Yohana 21
21
1Ekuade akakuwonyanyawa Isa hena waanaloshwa ghati ya ndiwa ya Tiberia akakwondja huwo.
2Weokie hamwe Siman Petro na Tomaso (eitangwa Maza) na Natanael wa ghati ya Kana ya Galilaya, nawo waana wa Zebedayo, na weingi waanaloshwa wakwe weri.
3Akawawurra Siman Petro, Natonga kureloa nguluma. Wakamburra, Na uswi tuneraterana nawe. Wakaingia chwii ngalaweni, wesiuhe kindu kio kila.
4Mtano heyawo kerre akaimuka Isa kiwambara, na tewetisiwe ti niye Isa.
5Akawawurra Isa, Waana, mna kidjo? Wakamtalwa, Totuna.
6Akawawurra, Tagheni nyavu mondo wa kuume wa ngalawa, mnewona. Wakatagha, na teweidime kujuta amu nguluma kuoka nyingi.
7Akamburra Siman Petro mwanalosha ula emkundie Isa, Niye Bwana. Siman Petro ekisikia ti niye Bwana, akakuchungia nguo, amu eho tuhu, akakuwiritia nduweni.
8Waanaloshwa weingi wakaza ngalaweni ndongo, amu teweho hae ya teri, nde sandu thiraa maghana meri wekijuta nyavu ya ngaluma.
9Wekisea ghati yasi, wakawona moto uko na mbogha igeriwe, na mabu‐mu‐nda.
10Akawawurra Isa, Eteni nguluma mjing’olie ngeriaha.
11Akakwea Siman Petro akaijuta nyavu ghati yasi, izwe nguluma mbaha, ighana, makumi masano, na tatu, najo jikioka nyingi sandu iji, nyavu teyachika.
12Akawawurra Isa, Nzoni, leni. Tekarie mundu wa waanaloshwa kumbujanya, Niani we? wekitisiwa ti niye Bwana.
13Akaza Isa, akauha mabu‐mu‐nda, akawainga, na nguluma huwo.
14Hii niyo ya katatu Isa ekinawonwa na waanaloshwa wakwe, ekioka awuka ghati ya wefwie.
15Wekinaidiwa kula, Isa akamburra Siman Petro, Siman wa Yuda, Unikundie kukela awa? Akamburra, Kididi, Bwana, wanitisiwa nakukunda; Akamburra, Virishe vigonji vyangu.
16Akamburrawa ya keri, Siman wa Yuda, wanikunda mi? Akamburra, Kididi, Bwana, wanitisiwa nakukunda. Akamburra, Marishe magonji mangu.
17Akamburra ya katatu, Siman wa Yuda, wanikunda mi? Akaregija Petro amu amburre ya katatu ti wanikunda mi; akamburra, Bwana, niwe wavitisiwa vyose, wanitisiwa ti nikukundie. Akamburra Isa, Marishe magonji mangu.
18Amin, amin, nakuwurra, ukioka mbwange ukuchunga utonga ukundie, ukioka mughosi uneronga mikono yako, ungi enekuchunga, enekutika handu usikundie.
19Akateta ama kuwondja na kufwa ani enemgura nganyi Izuwa. Ekiteta ama akamburra, Niratere.
20Petro ekigharuka akambona mwanaloshwa emkundie Isa, eratera, eyajwa ghati ya kidjo cha chamagheri mbafuni hakwe, akateta, Bwana niani ekung’ola.
21Ekimbona uu Petro akamburra Isa, Bwana, na uu nikini.
22Akamburra Isa, Nikimkunda uu aikae mtano nikaneze, yakuweze? Uniratere mi we.
23Kikatetwa kiteto iki ghati ya waghenji, ti mwanaloshwa ula tenefwa. Kake temburrie Isa, Tenefwa, kake, nikikunda aikae mtano nikaneze, yakuweze?
24Niye mwanaloshwa ewondja mburi ja ama, akamatama, na uswi tutisiwa ti mburi jakwe jana kididi.
25Henawa mengi meingi emaarehie Isa, namo mekitamwe mose, nahamba ti na masanga mose temefika hena vitamo vinetamwa. Amen.
Currently Selected:
Yohana 21: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
