Matthew 12

Sabati kiva leiki mai

1Sabati hare aeva Iesu wheat oru ure araeape: areve kilea haela eroa hai la wheat hae ikaeai lalavahaeape. 2Pharisee haela erero eavape la hoa ere arero mari maeape, Iapaki, ave kilea haela sabati hare ve pupu hararuaro. 3Are erero kavale maeaeape, E va David leipe la mai au mureaila ha? are eroahape la hoa, are kake haela ila? 4Are Aualari ve uvi pekape, leia Aualari avarape la pai lape, la pai ehovea are areve kake haela ila pupu ila, oharo haela hiki laralula la pai. 5E va pupu buka ma oharo au mureaila ha? Sabati hare oharo haela Hehe Uvi hararualula, haeae va ka; 6Ara ero maeaeaive — Ma ita Hehe Uvi akea ve haela me aeave. 7E va ma oharo ve iele ore overa la leikilava: Ara va ikiheroe mai ikivere, ara va maea morava mai ikivere va ka: e va haeae karia la haela o heaha au eila. 8Haela ve Akore kara, sabati hare ve Amua.

Horo au hareavape haela

9Are leia harepai synagogue pekape. 10Iapaila, leia horo au hareavape haela haroapo epavape — Ere Iesu apevelavela leipe maria: Lehae ha? Sabati hare maea heaha veveke leiki, pupu karia ha? Ehovea ere ikivere arero oropai maeakive. 11Are erero kavale maeaeape, Eve haela haroapo aeva leita ha, areve mamoe haroapo sabati hare koru ve ra oaukilava, are arero paeai hareava va ka ha? 12Haela mamoe hovea va ka ha? Laelave, sabati hare, mai veveke leikive, heroe, pupu karia. 13Are la haela maeape, Ave mai horapa — are mai horapape, la mai veveke le leipe, mai ukai hoveahovea.

Pharisee haela Iesu harive oki haropape

14La hoa Pharisee haela hoahukai arero harive oharo hukavape.

15Iesu la oharo ore lei la ita le harepape — haela oaria arero airekai auvahaeape, are erero oaria lei makukuripe. 16Are oharo mari maeaeape — areve rare hihi kailue. 17Ehovea peroveta haela Isaiah maeaeape la oharo iele leikive, maria:

18Iapaila, ara va ikivere leipe horova haela,

Arave ikivere iele leivila haela ma,

Arave ove ara arero avarakilai,

Are heheavaki mai veveke ita lahua haela amoeakilai.

19Are hahari lei va ka, hi kara e va ka,

Areve āra kara haela karikara hihi ve iapa va ka.

20Are hirivo haihaharoa haika va ka;

A hari are huhurapa va ka,

Aiai are heheavaki oharo paraeai areve iri haela le heaorapakive.

21Ita lahua haela areve rare ikikekelakilai.

Iesu Satani arero koarape la opore oharo ve kavale

22Ere ovehahu ila, ovohae kariri, ikihaveva ila haela ae areve leia lai ekepe. Are arero lei makuripe, lai vi va ovohae kariri ikihaveva ila la haela ovohae kohelaukai oharo auhohi le ape. 23Haela oaria ikihorahora eapapo leivahaeape kai mari avahaeape, Maia David ve meavore ka ha? 24Pharisee haela la oharo iapai mari maeaeape, Ma hilavila ovehahu haruapavila, ehovea Beelzebub ovehahu ve amua ve aheke. 25Iesu ereve iki kelava ore lei erero mari maeaeape, Elarelare hahari leivila la basileia are va heaha leikilai — kai elarelare leivila la karikara aka uvi, are lahua epava va ka. 26Satan kai Satan havahu ra avakakilava, are elare hahari hiki leivila, ehoveala, areve basileia leari le epavakilai ha? 27Ara va Beelzebub ve aheke ve ovehahu ra haruapakilava, eve akoremari ehovea leita ve aheke ve ovehahu haruapalula ha? Laelave ere ero heheavakilai. 28Ara Aualari ve Ove ve ovehahu ra haruapakilava, Aualari ve basileia eve ita ve kihorerave. 29Haela aheke ve uvi pekaki areve eharu korea kaivaki ikivere la haela, are oropa la haela aheke mai hahakilai, aire areve uvi eharu korea aeakilai. 30Araro koaraki aue la haela are va ara i iri haela: Ara ila hareho aeaki aue la haela, are va noaenoae havoavi veakilai. 31Ehoveala ara ero maeaeaive, mai haeae oaria, oharo heaha oaria ila haela ve le hapururukakilai. Ove Veveke ve avahaeaeaki la oharo heaha aireaki hapururuka va ka. 32Haela ve Akore ve o heaha maeaeaki la haela ereve la haeae lei hapururukakilai, aka Ove Veveke ve o heaha avahaeaki la haela ereve la haeae ma meahaiapo hoa ve leia hapururuka va ka.

