Matthew 3
3
John Baptist ve Iroro
1La hoa John Bapatiso ekepe, Judea ve ita merava iroro ape: 2Areve oharo maria, Ikihelarivahaeaki, kaia ve basileia ekeki maia iele. 3Ehovea ma haela ve hari Isaiah peroveta haela overa hukavape maria:
Ara haroapo ita merava ve hape,
Amua ve okiharo karikikive,
Areve oki pakupaku lei heheapa leikive.
4La haela John ve pura kamela ve koro, areve hopa boromakau iilu erekai hahape: areve eapai paitau, avare ila. 5Jerusalem haela, Judea ita haela oaria ila, areve leia arahavape, Jordan ita eapapo haela oaria kara. 6Are erero oaria bapatiso leivahaeape, ereve mai haeae oaria hihi leivahaeape.
7Are Pharisee haela, Sadducee haela oaria ila eavavahaeape, ere bapatiso leikive ekevahaeape; are erero mari maeaeape, Ekaroa ve akoremari e, ero leita kileape aireaki ve hihiri ve oaoka lei hukaukive ha? 8Eve mai heaha ve ikihuru hihi leivahaeaki: 9Iki ureve mari kakekelarue, Elave oa Abraham me aeave. Ara ero maeaeaive — Aualari ma have la akoremari hovea karikiki ore, Abraham ve. 10Ma hoa, ila kora elele ve aeave — ehovea hae veveke horeraki aue la kora ere hahaeaki a le aroukilai.
11Ara o iele ero ma ve bapatiso leikive, ehovea e ikihelarikive — aka araro aireaki ekeki la haela are va aheke, ara va mahuka, ara areve loa hara ve iilu la helaukaki hovea ka. Are ero Ove Veveke ila bapatiso leivahaeakilai, a ila kara. 12Veveo ve papahi areve mai ve le aeave, are areve ruha auhohi huhelakilai, areve wheat — uvi la korukaiakilai. Wheat ve eroe are a aroukilai, la a huhura va ka.
Iesu ve bapatiso hoa
13La hoa Iesu Galilee harepai Jordan kai ekepe ehovea John arero bapatiso leikive. 14John arero maeape, Arekaea — ara va ikikekela a araro bapatiso leila — ehovealeve a va ara kai leikila ha? 15Iesu arero kavale maeape, Heroe, mahau leikive, ehovea maria leikive mai ehoe iele leikive. La hoa are leipe. 16Are Iesu bapatiso leipe la hoa, Iesu ma ve ehoe pekape. Iapaki, kaia are ve hapape, are Aualari ve Ove, hihi hovea kihoai la eavape, areve akea ve epavape. 17Ara kaia ve hape maria, Maia ara iki Akore havahu, ara are v'ila ikiveveke leivila.
Currently Selected:
Matthew 3: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
