Genese 46

Iakobo i lalava haela ila Aigupito ve hahi

1Iseraela i areve eharu oaria hareho ila hahi lei Beera‐sieba leia ekepe; are leia areve oa Isako ve Aualari v'ila maea morava leipe. 2Aualari oroa hoa ivahi ureve Iseraela maria maeape: “Iakobo, Iakobo!” Are maeape: “Ara ma!” 3Are maeape: “Ara Aualari, ave oa ve Aualari; a Aigupito hoaukive oaoka kalailue; ehovea ara leia a v'ila vilaipi eapapo leikilai. 4Ara a i hareho Aigupito leia hoaukilai; ara kai aro aeka lai kihoaukilai; Iosepa ve mai ave ovohae apukilavakilai.” 5La hoa Iakobo Beera‐sieba hakurepape. Iseraela ve akoremari ereve oa Iakobo kai ereve akoremari titaeka i ereve uavila ila Parao ere v'ila paparaehape la wagon ureve oraeavi auvahaeape. 6Ere Kanana hoa koaravahaeape ereve animala i eharu ila kara Aigupito leia aiauvahaeape, Iakobo i areve meavohula oaria ila, 7areve akoremari, areve meavohula, areve marita, kai meavohula marita ila, areve lalava haela oaria hareho, are are i hareho Aigupito kari hoahukape.

8Aigupito hoahukape Iseraela ve meavohula ve rare ma: Iakobo i areve akoremari ila; Reubena, Iakobo ve akore koare; 9Reubena ve akoremari: Hanoka, Palu, Heserona, Karemi ila. 10Simeona ve akoremari: Iemuela, Iamini, Ohada, Iakina, Sohara, kai Kanana uamari ve akore Saulo ila; 11Levi ve akoremari: Geresona, Kohata, Merari ila. 12Iuda ve akoremari: Era, Onana, Sela, Peresa i Sera ila (Era i Onana ila Kanana leia apihaeape); Peresa ve akoremari va Heserona i Hamula ila: 13Isakara ve akoremari: Tola, Puva, Iopa i Simerona ila. 14Sebulona ve akoremari: Sereda, Elona i Ialeela ila: 15(Ma va Lea Padana‐arama Iakobo ve erape akoremari, areve mari Dina kara: areve akoremari i marita ila hareho ve numera 33 ila); 16Gada ve akoremari: Sipiona, Hagi, Suni, Esebona, Eri, Arodi i Areli ila. 17Asera ve akoremari: Imina, Isiva, Isuvi, Beria, i ereve mariheari Sera ila. Kai Beria ve akoremari Hebera i Malakiela ila: 18(Ma va Labana areve mari Lea avarape horova mari Silipa ve akoremari, ma akoremari are Iakobo ve erape, ere haela 16 ila). 19Iakobo ve uamari Rahela ve akoremari: Iosepa i Beniamina ila. 20Iosepa Aigupito ita erape akoremari: Manase i Eparaima ila; Potipera Ona ve oharo haela ve mari Asenata ma akoremari v'ila erape. 21Beniamina ve akoremari: Bela, Bekera, Asebela, Gera, Naamana, Ehi, Rosi, Mupimi, Hupimi i Arida ila. 22(Ma va Rahela ve akoremari, Iakobo v'ila erape, hareho 14 ila.) 23Dana ve akoremari: Husima. 24Napatali ve akoremari: Iaseela, Guni, Iesera i Silema ila. 25(Ma va Labana areve mari Rahela avarape horova mari Biliha ve akoremari, are Iakobo v'ila erape; haela hareho 7 ila). 26Iakobo i hareho Aigupito hoahukape meavohula oaria hareho va 66 ila. (Iakobo ve akoremari ve uavila ma numera ure va ka). 27Iosepa ve Aigupito ureve erape akoremari va orahokaila. Aigupito hoahukape Iakobo ve uvi haela oaria va 70 ila.

Iakobo i areve lalava haela Aigupito leia

28Are Iuda Iosepa ve leia oropa paraeape, Gosena la ita ve oropa aukive; ere Gosena la ita ve leia ekevahaeape. 29La hoa Iosepa areve kariota karikiki Gosena leia aupe, ehovea areve oa Iseraela leia koarakive; are areve oropa ve epavi, arero arahu hahavi hi eapapo le ape. 30Iseraela Iosepa maeape: “Arave ma hoa apakive heroe, ehovea ara ave oropape laeavila, kai ara v'ore iele a va ovokake ila.” 31Iosepa areve apoheari i areve oa ve lalava haela maeaeape: “Ara pekai Parao maria maeakilai: ‘Arave Kanana apearoape apoheari i oa ve lalava haela oaria kihoahukape. 32La haela va mamoe kiva haela, ehovea ere va animala oaria kiva leivahaeroape. Ere ereve mamoe oaria i boromakau i ereve eharu oaria ila aikihoahukape.’ 33Parao ero itavavahaeaki maria la maeaeakilava, ‘E va le horova leilula haela?’ 34E va maria maeaki: ‘Ave horova haela ereve titaeka hoa ikiki ma hoa animala kiva leivahaeaki haela.’ Laria e va Gosena la ita apeakilai; ehovea Aigupito haela oaria mamoe kiva haela oaria ikihairihairi leilula.”

Currently Selected:

Genese 46: ORO

Highlight

Copy