33Kora veveke ra leikilava, areve hae kara veveke leikilai, aka e va kora ra hararuakilava, areve hae kara heaha leikilai, ehovea haela kora areve hae ve oki ore leikilai. 34Ekaroa ve akoremari e — ehovea e va haela heaha, e va oharo veveke leari arila ha? Ehovea eve iki heloekoape la oharo eve ape ve kihorerakilai. 35Haela veveke areve iki ve erohoho eharu veveke aikihorerakilai: Haela heaha areve ikiheaha erohoho ve eharu heaha aikihorerakilai. 36Kahara: ara ero maeaeaive, Haela ve noaenoae oharo oaria aireaki heheavaki hoa ere kavale le leikilai. 37Ehovea eve oharo ero lei makukurikilai, aka eve oharo ero lei heaha leikilai.

Are ihova avara va ka

38La hoa uku pupu haealula haela Pharisee haela ila kavale mari maeape, Haelapo, ela va ikivere a ihova haroapo elave oropa ve leikive. 39Are erero maeaeape, Ma vilakao heaha airi pavora leilula vilakao, ihova au haroparo, ere va ihova aea va ka, peroveta haela Jonas la ihova hiki. 40Hoveahovea Jonas hare 3 oroa 3 hevehe ve eharau ureve aeape, lahovea haela ve Akore kara hare 3 oroa 3 mea ureve aeakilai. 41Ninevah haela, heheavaki hoa urahukakilai, ma vilakao heheavi heaha kavale leivahaeakilai, ehovea ere Jonas ve iroro ve iki le helarivahaeape — kahara ma hoa Jonas ve akea haela me aeave. 42Diho hoa ve amua uamari heheavaki hare uroukilai, ma vilakao heheavi heaha kavale leikilai, ehovea are apehai ve ekepe Solomon ve ikiore oharo iapakive — kahara, ma hoa Solomon ve akea haela me aeave.

Ikikekela mahuka ve heraho

43Ovehahu haela ve ureve ra harepakilava, are ita kakarara oaria loa veavelari ikiparaeaki ita haropakive, are koara va ka. 44La hoa areve oharo maria, Ara harepape la uvi ara helari aeka pekakilai. Are horerakilai, kai uvi haua ka, overa hoapai, veveke iele eavakilai. 45Are aukilai ovehahu 7 ila heaha iele karakilai. Ere va hareho la uvi pekahavi apeakilai. La haela ve aireaki hoa heaha havahu iele, oropa hoa hovea ka.

Apavara mai iele

46Are haela oharo kileape la hoa areve lou i malaita ila mahokaea ve epavape, ehovea ere va ikivere arero oharo maeakive. 47Haela ae arero maeape, Iapai, ave lou i apavara ila mahokaea le apearo. Ere va ikivere aro oharo maeakive. 48Are arero oharo maeape la haela kavale maeape, Arave lou leita ha? Arave apavara leita ha? 49Are mai horapai kilea haela oaria mai ove aioeape, kai mari maeape, Iapai — arave lou i apavara ila mae. 50Arave kaia ve Oa ve ikivere horova leilula la haela ere va arave apoheari, arave mariloa, arave lou kara.

Currently Selected:

Matthew 12: ORO

Highlight

Copy