Mattayo 13
13
1Musi ula Yesu akafuma nyumbeni akaikaa mbai ya ndiwa.
2Wakamwunganyikia matorano meingi, mtano ekiingia na ngalawa akaikaa, matorano mose wakaimuka kiwambareni.
3Akateta nawo viingi hena mifwanano, ekighamba, Yoa, muhandi efumie ahande.
4Na ekinaoke ekihanda, mbeu jingi jikagwa nzieni, ndeghe jikaza, jikajila.
5Jingi jikagwa ghati ya mabwe, hesina teri nyiingi, chwi jikamea, amu teri yakwe teitonga si,
6Na zano ikinawae jikaoma; na amu ya kusowa migi, jikanyaruka.
7Jingi jikagwa ghati ya mivwa; mivwa ikaeha, ikajinyama.
8Jingi jikagwa ghati ya teri yedi, jikagera, ingi ighana, ingi makumi matandatu, ingi makumi matatu.
9Mwenye masikio asikie.
10Waanalosha wakaza wakamburra, Nikini wateta nawo hena mifwanano?
11Akatalwa akawawurra, Unywi mwaingwa kujitisiwa ngiliwata ja ufumwa wa wanga, wala teweingwawo.
12Amu ula ena, eneingwa, naye eneneta; kake ula esina, enewushijiwa kila enacho.
13Amu ii nateta nawo hena mifwanano, nesa wekiwona wasiwone, na wekisikia wasisikie, nete wasitwarije.
14Na kurota kwakwe Isaya kwawafikia, kwakiteta, Hena kusikia munesikia, nete tomunetwarija, na hena kuyoa muneyoa, nete tomunewona:
15Amu ngoro ya wandu awa yaemea, na masikio mawo madindie ma kusikia, na meso mawo wemachunga; nesa wasiwone na meso, na wasisikie na masikio, na wasitwarije ngoroni, da wasichwe‐mti, na nisiwahodje.
16Kake meso menyu metasiwa, amu meyoa, na masikio menyu, amu mesikia.
17Amu kididi namburra, waroti weingi na wenye ngalo wekundie kuviwona vila muviyoa, wesiviwone, na kusikia vila muvisikia, wesivisikia.
18Amu ii sikieni unywi mfwanano wa mhandi.
19Mundu ekisikia kiteto cha ufumwa asikitwarija, mbiwi eza, etika kila kihandike ngoroni hakwe: uu niye ehandwa nzieni.
20Ula ehandwa ghati ya mabwe, niye ekisikia kiteto na chwi ekiuhia hena luizihirwo;
21Kake tena migi ndeni hakwe, na ukioka wukiwa kana kukinywa hena lwa kiteto chwi eshishirwa.
22Na ula ehandwa ghati ya mivwa, niye ekisikia kiteto, na lwelole lwa masanga na kulangwa mali kwakinyama kiteto, kisigere.
23Na ula ehandwa ghati ya teri yedi niye ekisikia kiteto na ekitwarija; niye egera, mwe ighana, mwe makumi matandatu, mwe makumi matatu.
24Akawang’olia mfwanano ungi, ekiteta, Ufumwa wa wanga wafwanana na mundu ehandie mbeu yedi mtemeni:
25Na wandu wekinashinjie mzo wakwe akaza akahanda mani ma kitito ghati ya ngano, akatonga.
26Ikuade ikinabuushe, ikagera, makawonwa na mani ma kitito.
27Wazoro wakwe mwenye nyumba wakaza wakamburra, Mzuri, Touhandie mbeu yedi mtemeni hako? huwo wawonahi mani ma kitito.
28Akawawurra, Mzo niye eketa huwo. Wazoro wamburra, Wakunda tutonge kumawunganya?
29Aghamba, Hai; ngea mukioka mwamawunganya mani ma kitito, muneng’ola na ngano kimwe namo.
30Shigheni mamee mose mtano mafindiko; na magheri ma mafindiko ninewawurra wafindiki, Wunganyeni ini mani ma kitito, muremachunga miagho nesa mashotwe: kake wunganyeni ngano kilaloni hangu.
