Genese 45

Iosepa apoheari oropa ve lei ore leivahaeape

1La hoa Iosepa arero helari hupakaeape la haela oaria ve oropa ve areve ikihuru kokaukakive ore au leila; are kai hi ape, “Haela oaria araro hakurepaila.” Laelave, are areve apoheari arero lei ore leipe la hoa, leia haela karia. 2Are hi eapapo ape, laelave Aigupito haela kai Parao ve uvi haela kara iapape. 3Iosepa areve apoheari maeaeape: “Ara va Iosepa! Arave oa ovokake aeavila ha?” Aka areve apoheari arero kavale maeaki hovea ka, ehovea ere areve oropa ve iki horahora leivahaeape.

4Laelave, Iosepa areve apoheari maeaeape: “Araro maeamaea ekeila, ara ero here leive.” Ere maeamaea auvahaeape. Are erero maeaeape: “Ara e va Aigupito ilaea leikive paraeape la akoreheari Iosepa. 5Aeka ma hoa iki heraho kai elare hihiri kalaivahaelue, ehovea e araro maia ilaea leikive paraeape; ehovea Aualari araro eve oropa ve paraeape, ehovea haela lei ovokake leivahaeakive. 6Ehovea ma hohera hoa va hitolo orahokaila hiki overa; aireaki hitolo 5 ila apearo, aporaki horova i ikaeaki horova karia. 7Aualari araro eve oropa ve paraeape, ehovea meahaiapo hoa ve uku haela lei ovokake leivahaeakive, kai e v'ila kepea haela lei makukurikive. 8Laelave, e va araro au kiparaeaila, aka Aualari hiki, kai are va araro Parao ve oa hovea, areve uvi kiva haela i Aigupito ve ita oaria ve amua ila leipe. 9E va arave oa ve leia elavelave auvahaeakive, kai arero maeaki: ‘Ave akore Iosepa ve oharo maria, Aualari Aigupito ita hareho ve amua leipe; arave maia kihoaukive, haiapo kalailue; 10a va Gosena la ita aeakilai, a va araro maeamaea aeakilai, a kai ave akoremari kai ave meavohula, kai ave mamoe i nanikosi i ave eharu oaria ila. 11Leia ara ero kiva leivahaeakilai, ehovea hohera hitolo kepea 5 ila apearo; a i ave lalava haela oaria i eharu ila merava leivahaeaki ave.’ 12Mahau e ovohae eavaro, kai arave akoreheari Beniamina mave eavave, arave ape havahu ma oharo ero maeaeaive. 13E va arave Aigupito ureve ma haharika arave oa kileaki, e kai ovohae eavavahaeaki la eharu oaria. Elavelave, arave oa maia lai kihoaukive.” 14La hoa are areve akoreheari Beniamina arahu hahavi hi le ape, Beniamina kara areve karave hahavi hi ape. 15Are areve apoheari oaria ape popoavi hi ape; aire areve huhohoaha are i oharoharo hukavape.

16Parao ve uvi haela oaria oharo iapape maria: “Iosepa ve apoheari leikevehaeaila,” la hoa Parao i areve koaravahaeaki haela ila iki veveke leivahaeape. 17Parao Iosepa maeape: “Ave apoheari maeaeaki ‘Maria leivahaeaki, eve asini akea ve eve eharu hahaeai Kanana la ita helari auvahaeaki. 18Eve oa i lalava haela oaria ila karai arave maia ekevahaeaki, ara ero Aigupito ve ita veveke ae avarakilai, e va mea ve eharu kapare lalavahaeakilai.’ 19Erero kai ahilaki, ‘Maria leivahaeaki, Aigupito ve hahi leiki wagon aiaukive, ehovea eve akoremari titaeka i uavila ila, eve oa i hareho ila kari ekevahaeaki, 20eve eharu ve iki heraho kalaivahaelue, ehovea e va Aigupito ve eharu mekaka oaria aeakilai’.”

21Iseraela ve akoremari laria leivahaeape. Iosepa erero hahi leiki wagon, Parao ve la oharo hovea, aiarape, aeka hahi ve eapai hovea. 22Are erero haroapo haroapo maupa pura aiarape; aka are Beniamina silver moni 300 i maupa pura 5 ila aiarape. 23Are va areve oa ve paparaehape eharu maria: are Aigupito eharu mekaka maeakoko, asini 10 ila ve mehau kaivaki hovea, kai koni i bread ila maeakoko, asini abu 10 ila ve mehau hovea, kai oa ve hahi ve eapai maeakoko. 24Are areve apoheari paparaehape, kai ere auvahaeape la hoa are maria maeaeape: “Okiharo auvahaeaki hoa ape hahari kalaivahailue.” 25Laelave ere Aigupito hakurepai Kanana ve ita, ereve oa Iakobo ve leia, pekahavape. 26Ere arero maeape: “Iosepa ovokake ila. Are Aigupito ita oaria ve amua.” Are iki le ihape, ehovea are ereve oharo iki au iapaila. 27Aka ere Iosepa erero maeaeape la oharo oaria arero kileape, kai Iosepa arero hukapaki la wagon oaria ovohae eavape la hoa, ereve oa, Iakobo, ve ove lei aheke leipe. 28Iseraela maeape: “Kahara; hovea! Arave akore Iosepa ovokake ila, ara arero oropa eavakilai, arava aireaki apakilai.”

Currently Selected:

Genese 45: ORO

Highlight

Copy