Matthew 4

Diabolo Iesu huakara amuraeape

1Ove Veveke Iesu ita merava lai aupe, ehovea diabolo arero kurupaeakive. 2Are hare 40 ila ere erereape, eapai au laila, aireaki are eroa hape. 3Amuraeharae haela arero kai iki maeape, A Aualari ve Akore iele la leikilava, ma have va maeaila, ere pai hovea koelarikive. 4Are kavale maeape, Overa hape oharo maria:

Haela makukuriki eharu eapai hiki va ka,

Aka Aualari ve ape ve horeravahaeaki la oharo oaria.

5Aireaki diabolo haela arero hehe karikara lai aupe, arero Hehe Uvi ve ailoki akea ve aepape. 6Arero maeape, A Aualari ve Akore iele la leikilava, — hoa hareau, ehovea overa hape oharo maria:

Are areve aneru a v'ila maeaeakilai,

Ere aro mai peke paeakive, ave loa oropa have koaki ave.

7Iesu arero kavale maeape, Oharo aeka mari hape: A Aualari ave Amua kamuraealue. 8Diabolo kai arero kela heaikiapo havahu lai pekape. Are arero meahaiapo ve basileia oaria amoeavahaeape, mea ve haharika kara. 9Are arero maeape, A arave oharo iapai la ekaopakilava, ehovea araro morapaeakive, ma eharu oaria ara aro le aiarakilai. 10Iesu arero kavale maeape, Satan, a va ita lahua aula, ehovea overa oharo mari hape:

A ave Aualari Amua hiki morapaeaki,

Areve horova hiki leiki.

11Kahara, diabolo haela arero le harepape. Iapaki — aneru arero kiva leikive ekevahaeape.

Iesu Capernaum, Galilee hoa, hoaupe

12Iesu iapape ere John uvi muru paraeape la hoa, are Galilee aupe. 13Are Nazareth harepai Capernaum ai le aeape, la karikara miri koaka aeave — Zabulon Nathphalim ila ve ukai. 14Ehovea peroveta haela Isaiah maeaeape la oharo iele leikive maria:

15Zabulon Naphthalim ila ve ukai,

Ma haru maeamaea, Jordan la ukai ve,

Galilee haela lahua ve ukai.

16Murumuru apearoape la haela oaria,

Ovava eapapo eavape:

Au apihai ove ve avairoape la haela,

Ovava ere va le horerape.

Iesu iroro horova ipopeavape

17La hoa ve Iesu iroro oharo mari ape, Ikikelavaki — ehovea kaia ve basileia maea iele.

Oropa kilea haela itavavahaeape

18Iesu Galilee ma haru miri ve loa veavelaripe la hoa are apo i heari la eavape, Simon, Peter rare itavape, Andrew areve akoreheari ila, erealila maharu ve keve parae ve laripe, ehovea erealila ekaka haropa haela. 19Are erealilara maeaeape, Araro airekai ekeila, ealila aireaki haela ekaka hovea haropakilai. 20Erealila keve elavelave haitapai arero airekai aupe. 21Are aeka perehekai ai apo i heari lahua la kai eavape, James, Zebedee ve akore, areve akoreheari John ila, erealila oa ila vevaea akea ve ereve keve ura la hahaeavaroape. Are erealilara itavape. 22Erealila kara vevaea oa i hareho harepai arero airekai aupe.

Iesu Galilee loa veavelaripe

23Iesu Galilee hoa veavelaripe, ereve synagogue oharo kileape, basileia ve iroro ape, maea heahaha oaria, kakare oaria kara lei makukurivahaeape. 24Areve hari veveke Syria karikara oaria kopurapape, ere maea heahaha haela lahua lahua oaria, haiaru hekeheke haela oaria, iki haveva haela oaria i epe apo heheva haela oaria ila, arero kai kari ekevahaeape. 25Haela oaria iele hareho areve leia ekevahaeape, Galilee haela, Decapolis haela, Jerusalem haela, Judea haela, Jordan la ukai haela hareho.

Currently Selected:

Matthew 4: ORO

Highlight

Copy