Aposel 20

Pol lila ke provins Masedonia e omur Grik

1Osep ari tidardar kla yagos deka Pol gi Yesus ila disaipel ma time tiduni pulu kap iye. E iye kar pelengon itau ke isak ka due aitno lisak dagar. Iye wai ke isak yagos deka iye songon isak e la ke provins Masedonia. 2Iye lila ke omur tonari e kar pelengon itau ke osep ka tidong ine ka due aitno lisak dagar e mase iye polou ke omur Grik. 3E iye dong ine iding ke taiko eklu. Iye dong ke omur tonari e taiko eklu mela yagos mase iye waiki kli sip ka la ke provins Siria. Alo ari iye klingen osep Yuda ina tilalo pelengon ma tidue burwa ke iye. Deka Pol aitno mter ma iye la ke provins Siria kovok. Aurou. Ma iye bauluk ke provins Masedonia vala. 4Ari Pirus otno arang Sopater ka gute Beria ina la kap iye. E gute Aristarkus e gute Sekundus ka isak osep Tesalonaika ina tigosok iye. E gute Gaius ka gute Derbe ina gosok iye. E gute Timoti blang gosok iye. E gute Tikikus orwo gute Trofimus ka provins Esia ina tigosok Pol blang. E isak keniye kla. 5Osep ane timgo ke imi e tipolou ke armok Troas deka tipara ke imi. 6E imodong ke Filipai la lama rogo ka osep Yuda ina tingen bret ka yis dong ine kovok mela yagos. Deka imesep ke sip e imosongon Filipai e imala la lama oklou elme mela yagos e imopolou ke osep ka tipara ke imi ke Troas. E imodong ke armok tonari oklou lumorwo.

Yutikus mete kodong deka Pol due dong blang

7E ke Sande imoduni pulu kesua imawaiki imodue elio komunio ina. Ari Pol napapra osep pula. Iye nogrum wai ila pelengon e dong tauni ine la lama epmes airavu kesua oklou silang iye waiki songon isak e la. 8-9Ari imoduni pulu ke ninu gesa ka ina asang kene ina tito la ke asang orwo ina tito la ke asang eklu ina. E imoduni pulu ke ina eliang ka dong egim lokono. Eliang tonari ina lam pula mana ine. E gute auram ka angaine Yutikus dong ke limem duningen. Iye dong ke windo gesa e munu kudung ngangik lokono alo ka Pol dong tauni ke ila pelengon deka iye gene duru ke taklak. Deka osep tisongon eliang ka egim e tiduru kla tipolou ke iye e tikalke kesua iye mete. 10E Pol blang duru la polou ke iye deka iye duru munu ke gute ka mete. E limla lelei gute tonari pampamu ine deka wai ke isak langane. “Anmu nesik sakam. Gute ane ano dau dong ine.” 11Deka Pol bauluk tito la ke eliang ka egim blang e iye tuktuk bret kap osep deka tingene. Deka iye dong tauni ke ila pelengon blang la lama kotkotu lokono e iye songon isak e la. 12Osep tonari tipaur gute auram la ke ila ninu e aitno lisak itau lokono kesua ila mosongon dau dong ke iye.

Pol songon Troas deka la ke armok Miletus

13Imesep ke sip e imomgo ke armok Asos ka imawaiki imososon Pol ine. Oglou Pol wai ke imi langane. “Umomgo umesep ke sip e umopolou ke Asos mgo e ma ngame batne e ngadidi ekreng ma ngapolou ke umu.” 14Imopolou ke Asos kodong e mase Pol polou ke imi blang. Deka iye sep ke sip e imosongon armok are e imala ke armok Mitilini. 15Oklou si-lang imosongon Mitilini e imala imopolou olwo boto ke aidunu Kios e imomunu. Imomunu yagos deka oklou silang imala ke aidunu Samos e imomunu blang. Imomunu yagos deka oklou silang imala blang la lama imopolou ke armok Miletus e imodong are. 16Oglou Pol aitno mter ma iye la lelei Efesus. Iye waiki dong ke Esia kovok kesua iye waiki suong polou ke Jerusalem. Ma iye dong ari alo ka tidue rogo ka osep Yuda ina tisire Pentikos.

