Aposel 17

Osep Tesalonaika ina aitno lisak soulu ke Pol e Sailas

1Pol orwo Sailas isak kla ke armok Amfipolis e armok Apolonia. E mase tipolou ke armok Tesalonaika ka osep Yuda ina urok duningen ina ninu gesa dong ine e tidong ke armok tonari. 2Ari Pol didi ila elio ka iye napapra ke osep Yuda ina mgo e la sep ke urok duningen ina ninu. Iye sep ke duningen ina ninu ke sabat eklu e ke sabat kene kene iye ritim Ida Tapolngon ila pelengon e osep tiklingen ke iye. Deka ari iye gosok osep timter pelengon tonari pulu. 3Iye ritim Ida Tapolngon ila pelengon ka wai ke Yesus ina metengen e ila baulukngon deka iye kere pelengon tonari lana ine langane. “Oglou kodong Ida Tapolngon rere gute Krais ka ma iye lua osep ke urok elio epmes ina ma iye namani elio soulu e mete deka poga tito ke ina denga. Umoklingen. Gute ka Ida Tapolngon rere Krais iye gute Yesus ka eknikane nganapapra iye ke umu.” 4Osep Yuda ina leklou aitno lisak la dagar ke Pol ila pelengon e tineklep ke Pol orwo Sailas. E osep Grik ina ka tidue anit ke Ida Tapolngon tineklep ke isak blang. E apmang leklou ka angainsak omba tineklep ke isak blang. 5E osep Yuda ina leklou blang aitno lisak rim ke isak deka tidue osep ropo leklou e tiduni pulu e osep Yuda ina tisruk osep pula ka tidong ke armok aitno lisak. E tisuong kla ke gute Jeson ila ninu e tikrim ke Pol e Sailas ine ma tidue isak tipolou ke osep pula amtarsak. 6Tikrim ke isak e tipado isak kovok e tikis Jeson gosok osep Kristen leklou dagar e tidadai isak kla tipolou ke osep ka tiplau armok amtarsak. Deka tidaiku omba langane. “Osep ka tidue elio soulu polou ke omur ka pula keniye time ke limem armok ane blang. 7E Jeson ane kere isak itau ke ila ninu. Isak keniye tipul dogur ke Sisar ila pelengon e tiwai gute silang ka angaine Yesus vri mgo ke isak vala.” 8E tisruk osep pula gosok osep ka tiplau armok ka tiklingen pelengon tonari aitno lisak. 9Deka osep ka tiplau armok tiwai langane. “Jeson omgosok supmu ma umekli lumu elio ane.” E Jeson gosok sisrok tiklie deka osep ka tiplau armok tisongon isak kla.

Pol e Sailas tiboko ke armok Beria

10Epmes polou deka lokono osep ka Pol orwo Sailas sisrok tipagei isak kla ke armok Beria. Tipolou ine kodong deka isak kla ke osep Yuda ina urok duningen ina ninu e tisepe. 11Osep Yuda ina ka tidong ke Beria urok elio mole osep Yuda ina ka tidong ke Tesalonaika urok elio. Kesua tiklingen Ida Tapolngon ila pelengon deka tikis dagar lokono ine. Ari oklou aling aling tiklingen Pol orwo Sailas urok pelengon e tiwade kap Ida Tapolngon ila pelengon ma tile omur urok pelengon lokono koke aurou. 12Ari osep Yuda ina pula aitno lisak la dagar ke Yesus e osep Grik ina ka apmang e arang ka angainsak omba aitno lisak la dagar ke iye blang.

13Osep Yuda ina ka tidong ke Tesalonaika tiklingen omon Pol napapra Ida Tapolngon ila pelengon ke osep ka tidong ke Beria blang. Deka tisongon Tesalonaika e kla ke Beria e ari tisruk osep matamur aitno lisak e aitno lisak tipolou soulu ke Pol orwo Sailas. 14Deka lokono osep Kristen tipagei Pol duru ke misuon. E Sailas orwo Timoti isak dau tidong ke Beria. 15E osep leklou ka tigosok Pol tipaur iye iding ke armok Atens deka tidardar pulu. E Pol wai ke osep ka tibauluk ke Beria langane. “Umawai ke Sailas orwo Timoti ma tisuong time ane.”

