Aposel 18

Pol boko ke armok Korin

1Mase Pol songon Atens e la polou ke armok Korin. 2E ari iye soson gute Yuda ina gesa ka angaine Akwila ka ila omur batne Pontus. E oglou tauni kovok iye gosok esna Prisila tisongon omur Itali e time tipolou ke Korin. Kesua gute Klodius ka vri mgo ke omur Rom wai dagar ma osep Yuda ina keniye tisongon armok Rom e isak kla tidong ke omur silang. E Pol la ke isak. 3Ari Pol la dong kap isak kesua isak tigosok Pol urok bokongon kene. Tiboko ke ninu molo ina langka oglou Pol boko ine. E ari tidong e tiboko ke ninu molo ina e tidue burong ke isak. 4Ari sabat kene kene Pol la sep ke osep Yuda ina urok duningen ina ninu e wai kap osep. Iye wai pula ke Ida Tapolngon ila pelengon kesua iye waiki osep Yuda ina e osep Grik ina ka tiklingen ila pelengon aitno lisak la dagar ine.

5Mase Sailas orwo Timoti tisongon provins Masedonia e time tipolou ke Korin. E ari Pol due elio kene vala. Iye napapra ke osep Yuda ina langane. “Yesus gute ka Ida Tapolngon rere Krais ka lua osep ke urok elio epmes ina.” 6Osep Yuda ina tiklingen Pol ila pelengon deka tipul dogur ke iye e tiwai soulu ke iye. Pol klingen urok pelengon e batuktuk ila molo ma ina group la deka iye wai langane. “Langka umeimina ke lumu elio epmes ina io batne dong ke umu e dong ke ngong kovok. E ngong ma ngala nganapapra ke osep ka isak osep Yuda ina kovok.” 7Deka Pol songon duningen ina ninu tonari e la polou ke gute gesa ka lotuim Ida Tapolngon ka angaine Titius Jastus. Ila ninu dong olwo boto ke duningen ina ninu tonari. 8Ari gute Krispus ka duningen ina ninu ina plaungan gosok osep keniye ka tidong ke ila ninu aitno lisak la dagar ke Ida Puda. E silang osep pula ka tidong ke Korin tiklingen Pol ila pelengon deka aitno lisak la dagar ke Yesus e osep tipaunim isak.

9Ari epmes gesa Pol vati ano e Ida Puda palongo ila langane. “Wom omulou tarna lugom ke osep sakam. Omdong amwai lem pelengon vala e omdong adai sakam. Omboko vala. 10Kesua ngadong kap wom e gute kene gesa dong ka karanga paiavu wom kovok. Aurou. Osep pula ka tidong ke armok ane isak ngau osep.” 11Pol klingen ila pelengon yagos e iye dong ke armok ari tobor kene emkil e napapra Ida Tapolngon ila pelengon ke osep matamur.

12Mase alo ka gute Galio vri mgo ke provins Akaia ke omur Grik osep Yuda ina aitno lisak kene pulu e soulu ke Pol. Deka tikis iye dagar e tidadai iye la polou ke Galio bitna ma tikotim iye. 13E tisin elio vri ke iye langane. “Gute ane ila pelengon mter osep pula aitno lisak ma tipli limem pelengon dagar. Iye waiki osep tididi pelengon dagar silang ma tilotuim Ida Tapolngon.” 14Osep Yuda ina tisin elio vri ke Pol langane deka iye waiki koli pelengon ma Galio klingen ine. E Galio dong kovok. Aurou. Iye koli osep Yuda ina urok pelengon langane. “Umu osep Yuda ina umoklingen. Langka gute ane dar pelengon dagar koke due elio gesa ka soulu lokono are itau langka ma ngadong e ngaklingen lumu pelengon. 15E eknikane lumu sinngen elio la ke lumu pelengon e supmu e ke lumu pelengon dagar vala. E eknikane ma ngaklingen lumu pelengon kovok. Aurou. Ma umu vala umawade ine.” 16Deka iye sik isak kla ke kot tonari. 17Deka osep tikis dagar Sostenes ka iye gute ka plau osep Yuda ina urok duningen ina ninu e timluk iye pula ke kot bitna. E Galio aitno mter ine kovok. Aurou. Aitno epen ine vala.

