Luke 20

Iesu ve aheke lahoa ve?

1Iapai, hare ae are haela oaria Hehe Uvi ureve kileavahaeape kai oharo veveke iroro ape. Oharo haela i hohoa haealula haela i haela hoaha ila areve leia ekevahaeape. 2Ere arero mari maeape, Elaro kimaeaeaki — ave ma horova ve aheke a lahoa la avape ha, aeva la aheke aro leita avarape ha? 3Are erero kavale maeaeape, Ara kara ero apevelavela leikilai; e va araro kimaeaki: 4John ve bapatiso, are kaea akea ve ha, aka haela ve ha? 5Ere elare iki maria kelavape, Ela va arero la kaea akea rare la maeakilava, are elaro kimaeaeakilai — ehovealeve e va au kelavaila ha? 6Ela arero haela ve la maeakilava, haela oaria elaro have koavakilai, ehovea haela oaria ve ikikekela John va peroveta haela. 7Ere kai arero kavale maeape, Ela ore va ka are va lahoa ve. 8Iesu kai erero maeaeape: Ara kara ero maeaea va ka arava le la aheke v'ila ara ma horova leivahaevila.

Vine oru ve parabole

9Are haela oaria parabole oharo kileakive ipopeavape, Haela ae vine aru aporai kiva haela uku aiarape: are kai ita lahua aupe. 10Hae hovare hoa are horova haela ae paraeape, ehovea ere arero vine hae uku aiarakive. Aka la kiva haela arero haru koavi maea ka le avakape. 11Are kai horova haela aeva paraeape — ere arero kara haru ha maea hararua maea ka le avakape. 12Are haela aeva paraeape — ere arero kara kakare eapapo koa huikapai paraeape. 13Vine oru ve amua maeape, Ara learia leikilai ha? Ara ara iki havahu akore ereve leia paraeakilai: ere arero auhohi leikilai la. 14Aka la kiva haela arero eavi elare iki mari kelavape, Ma va akore koare. Ela arero harilai, aireaki haruku ela le avakilai. 15Ere arero aru mahokaea ve huikapai paraeai huru le hape. Vine aru amua erero learia leikilai ha? 16Are iki la kiva haela heaha la haeakilai; vine aru are haela lahua avarakilai. 17Aka are erero ovohae eavi mari maeaeape, Hohoa leari hape ha, Uvi kupe haela haure leipe la have are va uvi ve ive le leipe? 18Haela la have akea ve la oaukilava, la haela ve maea kopepekea pekai le leikilai. Aka la have haela ve akea ve la oaukilava, la haela ve maea kekele hovea haipepekeakilai.

Tax ve oharo

19Hohoa haealula haela i oharo haela ila arero mai paeakive oki haropape: aka ere va haela oaria oaoka leivahaeape, ehovea ere iapape are ma parabole erev'ila maeape. 20Ere arero ovohae kiva leivahaeape, kai opore haela muruhari paparaehape: la haela ereve ape hiki ehoe oharo hukavavahaeape, ehovea ere ikivere areve oharo haeae amoeakive, arero gavana haela ve pupu ve kaivi heheavakive. 21Ere arero apevelavela leipe, Haelapo, ela va ore ave kilea oharo iele ehoe hiki, a haela ae va aheke kekela va ka, aka iele havahu Aualari ve oki kileavila. 22Lehae, pupu ila, aka ela v'ila pupu ka, Caesar tax avarakive, aka avara va ka? 23Aka are ereve amuraeape oharo ikikekela erero mari maeaeape, 24Penny haroapo araro avikiaraila: Ma ove i hohoa ila leita ve? Ere maeape, Caesar ve. 25Are erero maeaeape, Caesar ve eharu Caesar aiaraki: Aualari ve eharu Aualari aiaraki. 26Ere va la oharo haela ve oropa ve haeae leikive ore au leila. Ere va ikihorahora eapapo areve la oharo v'ila, kai ereve oharo kari le leipe.

Api kai urouki ve oharo

27Sadducee haela uku kara ekevahaeape. Ere ve hukavalula oharo maria — apihaeaki haela aireaki urahuka va ka: ere va arero velavela maria leipe, 28Haelapo, Moses elav'ila maria hape, Uva ila haela la apakilava, akoremari kara karia va laila, areve akoreheari la uva laeai areve akoreapo v'ila akoremari erakive. 29Apoheari 7 ila apearoape. Akoreapo uva lae le apape, akoremari karia. 30Areve akoreheari, kai areve akoreheari kara, la uva maitava laeape. 31Apoheari oaria apihaeai karia le leivahaeape, akoremari karia. 32Aireaki uamari kara le apape. 33Laelave, apai kai urahukaki la hoa areva leita haela ve uva leikilai ha? Ehovea haela 7 ila arero laeape.

34Iesu erero maeaeape, Ma meahaiapo ve akoremari uavila maepai karalula. 35Aka la aireaki basileia hovea leilula haela ere va uavila maepai kara va ka. 36Ehovea ere va aneru hoveahovea, ere va Aualari va akoremari, ehovea ere va apihaeai kai urahukape akoremari. 37Aka, apihaealula haela aireaki urahukalula, Moses kara huakara ve hihika amoeape — la hoa are Amua, Abraham i Isaac i Jacob ila ve Aualari rare itavape. 38Kahara, are apihaeape haela ve Aualari ka, aka ovokake haela ve, ehovea are v'ila haela oaria ovokake leilula. 39Hohoa haealula haela uku kavale maeape, Haelapo, ave oharo veveke lalaila. 40Ehovea ere arero aeka velavela leikive oaoka leivahaeape.

Iesu David ve meavore ha?

41Are erero maeaeape, Ere va leari arula Keriso va David ve Akore leive ha? 42Ehovea David havahu Psalm buka maria maeape:

Amua arave Amua maeape,

Arave mai ore ukai ve haiavaki,

43Aiai ara ave iri haela ave loa epavaki haha la karikikilai.

44Laelave David arero Amua rare itavavila, aka are va learia areve akore leivila?

Hohoa haela ve mai kiva leiki

45Haela oaria ve oropa ve are hihika areve kilea haela maeape, 46E va hohoa haealula haela ve mai kiva leivahaeaki — ere va ikivere pura heahapiki oreai loakive, kai karikara hihi elare momorapuki oharo ikivere eapapo leilula: ere kai synagogue ureve oropa ve la ita avakive ikivere, kai hurai hoa ve akea ita avakive ikivere. 47Ere va uavila maitava ve eharu korea leivahaelula, kai opopoe ivaiva oharo heaikiapo avahaelula. Ma haela va aireaki heheavaki hoa heaha kavale le avakilai.

Currently Selected:

Luke 20: ORO

Highlight

Copy