Luke 21
21
Uva maitava ve meru hekai
1Are ovohae iupe erohoho haela oaria elare meru meru kohu au koavalula eavape. 2Are kai uva maitava merava have titaeka orahokaila paraila eavape. 3Are mariape, O iele ara ero maeaeaive, ma uva maitava merava meru oaria laparaeaila, ere oaria ka perehekai hiki. 4Ehovea ere oaria erohoho v'ila uku laparaeaila, aka areve eharu perehekai, laelave areva hoa haroapo le laparaeaila.
Jerusalem ve karia leiki hoa: Mea aeaki hoa kara
5Haela uku Hehe Uvi v'ila oharo hukavape, areve maupa veveke, have oaria, i meru oaria ila. 6Laelave are maeaeape, E eavavahaelula ma eharu oaria, hare ae kihorerakilai, ma have ae have ae akea ve aea va ka, ere oaria aire kihohoakilai. 7Ere arero velavela leipe, Laelave, ma eharu leahau leikilai ha? 8Are maeape, Kiva leila, haela ero oki haeae kari auvahaeaki ave. Ehovea haela oaria arave rare v'ila ekevahaeakilai: ere kai maria maeaeakilai, Ara ma! kai, Hoa iele ma! E va ereve airekai kauvahaealue! 9E va mare i hahari oaria ila ve hari la iapakilava, e va oaoka kalailue — ehovea ma eharu iele oropa kihoreavakilai — aka leia karia leiki hoa va ka.
10Are erero maeaeape, Vilaipi ae vilaipi aeva mare leikilai, basileia ae va basileia ae va hahari arilai. 11Meapuipui ehoaha kihoreavakilai, ita uku hohera eapapo i maea heaha oaria ila leivahaeakilai. 12Aka ma eharu aireaki, ere va oropa ero mai papaehai hararuakilai, ere ero synagogue i uvi muru ila paparaehakilai, ere ero amua i gavana haela ila oropa ve arave rare v'ila kari auvahaeakilai. 13Are va e v'ila ihova veveke leikilai. 14Laelave eve iki aheke leila, e v'aire arilai la oharo oropa kakelavarue. 15Ehovea ara ero ape oharo i ikiore ila aiarakilai, la ikiore eve iri haela ero hereava kavale maeaeakive hovea leivahaea va ka. 16Aka iele, eve oalou haela, apoheari, apavara, kake haela ila, ero hihila epeaukilai. Ere eve uku haela haeakive aiarakilai. 17Haela oaria ero ikihairhairi eapapo leivahaeakilai, ehovea arave rare v'ila, 18Aka eve haro koro haroapo havoava va ka. 19E va auhohi la leivahaeakilava, e va elare ove lei makukurikilai.
20E va mare arula haela oaria Jerusalem helari hupakai la eavakilava, e va ore leivahaeakilai, areve heaha leiki hoa maea iele. 21La hoa Judea apealula la haela oaria kela ve hukauki, areve aru hihi ve apealula la haela elavelave auvahaeaki: kaipu apealula la haela karikara kihoreava va arekaea. 22Ehovea ma hare va kavale heaha avaraki hare, ehovea overa hape la oharo iele le horerakilai. 23Ikihuru hela ehovea akoremari i avae laralula akoremari ila la uavila: ehovea ita oaria hareho heraho eapapo leivahaeakilai, kai haela oaria va hihiri le koarakilai. 24Haela erero lelao mare haeakilai, ere erero ita lahua oaria horova ve paparaehakilai. Ita lahua haela kara Jerusalem loa huharakilai, aiai ita lahua haela ve hoa hoveahovea leikilai.
25Hare i papare i kou ila ihova hihika amoeakilai, meahaiapo kara vilaipipi oaria ve heraho eapapo leivahaeakilai, ikihorahora, ehovea ahea ma ve eara hovea, kai ma ve aroaro eapapo iele. 26Haela meahaiapo ve kihoreraki la heaha la kelavakilava oaoka lei apihaeakilai, ehovea kaia ve aheke lalaeapakilai. 27La hoa ere Aualari meuru ureve aheke i haharika veveke ila ma kihoaila eavakilai. 28Ma eharu ipopeavaki la hare e va ovohae iupeki, haro urai akea ve eavakilai, ehovea eve ovokake leiki hoa kikoreraki maea iele.
Haela oaria kiva auhohi leivahaeaki
29Are erero parabole oharo maeaeape, Lauka kora eavaila, kai kora oaria kara. 30Ereve rorore hulahoreavakilava, e va eavi ore leiki, hitolo hoa maea iele. 31E kara laria — E va ma eharu la eavakilava, e va ore leikilai Aualari ve basileia kihoreraki maea iele. 32O iele ara ero maeaeaive — ma vilakao karia lei va ka aiai eharu oaria hoveahovea kihoreavakilai. 33Kaia i meahaiapo ila karia leikilai, aka arave oharo karia lei va ka.
34E va ere kiva leiki, e va eapai i ma ila lalavahaelula i meahaiapo ovokake ve heraho ila iki heraho leiki ave, la hoa eve oropa ve muruhari kihoreraki ave. 35Ehovea are meahaiapo apealula haela oaria ve laria leikilai. 36E va mea oaria kiva hiki leila, ivaiva ila, ma aireaki kihoreavaki eharu heaha oaria ero hararuaki ave. Laelave e va aireaki haela ve Akore ve oropa ve epavakive hovea leikilai.
37Are hare oaria Hehe Uvi ureve kiriveape. Oroa oaria are mea hoai kela rare Olivet pekai aeveape. 38Haela oaria vevelare iele Hehe Uvi ve pekahavi areve oharo iapakive.
Currently Selected:
Luke 21: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
