Matthew 11

1Iesu areve kilea haela 12 kileaki oharo kari leipe la hoa, are leia harepape, karikara oaria iroro avi aupe.

John Baptist

2John uvi muru hoa Keriso ve horova veveke ve hari iapape, are kilea haela uku arero kai paparaehape. 3Are velavela mari leipe, Ava ekeki rare aroape la haela ha, aka ela va haela aea haropakilai, ha? 4Iesu kavale mari maeape, Auila, e la iapaila kai laeavila la eharu oaria John ra kileaki. 5Ovohae kariri haela ovohae kohehe?-?laukalula, loa hahaeae haela loa ehohoe leilula, leper haela lei mekaka leivahaelula, avako ipi hahuru haela oharo iapailula, apihaea haela lei ovokake leivahaelula, merava haela iroro oharo iapailula. 6Ara ve hilauki aue la haela ikiveveke ila.

7Ere auvahaeape la hoa Iesu John ve oharo mari hukavape, E va ita merava arahavape ehovea le eharu ovohae eavakive ha? Mea vavaraki hirivo ha? 8Aka learia eharu eavaki ve arahavape ha? Pura mahuka oraki la haela ha? Iapai: pura mahuka oreauki la haela oaria amua haela ve uvi hiki apealula. 9Aka le eharu eavaki arahavape ha? Peroveta haela ha? Kaire, ara ero maeaeaive — are peroveta haela oaria akea ve. 10Ma va ere overa oharo hape la haela — maria, Iapaki — arave ape haela ara oropa mave paraeaive, are ave oki karikikilai. 11O iele, ara ero maeaeaive, Uavila erape haela oaria ere John Bapatiso aire ve. Kahara, ara ero maeaeaive, Kaia ve basileia ve ipi havahu haela areve akea ve. 12John Bapatiso hoa aiai ma hoa kaia ve basileia huveravaki mai avavila: haela aheke arero huverava hiki. 13Ehovea peroveta haela oaria pupu oaria ila peroveta oharo ape aiai John ve hoa. 14E va ma oharo iki ra kelavakilai, ma haela, rare Elia, ekeki rare avi ape la haela. 15Avako ipi haela, iapakive heroe.

16Ara va ma vilakao va learia maeaeakilai ha? Are va akoremari titaeka hovea: la akoremari va karikara hihi avai, kake haela itavava?-?haearo maria:

17Ela va meovo lahohoaila, e va mahea va au harapukue:

ela va ikihuru laleivahaeaila, e va hivavara au avahaeaila.

18Ehovea John ekepe hoa are eapai ma ila au laila — kai ereve oharo maria, Are va ovehahu ila. 19Haela ve Akore ekepe hoa, are va eapai ma ila lape, kai ereve oharo maria, Ovohae eavaila — e lahua haela, uaina oaria ikivere haela ma, tax korukaia haela i mai haeae haela ila ve kake ma. Kahara, ikiore mai veveke leivila ehovea areve akoremari ve.

Ikikelavaki aue karikara

20Are horova eapapo leivahaeape la karikara oaria ve are hihiri oharo ape, ehovea ere va iki iele au kelavaila. 21Oea, Chorazin e, oea, Bethsaida e, eve leia leivahaeape la horova ehoaha oaria Tyre i Sidon ila ve la leivahaeakilava, erealila pute a hurae ila iki overa ra kekelape. 22Ara ealilara maeaeaive — aireaki heheavaki la hare ve, Tyre i Sidon ila perehekai veveke leikilai, ealila va heaha hiki koarakilai. 23A kara, Capernaum, a va ma hoa kaia ve le pekakive, a va aire Gehena ve hoa lei hoaukilai. Ehovea ave leia leivahaeape la horova ehoaha Sidon ve ra leivahaeakilava, are aiai ma hoa havahu veveke hiki. 24Aka ara ero maeaeaive — aireaki heheavaki hoa ve, Sodom perehekai veveke koarakilai, e va heaha hiki koarakilai.

Akore hekai hovea la ikikekela

25La hoa Iesu mari ape, Oa e, kaia meahaiapo ila ve Amua, ara aro thankyou oharo ave ehovea ma eharu oaria ikiore maea hahe?-?hahe haela oaria a va au kileaila: a va ma eharu akoremari titaeka hiki la amoeavahaeape. 26Lae vi va, Oa e, ehovea ave ikikekela, laria veveke.

Iesu havahu ve horova okoare

27Arave Oa eharu oaria araro aikiarape. Haela ae Akore va haveva, Oa hiki ore. Ae va haela Oa kara haveva, Akore hiki ore, ae ka Akore amoeaki ikivere la haela. 28Horova oaria haela, eharu mehau orai auki haela oaria, araro kai ekeila, e v'iki arave oki paparaehakilai. 29Arave e mehau oreai aukive, arave oki ore leikive: ehovea ara va maraha, iki here ila. E va ove ve ikipaparaehakilai. 30Ehovea arave oraiavaki kora heraho ka: arave eharu kara koraoka hiki.

Currently Selected:

Matthew 11: ORO

Highlight

Copy