Mihiro ya Waondo 1

1Kitamo kya kuwoka nikiarehie, Ee Teofilo, kya vyose eviwokie Yesu kuketa na kulosha pia, 2mtano musi ula ekinatikwe wanga, ekinawaaghanye hena Ngoma Mshenete waondo ewasawure. 3Akakuwonya hawo mwenye moo kutera kwa kuwinywa kwakwe, hena marighio meingi, ekiwonwa nawo misi makumanne, ekiteta mburi ya ufumwa wa Izuwa. 4Na ekitorana nawo akawaaghanya wasifume na Yerusalemi, kake wainde lutemiano lwa Apa, “nilo muwurrwe nami. 5Amu Yohana niye ebatiza na mbombe, unywi munebatizwa na Ngoma Mshenete kutera kwa misi si mingi.”

6Amu iyo, wekinawunganyike wakambujanya, wekiteta, Mzuri, Nimo magheri ama uneikaeuhundue ufumwa hena Israeli? 7Akawawurra, Si henyu kutisiwa saa nete magheri, Apa emawikie ghati ya luidimo lwakwe mwenye. 8Kake muneingwa zinya, ekiza Ngoma Mshenete wanga yenyu, na muneoka wang’oli‐mburi wangu ghati ya Yerusalemi, na ghati ya Uyahudi wose, na mtano kuidiwika kwa masanga. 9Ekinatete ivi, wekiyoa, akawushijwa, ijumbi likamwuhia kufuma meso mawo. 10Nawo wekiyoa wanga ekitonga, wandu weri wakawaimukia wenye suke nyewa; 11Wekiteta pia, Wandu wa Galilaya, nini mwaimuka mukiyoa wanga? Uo Yesu, etikwe henyu kutonga wanga, eneza huwo sandu mumbona ekitongawanga.

12Wakahunduka Yerusalemi kufuma nduwi yaitangwa ya zeituni, ioho afuhi na Yerusalemi, mitongie ya sabato. 13Wekinaingie, wakakwea na ghuu, niho wetue, na Petro na Yohana, na Yakobo, na Andrea, Filipo na Tomaso, Bartolomayo na Mattayo, Yakobo wa Alfayo na Siman Zelote, na Yuda wa Yakobo. 14Awa wose weokie wekiikaa hena ngoro mwe ghati ya kuomba, hamwe na wache, Maryamu mee Yesu, na wandwawo.

15Misi ila Petro akaimuka ghati ya wandwawo, akaghamba (matorano ma wandu hamwe sa ighana na makumeri), 16Wome wandwetu, muhaka matamo mafishwe ematetie kuwoka Ngoma Mshenete hena itumbu la Daudi, wanga ya Yuda, eokie mrongoria wawo wemgurie Yesu, 17ti etarwa hamwe na uswi akaingwa ngata ya luindo ulu. 18(Uu akazora mbuwa na kila kyaingijwa hena owiwi; akagwa wushoni, akabajika ghati, ndeni yose ikafuma. 19Ikatisiwika na wose weikee Yerusalemi, mtano mbuwa ila ikaitangwa hena kiteto kyawo Akeldama, niyo Mbuwa ya sakame.) 20Amu itamiwe ghati ya kitamo kya Malumbo,

Kaa yakwe ishighwe,

Nete asioke mundu uko:

nawa,

Kuimukia kwakwe ungi auhe.

21Amu iyo ghati ya wala weraterana hamwe na uswi magheri mose Mzuri Yesu ekinaingie akafuma hetu, 22kuwoka lubatizo lwa Yohana mtano musi ekinatikwe hetu, yambe mwe asawurwe aoke mng’oli‐mburi wa kuruka kwakwe hamwe na uswi. 23Wakang’ola weri, Yusuf eitangwa Barsaba, eingwa izina Yusto, na Mattiya. 24Wakaomba, wakateta, We, Mzuri, utisiwe ngoro ja wandu wose, mbonye ni uhi wa awa weri umsawurie, 25nesa auhe ngata ya luindo na uondo, eisowa Yuda atonge handu hakwe. 26Wakagera zaro, zaro ikamguia Mattiya, akatarika hamwe nawo waondo ikumi na weri.

Currently Selected:

Mihiro ya Waondo 1: TAVETA

Highlight

Copy