Genese 33
33
Iakobo i Esau ila havila leipe
1Iakobo ovohae iupepe, kai are Esau i haela 400 ila ekevahaelula ovohae eavape. Laelave, are akoremari Lea i Rahela i horova marita ila ve aru ve hamureape. 2Are horova marita i ereve akoremari ila oropaki paparaehape, aire Lea i areve akoremari ila, Rahela i Iosepa ila aireaki havahu. 3Are havahu ereve oropa ve aupe; are hoa 7 ila mea ve ekaopape aiai are akoreapo maeamaea pavape.
4Aka Esau harava vivila arero koarai meae hahape; are areve karave heropi arero ape popoa hi eapapo ape. 5Esau ovohae iupe uavila i akoremari ila ovohae eavape la hoa are mariape: “A i hareho ila ma haela va leita ha?” Iakobo maeape: “Aualari ave horova haela ikiheroe lei ma akoremari aikiarape.” 6La hoa horova marita iki areve oropa ve ekaopape; 7Lea i areve akoremari ila kara iki areve oropa ve ekaopape, aireaki Iosepa i Rahela ila iki areve oropa ve ekaopape. 8Esau maeape: “Ara oropa lakoaraila la eharu oaria ve iele le ha?” Iakobo maeape: “Ehovea arave amua ara i ikiveveke leikive.” 9Aka Esau maeape: “Akoreheari e, arave eharu oaria hovea hovea apearo, ave la eharu a havahu aeakive, heroe.” 10Iakobo maeape: “Ka, ara aro here leive, a va araro ikivere la leikilava, arave ma meru arave mai ve avaki; ehovea, o iele, ara ave oropape laeavila, hovea hovea Aualari ve oropape, ehovea a araro ikiheroe lei auhohi maria laleila. 11Aro lapaparaehaeaila arave ma meru hela aeaki, ehovea Aualari araro lei veveke havahu leipe, kai arave eharu oaria.” Are arero ape karava maeape, laelave are le aeape.
12Kahara, Esau maeape: “Elaviila elare oki auvahaeakilai, ara kai ave oropa aukilai.” 13Aka Iakobo maeape: “Iki amua haela e, a v'ore arave akoremari va maea mahuka, kai ehovea amae lalavahaelula la mamoe i nanikosi ila, ara va heraho leivila; ela erero hare kepea la kari laukilava, ere apihaeaki ave. 14Arave haelapo e, ave horova haela ve oropa itaukive, ara va hahari hahari itaukilai, arave la mamoe i nanikosi ila ve loa hoa hovea, kai akoremari ve la loa hoa hovea, aiai ara Seira, arave haelapo ve la ita leia horeavakilai.”
15Esau maeape: “Lehae, arave ma haela uku ara a v'ila haitapakilai ha?” Aka are maeape: “Arekaea, hovea ka. Ara arave haelapo ve oropa hiki lei veveke leikive, heroe.” 16Laelave, la hare havahu, Esau elare oki Seira ve leia itaupe. 17Kahara, Iakobo Sukota leia hahi itaupe, are elare uvi kai mamoe i nanikosi ila ve uvi kukueape; ehoveala la ita ve rare va Sukota rare itavape.
18Iakobo Padana‐arama hakurepai Kanana ita karikara Sekema leia ovokake ila itaupe; are areve kovo ita karikara oropa ve avape. 19Areve kovo leipe la ita ve kekele ve, are Sekema ve oa, Hamora, ve akoremari, moni hiru 100 ila ilaea leipe. 20Are leia arura haha ukape, kai rare El‐Elohe‐Iseraela rare itavape.
Currently Selected:
Genese 33: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
