Mattayo 14
14
1Magheri mala Herode tetrarka akasikia kirumi chakwe Yesu,
2Akawawurra wazoro wakwe, Uu niye Yohana Mbatizaji; atewuka kufuma wefwie, na amu ii vindu vibaha vyaketika niye.
3Amu Herode emgurie Yohana, akamchunga, akamgera kichungoni hena lwa Herodiada mche wakwe Filipo mundwawo:
4Amu Yohana emburrire, Si chedicho hako kumhete.
5Na ekikunda kumkoma akaituka wandu, amu wemgurie sa mroti.
6Kake musi wa kuwoneka kwakwe Herode ukinafike mwana we kibora wakwe Herodiada esekie ghati na ghati, akamwiseja Herode.
7Amu ii akatemiana kena kurara kumwinga chose eneomba.
8Naye ekiingijwa ni mee, aghamba, Uniinge aha na mwanje mtwi wakwe Yohana Mbatizaji.
9Mfumwa akashiniwa, kake hena lwa kurara kwake nawo weikaa naye akaaghanya aingwe;
10Akaingija akamchwia mtwi Yohana kichungoni.
11Mtwi wakwe ukaetwe na mwanje, mbora akaingwa, akamtikia mee.
12Waanalosha wakwe wakatonga wakawushija mning’a, wakaujika wakatonga wakamburra Yesu.
13Ekinasikie Yesu akafuma uko ngalaweni mtano handu hesina wandu mwenye: matorano wekinasikie wakamratera na maghuu kufuma viongo.
14Ekinafume akawona matorano meingi, akawasaria, akawahodja wewadjua wawo.
15Hekinaoke chamagheri waanalosha wakamzia wekighamba, Handu aha hesina wandu, na ingeriaha haswa; uwasame matorano, nesa wekitonga ghati ya kaa wakuzorie kidjo.
16Yesu akawawurra, Teiwawe kutonga; unywi muwainge kula.
17Wakamburra, Totuna kindu kunu nde mabumunda masano na nguluma mbiri.
18Akaghamba, Nietieni na kunu.
19Akaaghanya matorano kuikaa si ghati ya mani, akamauha mabumunda masano na nguluma mbiri, akayoa wanga izuwa, akang’ola haika, akamabaa, akawainga waanalosha mabumunda, waanalosha wakawainga matorano.
20Wakala wose, wakaighuta: wakatika mashighajiko ma mabumunda mabaike, mbinda ikumi na mbiri jaizua.
21Wala welie wakaoka wome sa maghana makumi masano, na wachewa na waana.
22Chwi akawasuija waanalosha kukwea ngalaweni, na kumrongoria kutonga sela ya keri, ekiwasama matorano.
23Ekinaidiwe kuwasama matorano akakwea nduwini kuomba mwenye; hekinaoke chamagheri akaoka uko mwenye.
24Ngalawa ikaoka ghati na ghati ya ndiwa, ikabighwa muno na visibwe, amu ya ngungu kuoka mbiwi.
25Na lukamba lwa kanne lwa kio akawazia ekisela wanga ya ndiwa.
26Waanalosha wekimbona esela wanga ya ndiwa wakaituka, wekiteta ti ni kivuri: wakaloza hena fole.
27Chwi Yesu akateta nawo, ekighamba, Ngoro jenyu jidinde; nimi; musiituke.
28Petro akatalwa akamburra, Mzuri, kwakicha niwe, uniaghanye nize hako wanga ya mbombe.
29Akamburra, Izo. Naye Petro ekinasee kufuma ngalaweni akasela wanga ya mbombe, kutonga hakwe Yesu.
30Ekiwona ngungu akaituka, na ekiwoka kumerukia akaloza, ekiteta, Mzuri, unikije.
31Chwi Yesu akauronga mkono akamgura, amburra, We wa luitikijo ludongo, hena kini mwaitalwa.
32Wakakwea ngalaweni, ngungu ikahuja.
33Wala ngalaweni wakamwinamia, wekiteta, Kididi niwe Mwana wa Izuwa.
34Wekinaidiwe kukela wakalifikia isanga la Genesareti.
35Wakamtwarija wandu wa handu hala, wakaingija ghati ya isanga lose la mbai na mbai, wakamwetie wose weokie wewadjua:
36Wakamsemba, wakuware tiki lutiriwo lwa suke yakwe; na wose welukuware wakahodjwa pia.
Currently Selected:
Mattayo 14: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
