Marko 15
15
1Chwi heyawo wakaareha chila wakohani wabaha hamwe na waghosi, na watama, na lumungu lwose, wakamfunga Yesu, wakamtika wakamwete ha Pilato. 2Akambujanya Pilato, Niwe mfumwa wa Wayahudi? 3Ekitalua amburra, Wateta. Wakalinganya muno wakohani wabaha. 4Pilato akambujanyawa ekiteta, Toutalua kiteto? Yoa, mburi ijo wakung’olia. 5Nete Yesu tatalua kiteto kimwe, mtano akarighiwa Pilato. 6Hena karamu awachunguiya mwe echungiwe, wemkundie. 7Heokie eitangwa Barabba, echungiwe hamwe nawo wearehe kilinganya naye: wearehe ukoma ghati ya kilinganya. 8Na matorano wekiloza, wakawoka kukunda sa earehe misi yose hawo. 9Pilato akawatalua, ekiteta, Mwakunda nimuchunguiye mfumwa wa Wayahudi? 10Amu akatisiwa ti ha luneng’o wakohani wabaha wamng’ola. 11Wakohani wabaha wakaeleja matorano keba awachunguyie Barabba. 12Pilato ekitaluawa awawurre, Mwakunda kini, mimketeze ula mumwitanga mfumwa wa Wayahudi? 13Wakalozawa, Mbanike.
14Pilato akawawurra, Amu owiwi ani eketie? Wakaneta kuloza, Mbanike.
15Pilato ekikunda kuwaizihija matorano akawachunguyia Barabba, akamng’ola Yesu, abighwe, awanikwe. 16Asikari wakamwete ndeni ya nyumba, niyo Praitorio, wakawaitanga hamwe Iweriri yose. 17Wakamdoka bendera, wakamghera lumerisia wekiluiwita na mivwa; 18wakawoka kumkezia, Ngezia, Mfumwa wa Wayahudi. 19Wakambigha mtwi na ighughu, watamtufia mate, wakadung’uta wakamsemba. 20Mtano wekinamsole, wakamhambua bendera, wakamdoka suke jakwe ye, wakamwete awanikwe. 21Wakamsingirija mundu ewetia, Siman Mkurene, ekifuma shighati, wawee Iskandea na Rufu, atike msalaba wakwe. 22Wakamwete wanga ya handu ha Golgotha, niyo ikitisiwika, handu ha kiborong’. 23Wakamwinga kunywa mvinyo ugerirwe manemane, nde ye tauhia. 24Mtano wekinambanike wakaghawanya suke jakwe, wekibigha kura wanga jawo, ti mundu ose auhe kini. 25Iokie saa ya katatu wakambanika. 26Heokie na itamo ya ulinganya wakwe litamiwe wanga,
MFUMWA WA WAYAHUDI.
27Na hamwe naye wawanika na wasoki weri, mwe mbai yakwe ya kuume, na mwe mbai ya kumoso. 28Lafika itamo liteta, Akatarika hamwe nawo watekwa. 29Nawo wewetie wakamtetia utiri, wekikushakusha mitwi yawo, wekiteta, Wa! Unyamara hekalu, na hena misi mitatu ulijenga, 30ukukije mwenye, usee ghati ya msalaba. 31Huwo na wakohani wabaha wekisola wonawo hamwe na watama, wakateta, Ewakijije wengi, mwenye teidima kukija: 32Masihi mfumwa wa Israeli asee ingeriaha ghati ya msalaba, tuwone na tuitikije. Wala wesulibijwe hamwe naye wakamwetie nyare. 33Ikioka saa ya katandatu, heokie kija wanga ya isanga lose, mtano saa ya kenda. 34Na saa ya kenda Yesu akaloza na ighonda ibaha, ekiteta, Eloi, Eloi, lama sabakthani? Niyo ikitisiwika, Izuwa wangu, Izuwa wangu, nikini unishigha? 35Wandu weimuke hafuhi wekisikia wakateta, Emwitanga Eliya. 36Mwe ekisara, akaizuja sifongo na siki, akaighera na nyungu, akamwinga ainywe, ekiteta, Mshighe, tuyoe kwakicha Eliya eza amseje. 37Yesu eking’ola ighonda ibaha, akahema ngoro. 38Pazia la hekalu likabajika vibarandu viri wanga mtano si.
39Ekiwona njama eimuke kumrongekia, ti ekiloza akahema ngoro, akateta, Kididi mundu uu eokie Mwana wa Izuwa. 40Heokie na wache weyoa hae, ghati ya awa Maryamu Magdalene, na Maryamu mee Yakobo mdongo na Yose, 41na Salome, niwo ekinaoke ghati ya Galilaya wemratere na wemwindie, na wengi weingi wekoyia naye mtano Yerusalemi.
42Mtano ingeriaha ikioka chamagheri, ikinaoke paraskeue, niyo uoho kuwoka kwa sabato, 43ekiza Yusufu eye wa Arimathaya, njama mwenye nganyi, eokie na mwenye ekiuyoyia ufumwa wa Izuwa, akaria kuingia ha Pilato, akakunda muri wa Yesu. 44Pilato akarighiwa ti ingeriaha afwa; mtano ekimwitanga akida akambujanya ti too aho afwa: 45ekitisiwa hena akida, akamwinga Yusufu muri. 46Naye ekizora suke akamseja akamkoda ghati ya suke, akambika ghati ya mbira, iforiwe ghati ya mabwe, akabingilisha ibwe wanga ya mbenge ya mbira. 47Maryamu Magdalene na Maryamu wa Yose wakawona handu ahawikwa.
Currently Selected:
Marko 15: TAVETA
Highlight
Share
Copy

Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.