Pol songon Korin e bauluk ke Antiok blang

18Pol dau dong ke Korin oklou pula e mase iye waiki songon sisrok ka osep Kristen e la sep ke sip gesa ka la ke provins Siria. Alo ari gute Akwila orwo esna Prisila isak kla kap iye. Tipolou ke armok Senkria mgo e ari Pol waiki didi osep Yuda ina inarak apu gesa deka gute gesa blou Pol apna elilo keniye la kesua elio ane nisngen iye wai dagar ke Ida Tapolngon ke elio gesa kodong. 19Ari tisongon Senkria deka isak kla tipolou ke armok Efesus. Deka Pol songon isak e iye la sep ke osep Yuda ina urok duningen ina ninu ka dong ke armok tonari. E iye wai pula kap osep Yuda ina ka tidong ke duningen ina ninu tonari. 20Osep tiklingen Pol ila pelengon e tiwaiki ma iye dong dau tauni kap isak e Pol koli wai langane. “Aurou. Ma ngala vala.” 21Mase iye songon isak e wai ke isak langane. “Langka Ida Tapolngon waiki ngabauluk ke umu blang ma ngabauluk ke umu. E langka aurou ma ngabauluk kovok.” Deka iye sep ke sip e sip songon Efesus la.

22Mase sip tonari polou ke armok Sisaria e dong. E Pol songon sip e iye tito la ke Jerusalem e polou ke Ida Tapolngon ila osep e wai “oklou itau” ke isak. Mase iye songon Jerusalem e la duru polou ke Antiok. 23Iye dong ke Antiok oklou leklou e mase songon armok e la lila ke omur Galesia e omur Frigia. E iye kar pelengon ke Yesus ila disaipel ka due aitno lisak dagar lokono ke Ida Tapolngon.

Apolos napapra ke Efesus

24Alo ari gute gesa ka angaine Apolos la polou ke Efesus. Iye gute Yuda ina gesa ka ila armok batne armok Aleksandria. Iye gute ka wai pelengon itau e ile omur ke Ida Tapolngon ila pelengon. 25Oglou osep tiparere iye itau ke Ida Puda ila elio e ila pelengon. E iye arit iye e napapra pula e parere osep itau ke Yesus. Ari iye ile ke elio paunimngen ina ka oglou Jon napapra osep ine vala. 26Apolos sep ke osep Yuda ina urok duningen ina ninu e wai dagar pula ke Ida Tapolngon ila pelengon e ulou tarna kovok. Alo ari Prisila orwo Akwila tiklingen ila pelengon e tidue sep ke urok ninu e tiparere iye itau ke Ida Tapolngon ila elio ma iye ile omur ine.

27Mase Apolos waiki la ke provins Akaia deka osep Kristen tikar iye pelengon ka due aitno dong dagar. E tisogo pas gesa ka la ke Yesus ila disaipel ka isak osep Grik ina ka wai langane. “Osep umoklingen. Aitno lumu itau ke Apolos.” Deka ari Apolos songon Efesus e la polou ke provins Akaia. E ke omur ari Apolos duni pulu kap osep ka oglou Ida Tapolngon makai isak e aitno lisak la dagar ke Yesus e iye lua isak itau. 28E iye wai dagar ke osep Yuda ina pula amtarsak e ila pelengon mole urok pelengon. Ari iye kis Ida Tapolngon ila pelengon e didie. E iye kere pelengon tonari lana ine e wai langane. “Yesus iye tona gute ka Ida Tapolngon rere Krais ka lua osep ke urok elio epmes ina.”

Currently Selected:

Aposel 18: ANT

Highlight

Copy