Pol napapra ke Atens

16Pol dau dong ke Atens e para ke Sailas orwo Timoti ma time tipolou ke iye. Ari iye vati osep Atens ina urok sapingen pula pula tidong ke armok e aitno kro lokono ine. 17E Pol la sep ke osep Yuda ina urok duningen ina ninu deka iye gosok osep Yuda ina e osep Grik ina ka tidue anit ke Ida Tapolngon tiwai pulu ke Ida Tapolngon ila pelengon. Ari ke oklou pula iye la polou ke omur ka osep tiduni pulu ine e iye gosok osep ka tidong ine tiwai pulu ke Ida Tapolngon ila pelengon. 18Ari osep Epikurian ina leklou e osep Stoik ina leklou ka urok ilengen omba timter pulu pelengon kap Pol. E isak leklou tiwai pulu langane. “Gute ane ka wai ulik ulik iye wai lange?” Deka osep leklou blang tiwai langane. “Gute ane iye wai ke tapolngon ka osep leklou inarak tapolngon e iteile ine kovok.” Tiwai langane kesua Pol napapra ke Yesus e elio ka iye mole metengen e poga tito ke ina denga. 19Deka osep tipaur Pol polou ke osep ngongle ka tiduni pulu ke gigri ka angaine gigri Areopagus ma tiklingen ila pelengon. E tiwai ke iye langane. “Imawaiki imeklingen pelengon oku ina ka amwai ke osep ine. 20Imeklingen lem pelengon e imeile omur ke lana ine kovok. Oglou imeklingen pelengon langane kovok e eknikane imawaiki emkere lem pelengon lana ine ma imeile omur ine.” 21Alo ari osep Atens ina gosok osep kaulei ka tidong ke armok tonari urok elio langane. Oklou pula tiduni pulu kesua tiwaiki tiklingen pelengon oku ina e tiwaiki tiwai pulu ine.

22E ari Pol vri ke osep ka tiduni pulu ke gigri Areopagus amtarsak e wai ke isak langane. “Umu osep Atens ina umoklingen. Ngavati aitno lumu la ke upu tapolngon ka isak pula. 23Alo ka ngalila ke armok ane ngavati sapingen bitna bitna ka umolotuim isak. E silang blang ngavati bota gesa ka umodue elio opmu ina ine. E ke bota tonari sogongon gesa dong ka wai langane. ‘Bota ane tapolngon gesa ka ite dau iteile ine kovok ila wan.’ Umoklingen. Tapolngon are ka umeile omur ine kovok e umolotuim eknikane ma nganapapra ke umu ine.”

24“Ida Tapolngon ka tapol taklak ka pula keniye e wan bitna bitna ka tidong ine iye tona omur ka egim e omur ka moli Inarak Puda. E iye dong ke ninu gesa ka osep tiurie kovok. 25Silang ila wan karanga polou isuk boto vala ma itosep itekere iye langane kovok. Aurou. Iye tona kar ite ante ka dong ke ite e omung lite e wan bitna bitna ka tilua ite. 26Itosep ka pula keniye ka itodong udo eia ka oglou dong iye gute kene vala. E eknikane osep ka pula keniye ka tidong ke omur ka pula keniye urok eia ka oglou dong iye gute tonari. Oglou ari kodong Ida Tapolngon rere osep ka pula keniye urok maglakngan e omur ka isak kensak kensak tidong ine. 27Ida Tapolngon due itosep ma itekrim ke iye tona. Iye waiki langka itoulung ke iye la lama itapado iye. Kesua iye dong mawa ke ite kovok. Aurou. Iye dong olwo boto ke ite vala. 28Eknikane itodong e itakaranga itelila batne iye due ite. Oglou lumu gute sogongon ina gesa sogo langane. ‘Ite blang tapolngon gesa titno.’ 29Eknikane itosep Ida Tapolngon titno ite. E aitno lite karanga mter iye sapingen gesa ka osep tidue wan langka gol e silva e opmu deka tisapi iye ine kovok. Aurou. 30Oglou ari itosep aitno lite kaka ke Ida Tapolngon e aitno mter ine vala. E iye ules ite ine kovok. Eknikane Ida Tapolngon wai dagar ke osep ka pula keniye ma tibauluk aitno lisak ke urok elio epmes ina e aitno lisak la dagar ke iye vala. 31Kesua oglou kodong Ida Tapolngon rere oklou kene ma gute ka iye rere kodong ma iye didi ila elio itau e wade osep ka pula keniye ine. Pelengon ane lokono lokono kesua gute tonari mete kodong deka Ida Tapolngon due poga tito ke ina denga.”

32Pol wai ke Yesus ina metengen e ila baulukngon e osep leklou tiwai apok ke iye. E osep leklou blang tiwai langane. “Pol imawaiki ma amparere imi ke pelengon ane blang. Imawaiki imeklingen ine blang.” 33Pol klingen osep tonari urok pelengon deka iye songon isak e la. 34Ari osep leklou tineklep ke Pol e aitno lisak la dagar ke Yesus. Gute kene ka aitno la dagar ke Yesus angaine Dionisius. Iye gute Areopagus ina. E apmang kene ka angaine Damaris aitno la dagar ke Yesus. E osep leklou aitno lisak la dagar ke Yesus blang.

Currently Selected:

Aposel 17: ANT

Highlight

Copy