Genese 34
34
Dina ve korea ve la kavale
1Lea Iakobo ve epape la mari Dina, la ita ve marita ovohae eavakive hoaupe. 2Hivi haela Hamora ve akore Sekema, la ita ve amua haela, arero eavape la hoa, are arero mai paeape; are are i hareho uavi arero lei makiri leipe. 3Are va Iakobo ve la mari Dina ikiheroe eapapo leipe; kai are arero ikivere leiki oharo veveke maeape. 4Laelave Sekema, areve oa Hamora maria maeape: “Ara v'ikivere ma mari arave uva ve laeakive.” 5Iakobo ore leipe, are va areve mari Dina lei haiae leipe, aka areve akoremari va mamoe i nanikosi ila kaipure leia kiva leivahaeape, laelave Iakobo oharo au maeaila aiai ere kihoreavape. 6Sekema ve oa Hamora iki Iakobo ve leia are i oharo hukavakive. 7Iakobo ve akoremari la oharo iapape la hoa ere kaipure ve kihoreavape, la haela ikiheaha leivahaeai hihiri eapapo leivahaeape, ehovea are Iakobo ve mari korea leipe la maea ve, are Iseraela kara lei haiae leipe, ehovea la eharu va pupu eapapo.
8Aka Hamora erero oharo maria maeaeape: “Arave akore, Sekema, ave la mari ikivere havahu leive, ara aro here leive, eve la mari arero uva ve avarakive hela. 9Ela i hareho uva i vila ila leiki mai leikive; eve marita elaro aikiaraki, elave marita ero aiarakilai. 10E va ela i hareho apeakive; ita eapapo e herehere avakilai, e va ma ita apeapea kakavae horova leikive, kai eharu oaria korukaiavahaeakive.” 11Sekema kara areve oa i huhohoaha ila maeaeape: “E va arave ukai iki veveke hela leivahaeaki. E araro maeaki eharu ara aiarakilai. 12E va eharu maeakoko va eva i meru ila aiaraki la maeakilava, ara lahovea aiarakilai: ikiheroe, hela, la mari hela araro uva hovea leikive avikiaraki.”
13Iakobo ve akoremari Sekema i areve oa Hamora ila hehepo ila kavale oharo maeaeape, ehovea are ereve mariheari Dina lei haiae leipe. 14Ere maeape: “Ela v'ila hovea ka, elave mariheari peritome aue haela avarakive, ehovea laria elaro lei makiri leivahaeaki ave. 15Eharu haroapo okoare hovea, a leikilai, heroe; e oaria ve maea elave maea hovea hovea leivahaeakive, e haela oaria peritome maea leivahaeakive. 16La hoa elave marita ero aiarakilai, ela kara eve marita karakilai; la hoa ela e i hareho apeapea vilaipi haroapo leikilai. 17Aka e elave oharo iapaki aue la leikilava, kai peritome mai haure la leikilava, ela va elave mari hareavi auvahaeakilai.”
18Hamora i areve akore Sekema ila ereve oharo ikivere leivahaeape. 19Harokou haiapo ka la maea leipe, ehovea are Iakobo ve mari ikivere havahu leipe. Kahara, are va areve lalava haela oaria ve akea haela. 20Laelave Hamora i areve akore Sekema ila ereve karikara ve okiape kihoahuka karikara haela maeaeape: 21“Ma haela ela i kake la leivahaeaila: ere va elave ita apea kakavae horova leivahaeakive; iapai, ita va eapapo, ereve kara hovea; elaviila ereve marita karakilai, elaviilave marita kara elaviila erero aiarakilai. 22Aka okoare haroapo elaviilave ukai ve, elaviila ve haela oaria ve maea peritome mai la leivahaeakilava, ereve la peritome mai hovea, ere va elaviila i hareho apeakilai, kai vilaipi haroapo hovea leikilai. 23Ereve mamoe hiru, ereve eharu oaria, ereve boromakau oaria, elaviilave leivahaea va ka ha? Veveke, elaviila ereve ikivere oharo avakive, la hoa, ere ela i hareho apeakilai.” 24Karikara ve okiape hoahukape la haela oaria Hamora i areve akore Sekema ila ve oharo iapape; karikara ve okiape hoahukape la haela oaria peritome maea leivahaeape.
25Hare 3 karia leipe la hoa ere maea kakare leivahaeape la hoa, Iakobo ve akoremari orahokaila, Dina ve huhohoaha, Simeona i Levi ila, poke kaili la karikara muruhari hoahukape; ere la vilahoaha oaria huru le haeape. 26Erealila Hamora i areve akore Sekema ila poke ila haeape, kai erealila Dina Sekema ve uvi ve hareavape. 27Iakobo ve akoremari iki leia au apihaeape haela oaria ovohae eavavahaeape la hoa ere la karikara haela ve eharu oaria naoae le aeape, ehovea ereve mariheari lei haiae leipe la mai. 28Ereve mamoe i nanikosi ila, ereve asini, karikara i oru ila ureve la eharu oaria; 29ereve erohoho eharu, ereve akoremari titaeka, ereve uavila, ereve uvi ureve la eharu oaria, la eharu oaria ere lori le aeape. 30La hoa Iakobo Simeona i Levi ila mari maeaeape: “Ealila araro heraho eapapo leipe, ehovea ealila ma ita haela ve oropa ve, Kanana haela i Perisi haela oropa ve, ealila arave rare heaha le leipe; elaviila haela oaria ka; ere hoa haroapo korukaiavahaeai araro hahari la leivahaeakilava, ere araro hai ka leikilai, ara i arave uvi haela oaria.” 31Aka erealila maeape: “Are elave mariheari harari mari hovea leve leikive ha?”
Currently Selected:
Genese 34: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
