wain ka itau boto ma osep tinime. E omdue aki wain ka itau polou ke batne.” 11Elio ane elio arit ina ka nisngen mgongon ina ka Yesus due. Iye due ke Kena ka dong ke omur Galili. Ke elio ane iye nis osep iye gute ka itau lokono e ila arit ombatno. E ila disaipel aitno lisak la dagar ke iye.

12Elio tonari polou deka iye songon Kena e la duru ke Kaperneam kap tna e ina saiver e ila disaipel. E tidong are langka wik kene.

Yesus sapir osep ka tidue burong ke omur ka lelei Ida Tapolngon ila ninu

(Matyu 21.12-13 e Mak 11.15-17 e Luk 19.45-46)

13Alo ka isuk boto rogo omba ka lana ine la ke alo ka Ida Tapolngon lua osep Yuda ina tisongon omur Isip polou deka Yesus tito la ke Jerusalem. 14Iye sep ke omur ka lelei Ida Tapolngon ila ninu e vati osep tidue burong ke bulmakau e sipsip e belis. E osep leklou tidong ke bota e tisusuk osep ka time ke kantri leklou urok mani ke osep Yuda ina urok mani. 15Iye vati elio ane deka iye due galou e pilaie deka sik osep e bulmakau e sipsip ke omur are. E iye kul bota ke osep ka tisusuk mani e elio ane ser mani ke taklak. 16E iye wai ke osep ka tidue burong ke belis langane. “Umakalke monuk ane la. Elio ka umodue Livou ila ninu polou ninu ka osep tidue burong ine yagos.” 17Deka ila disaipel amtarsak sisir pelengon ka oglou osep tisogo ke Ida Tapolngon ila pelengon ka wai langane.

“Elio ka ngong lana ngong ke lem ninu due ngong e polou langka eiou ka dong ke aitno lungong.”

18Deka osep Yuda ina tiwai ke iye langane. “Omdue elio arit ina ka nisngen lange ma nis imi lem arit dong ma amkaranga omdue elio ane?” 19E Yesus koli wai ke isak langane. “Umadar ninu ane e ma ngaurie blang ke oklou eklu.” 20E osep Yuda ina tikoli tiwai ke iye langane. “Aisudo. Osep tiboko ke tobor isapanal lumakene ma tiuri ninu ane. E amwai ma amkaranga omurie ke oklou eklu vala i?”

21E ninu ka Yesus wai ine iye pampamu ine. 22E alo ka iye poga tito ke ina denga ila disaipel amtarsak sisir pelengon ka iye wai ane. E aitno lisak la dagar ke Ida Tapolngon ila pelengon e ke pelengon ka Yesus wai ine.

Yesus ile osep aitno lisak kodong

23E alo ka iye dong ke Jerusalem ke rogo omba ka lana ine la ke alo ka Ida Tapolngon lua osep Yuda ina tisongon omur Isip osep pula tivati elio arit ina ka nisngen ka iye due e aitno lisak la dagar ke iye. 24E Yesus kar aitno ke osep kovok kesua iye ile osep aitno lisak. 25E iye ile wansua ka dong ke osep aitno lisak kodong. E ke batne langane gute kene dong ma lua iye ma iye ile osep urok elio kovok.

Currently Selected:

Jon 2: ANT

Highlight

Copy