Aposel 25

Pol waiki Sisar klingen ila pelengon

1Deka Festus me polou e dong ke omur are. Iye dong ke Sisaria oklou eklu deka iye tito la ke Jerusalem. 2Iye tito la polou ke Jerusalem yagos e osep loulou ina ka omba tigosok osep Yuda ina urok osep namormor tipolou ke iye e tisin elio pula vri ke Pol. E tiwai dagar ke Festus langane. 3“Imawaiki omlua imi e ampagei Pol tito me ke armok ane.” Tiwai langane kesua tilalo pelengon kodong langka alo ka Pol didi ekreng me ma tidue burwa ke iye. 4Festus klingen urok pelengon deka koli wai ke isak langane. “Pol dau dong ke kalabus ke Sisaria. Tauni kovok ma ngaduru ngala ari. 5Alo ka ngala ari ngawaiki lumu osep namormor leklou tigosok ngong ma imala imopolou ari. E langka umeile Pol dar pelengon gesa ma umawai ine e ngaklingen lumu pelengon ine ke armok ari.”

6Festus dau dong ke Jerusalem langka oklou lumeklu koke oklou songotno deka iye songon armok e la duru ke Sisaria. E oklou silang iye la dong ke ila kova ka iye wade osep urok elio ine e wai ke osep langane. “Umodue Pol ma iye me polou ke omtongu.” 7Deka tidue Pol me polou ke Festus bitna. E osep Yuda ina ka oglou tisongon Jerusalem e time kodong tivri lelei ke Pol e tisin elio soulu lokono pula vri ke iye. E urok sinngen elio adai vala kesua batne dong ine kovok. 8E Pol tito wai ke Festus langane. “Gute namor emklingen. Ngadar imi osep Yuda ina limem pelengon dagar aling kene gesa kovok. Silang ngadue elio soulu ke Ida Tapolngon ila ninu kovok. E silang blang ngadue elio soulu ke Sisar ka vri mgo ke udo omur kovok.” 9Festus klingen Pol ila pelengon e waiki lua osep Yuda ina kesua iye waiki aitno lisak itau ke iye. Deka iye pmi Pol langane. “Aitno lugom lange? Ma itetito itala ke Jerusalem ma ngawade wom ke sinngen elio ka osep Yuda ina tisin isak tivri ke wom ke armok are koke aurou?”

10E Pol koli wai langane. “Gute namor. Eknikane wom ka Sisar ila gute bokongon ina omdong ke lem kova ka amwade osep urok elio ine e ngavri ke emtem. Emklingen lou pelengon kodong e emile omur ngadue elio soulu gesa ke osep Yuda ina kovok. 11Langka lou elio gesa vri ke ngong ma ngamete ine deka ma ngamete e ngawaiki ngapren ine kovok. E sinngen elio gesa vri ke ngong kovok e gute gesa dong ka karanga due ngong ma ngala ke isak kovok. Eknikane ngawai ke wom langane. Ngawaiki ngala ke armok Rom ma ngapolou ke gute Sisar bitna ma iye tona wade lou elio.” 12Festus klingen Pol ila pelengon deka iye gosok osep ka tikar iye ilengen itau timter pelengon pulu ine. E iye palongo Pol ila langane. “Amwai amwaiki amla ompolou ke Sisar bitna deka ma amla ompolou ke iye.”

Festus palongo gute Agripa ke Pol

13Mase oklou leklou mela yagos deka gute Agripa ka vri mgo ke omur gesa orwo lutno Bernaisi time tipolou ke Sisaria ma tivati Festus e tikar iye pelengon itau. 14Tidong ke armok oklou pula e Festus palongo Agripa ila ke Pol langane. “Oglou alo ka Feliks plau omur ane iye due gute Pol la dong ke kalabus e eknikane iye dau dong ine. 15Alo ka ngatito ngala ke Jerusalem osep Yuda ina urok osep loulou ina ka omba tigosok urok osep namormor tisin elio pula vri ke iye kesua tiwaiki ngawai ma iye mete. 16Deka ngapalongo urok e ngawai langane. ‘Aurou. Imi osep Rom ina limem elio langane. Langka osep tisin elio vri ke gute gesa io gute tonari ma wai ila pelengon ke osep tonari amtarsak mgo. E imeklingen ke iye ma imeile omur ine.’ 17Deka osep ka tisin elio vri ke iye tigosok ngong imabauluk imeme ke armok ane. E lokono oklou silang ngadong ke lou kova ma ngawade osep urok elio ine. E ngawai langane. ‘Umapaur Pol ma iye me polou ane.’ 18Deka osep tipaur Pol me polou ke omtongu e osep ka tisin elio vri ke iye tivri ke omtongu blang. E tiwai urok sinngen elio ke ngong e tiwai ke elio soulu gesa ka iye due langka aitno lungong mter ine kovok. 19Aurou. Tiwai alo ka Pol lotuim Inarak Tapolngon iye didi inarak apu itau kovok. Silang blang aitno lisak soulu ke Pol kesua iye wai dagar ke gute Yesus ka oglou mete. Iye wai Yesus poga tito ke ina denga. E osep Yuda ina tiwai iye dau mete e poga tito kovok. 20Ngaklingen urok pelengon e dau ngaile omur ine kovok. Deka ngapmi Pol langane. ‘Ma emtito amla ke Jerusalem ma ngawade lem elio ke armok ari koke aurou?’ 21Pol klingen lou pelengon deka iye koli wai langane. ‘Aurou. Ma ngadong la lama ngapolou ke Sisar bitna ma iye klingen lou pelengon vala.’ E ngawai ke osep tidue la dong ke kalabus la lama ma ngakaranga ngapagei iye la polou ke Sisar bitna.” 22Festus wai langane deka Agripa wai langane. “Ngawaiki ngaklingen Pol ila pelengon.” Deka Festus wai langane. “Eriar langka amwaiki emklingen ine oklou silang ma emklingen ine.”

Pol polou ke Agripa bitna

23Oklou silang polou e Agripa orwo lutno Bernaisi tibares pula deka time tipolou ke ninu omba ka osep tiduni pulu ine. E tisepe e tidong kap osep ola ina inarak plaungan ka mgo e osep namormor ke armok ari. E Festus wai ke osep ma tidue Pol me polou ke amtarsak. 24Pol me polou ke amtarsak kodong deka Festus wai langane. “Agripa wom ka emvri mgo ke omur gesa e umu ka pula keniye ka umodong ane kap imi umavati gute ka vri ane. Oglou ngadong ke Jerusalem e osep Yuda ina ka pula keniye tisin elio vri ke gute ane. Tiwai dagar lokono e tiwaiki ngawai oku ane ma gute ane mete. 25Ngawade gute ane ila elio kodong e ngaile ila elio gesa vri ke iye langka itemter iye ma iye mete ine kovok. E iye tona wai iye waiki polou ke Sisar bitna ma Sisar klingen ila pelengon. Deka ngawai ma iye la polou ke Rom ma Sisar klingen ila pelengon. 26E eknikane ngausine? Ma ngasogo lange ine e ma lou pas uti la polou ke gute ka vri mgo Sisar? Umoklingen. Eknikane ngadue gute ane polou ke wom Agripa emtem e umu keniye ka umodong ane omtomu blang. Ma umoklingen gute ane ila pelengon mgo e mase ma ngasogo lou pas ine. 27Kesua aitno lungong mter langka ngapagei gute kalabus ina gesa la polou ke Sisar e ngasogo ke elio ka vri ke iye mgo kovok ngadue elio soulu.”

Currently Selected:

Aposel 25: ANT

Highlight

Copy