Mattayo 4
4
1Akarongojwa Yesu shighati ni Ngoma, nesa agheshwe ni Shetani.
2Akachunga asile misi makumaane hemusi na kio, ikuade akasikia nzaa.
3Mghesha akaza akamburra, Kwakicha niwe Mwana wa Izuwa, ghamba mabwe ama maoke kidjo.
4Akatalwa, akaghamba, Itamiwe, mundu tekiaye hena kidjo tiki, nde hena kiteto chose chafuma itumbuni ha Izuwa.
5Kuidiwa Shetani akamwete mtano na kiongo kishenete, akambika wanga ya msudu wa hekalu,
6Amburra, Kwakicha niwe Mwana wa Izuwa, ukutaghe si, amu itamiwe, Enekuaghanyie malaika wakwe, wenekutika mikononi hawo, nesa usikubighe kughuu na ibwe.
7Yesu akamburra, Itamiwewa, Tounemghesha Mzuri Izuwa wako.
8Shetani amtikawa mtano na nduwi ndeza muno, ambondjia masanga mose na kirumi chawo,
9Akamburra, Vindu ivi vyose ninekuinga uneikaugwe kuniomba.
10Naye Yesu akamburra, Tonga, Shetani, amu itamiwe, Mzuri Izuwa wako unemwomba, naye niye mjenye unemtumikia.
11Shetani akamshigha, na yoa, malaika wakaza wakamwindia.
12Na ekinasikie ti Yohana ang’olwa, akatonga Galilaya;
13Akashigha Nazareti, akaza akaikaa Kapernaum, mbai ya ndiwa mihakeni ya Zabulon na Naftalim;
14Nesa kifike kila kitetiwe ni mroti Isaya, ekiteta,
15Isanga la Zabulon na isanga ya Naftalim, nzia ya ndiwa, sela ya Yardani, Galilaya ya Mbare,
16Wandu weikee kijeni wewonie kiangaji kiingi, na wala weikee handu na mvurini ha kifwa, kiangaji kiwafumie.
17Too magheri mala akawoka Yesu kutinda na kughamba, Chweni‐mti, amu ufumwa wa wanga wasongeria.
18Na ekisela afuhi na ndiwa ya Galilaya, akawona wandu weri, wandwawo, Simon eitangwa Petro na Andrea mundwawo, wekigera nyavu ndiweni, amu weokie wasakia.
19Akawawurra, Niratereni, nami ninemuosha wasakia wa wandu.
20Chwi wakashigha nyavu wakamratera.
21Na ekitongawa, akawona wandu weriwa wandwawo, Yakob wa Zebedayo na Yohana mundwawo, ngalaweni hamwe na Zebedayo wawee, wekiareha nyavu jawo: akawaitanga.
22Chwi wakashigha ngalawa na wawee, wakamratera.
23Akasela Yesu ghati ya Galilaya yose, ekilosha ghati ya masunagogi mawo, na ekitinda Sumu yedi ya ufumwa, na ekihodja ndwari yose na unana wose ghati ya wandu.
24Kirumi chakwe kikafuma ghati ya Sham yose, wakamwetie wose wewadjua, weguriwe ni ndwari jingijingi na wasi, nawo wenye luhungu, nawo wenye shughu, na wenye kuwia; akawahodja.
25Matorano meingi wakamratera, wekifuma Galilaya, na Dekapoli, na Yerusalemi, na Uyahudi, na sela ya keri ya Yardani.
Currently Selected:
Mattayo 4: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