17Pol dong ke Miletus e ari iye due omon gesa la ke osep ka tiplau Ida Tapolngon ila osep ka tidong ke Efesus ma time tiduni pulu kap iye. 18Alo ka osep tonari tipolou Pol wai ke isak langane. “Umeile omur ke lou elio isuk isuk nogrum ke alo ka mgongon ngapolou ke umu ke Esia. E lou elio isuk isuk ka ngadue oklou aling aling. 19Lama osep Yuda ina tiwaiki tidue agegeng ke ngong e ngakngis pula ine dau ngaboko Ida Puda ila bokongon e aitno lungong mter ke ngong kovok. Aurou. 20E silang blang langane. Oglou langka pelengon gesa dong ka karanga lua umu nganapaprae ke umu. Nganapaprae ke osep pula amtarsak e ke lumu ninu kene kene. 21Nganapapra ke osep Yuda ina e ke osep ka isak osep Yuda ina kovok. Nganapapra langane. ‘Umabauluk aitno lumu ke lumu elio epmes ina deka aitno lumu la ke Ida Tapolngon e aitno lumu la dagar ke Ida Puda Yesus Krais.’ 22Eknikane Ano Itau due ngong deka ma ngala ngapolou ke Jerusalem. E ngaile ke elio bitna bitna ka ma tipolou ke ngong kovok. 23E dau ngaile langane. Ano Itau wai ke ngong e ngaile omur ma osep tidue agegeng ke ngong e ma tidue ngong ngasep ke kalabus blang. 24Lama elio soulu bitna bitna tipolou ke ngong aitno lungong mter ke ngong kovok. Aurou. Aitno lungong dagar ma ngadue bokongon ka Ida Puda Yesus kare ke ngong e ngawaiki ngaboko ine vala. Iye kar bokongon ke ngong ma nganapapra ila omon itau ka didi Ida Tapolngon ila makaingan.”

25“Oglou nganapapra ke umu ke alo ka Ida Tapolngon ma plau osep ka pula keniye. E eknikane ngaile ma umu keniye umavati ngong aling kene blang kovok. 26E ngapalongo lumu langane. Langka gute gesa mete ke elio epmes ina e ano la kluk are batne ke ngong kovok. Aurou. Batne ke iye vala. 27Kesua oglou nga-napapra Ida Tapolngon ila pelengon keniye ke umu e ngabisi ine kovok. 28Eknikane umu ka Ano Itau rere umu Ida Tapolngon ila osep inarak plaungan umaplau umu itau. Umekere Ida Tapolngon ila osep itau lokono. Kesua Otno Arang ina marau kli inarak elio epmes ina. 29Ngaile ma ngala deka ma osep leklou ka isak osep soulu bitna ma time e tiyak umu. Tiyak umu ma tidue pogle ke umu eriar langka gemle kevena tipupru sipsip deka tingen isak. 30E silang blang langane. Mase ma supmu leklou tipolou ka tibuli urok pelengon kap Ida Tapolngon ila pelengon e ma tikar pelengon yakngan ke umu. Kesua tiwaiki osep ka aitno lisak dagar ke Yesus tididi urok pelengon vala. 31E eknikane umeile umu itau lokono lama elio soulu polou ke umu. Umoklingen. Ngakar pelengon dagar ke umu oklou aling aling iding ke tobor eklu e aitno lungong vri ke umu e ngakngis ke umu.”

32“E eknikane ngawai ke umu langane. Ida Tapolngon kis umu dagar e kere umu itau. E ila pelengon ka didi ila makaingan karanga due umu umodong dagar lokono e ma iye lua umu ke ila kerengen langka iye lua osep keniye ka iye rere isak ila osep. 33Ngadong kap umu e ngangale lumu wan langka silva e gol e klos bitna bitna kovok. 34Umeile omur oglou ngaboko ma lou mani polou dong. E mase ngakli lou wan bitna bitna e ngalua lou saten ka tidong kap ngong ke urok wan bitna bitna blang. 35Lou bokongon keniye nis umu langka itoboko dagar itakaranga itolua osep ka tikaranga tilua isak tona kovok. Omtomu sisir Ida Puda Yesus wai langane. ‘Langka osep tikar ite wan aitno lite neser isuk boto ine. E langka itosoro wan ke osep e batne kovok aitno lite neser omba ine.’”

36Pol wai ke isak langane deka iye gosok osep keniye tigrum kamsak tiduru ke taklak e tiwai itau ke Ida Tapolngon. 37Tiwai itau yagos deka tikngis ke Pol e tiberber iye. 38Osep tonari aitno lisak kro lokono kesua Pol wai ke isak ma tivati iye aling kene blang kovok. Deka isak keniye tipaur iye la ke sip.

Currently Selected:

Aposel 20: ANT

Highlight

Copy