31Akawang’olia mfwanano ungi, ekiteta, Ufumwa wa wanga wafwanana na ndembe ya kyardali, mundu eiuha akaihanda mtemeni hakwe.
32Niyo ndongo kukela mbeu jose; kake ikikua, ni mbaha kukela mani mose, na yaoka mti, mtano ndeghe ja wanga jaza na jaikaa ghati ya mbagha jakwe.
33Akawawurra mfwanano ungi, Ufumwa wa wanga wafwanana na chachu, mche eiuha akaiwisa ghati ya vitangu vitatu vya muchu, mtano wachachwa wose.
34Ivi vyose Yesu akawawurra matorano hena mifwanano, na esina mfwanano tewawurrire kiteto;
35Nesa kifike kila kitetiwe na mroti ekiteta, Ninejughua itumbu langu hena mifwanano, ninewondja vindu vyawiswe too kuwoka kwa masanga.
36Ikuade ekiwashigha matorano akaingia nyumbeni, waanalosha wakwe wakamzia wekiteta, Utuwurre na some mfwanano wa mani ma kitito mtemeni.
37Akatalwa akaghamba, Ula ehanda mbeu yedi niye Mwana wa mundu.
38Mteme ni masanga, mbeu yedi, niwo waana wa ufumwa; mani ma kitito, niwo waana wa ula mbiwi:
39Mzo emahandie niye Shetani; mafindiko nimo kuidiwika kwa masanga: wafindiki niwo malaika.
40Amu ii sandu mani ma kitito mawunganyika na mashotwa ni moto, huwo ineoka ghati ya kuidiwika kwa masanga.
41Mwana wa mundu eneingija malaika, na wenewunganya ghati ya ufumwa wakwe mashishiro mose na wala weketa viwiwi,
42Na wewatagha ghati ya iwongo la moto: uko kuneoka kuiya na kutafuna kwa majegho.
43Nawo wenye ngalo wenewaa sa zano ghati ya ufumwa wa Wawee wawo. Mwenye masikio asikie.
44Ufumwa wa wanga wafwanana na sule iwiswe mtemeni, mundu akaiwona akaiwisa, na hena luizihirwo lwakwe atonga, atagha vindu vyakwe vyose, naye azora mteme ula.
45Ufumwa wa wanga wafwananawa na mwareha zora, ekienda malulu medi.
46Ekinawone lulu lumwe lwa zora baha akatonga akatagha vindu vyakwe vyose, akaluzora.
47Ufumwa wa wanga wafwananawa na nyavu igerwe ndiweni, na iwunganya vindu vya mbare jose.
48Ikinaizue wakaijuta mtano na kiwambara, wakaikaa si, wakaviwunganya vyedi na vitangu, wakavitagha viwiwi.
49Huwo ineoka kuidiwika kwa masanga; malaika wenefuma, na wenewaghawa wawiwi na wenye ngalo,
50Na wenewatagha wawiwi iwongoni ha moto: uko kuneoka kuiya na kutafuna kwa majegho.
51Mwatwarija vindu ivi? Wamburra, Ee.
52Akawawurra, Amu ii, mtami ose mwenye kuloshwa vindu vya ufumwa wa wanga efwanana na mundu mwenye nyumba, eng’ola ghati ya mali yakwe vindu visha na vya kae.
53Ikaoka ekinaidiwe Yesu mifwanano ii, akafuma uko.
54Akaza na isanga lakwe akawalosha ghati ya isunagogi lawo, mtano wakarighiwa wakaghamba, Uu ewoniehi kucha uku na zinya?
55Uu siye mwana wakwe msongoi? mee teitangwa Maryamu, na wandwawo Yakobo na Yusuf na Simon na Yuda?
56Na warumburie siwo wose kimwe na uswi? Amu ii ewoniehi ivi vyose?
57Wakashishirwa niye. Yesu akawawurra, Mroti tesowa nganyi nde ghati ya isanga lakwe na nyumbeni hakwe.
58Nete tearehe uko vindu vibaha viingi amu ya kusowa kuitikija kwawo.
Currently Selected:
Mattayo 13: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
