Genese 29

Labana ve mari Rahela

1Aireaki Iakobo areve hahi itaupe, kai kauri ukai haela ve la ita ekepe. 2Are ovohae eavape, āra ae ureve, ma koru haroapo, areve maea maea ve mamoe ve hiru ilehoila apeape, ehovea mamoe hiru ve ma avaki ma koru la. Ma koru ve ape ve la have va eapapo, 3mamoe hiru oaria leia korukaiavahaeaki la hoa, mamoe kiva haela ape la have avarurai mamoe ma aiarakilai, aireaki ere la have areve koru ve ape aeka korakilai.

4Iakobo erero maeaeape: “Apavara e, e va lahoa ve ekevahaeairo ha?” Ere kavale maeape: “Ela Harana ve haela.” 5Are erero maeaeape: “Nahora ve akore, Labana, e v'ore ha?” Ere maeape: “Ela arero ore.” 6Are erero maeaeape: “Are veveke aeave ha?” Ere kavale maeape: “Are veveke; aeka, eavaki, areve mari Rahela, mamoe ila, me ekero!” 7Are maeaeape: “Iapai, ma va hare akea hiki, mamoe korukaiaki hoa va āre; mamoe ma aiara, erero hohe larive paparaehakive.” 8Aka ere maeape: “Hovea ka! Mamoe oaria hoa haroapo oropa korukaiavahaeakive, kai ma koru ve ape la have avaru?-?rakive, la hoa mamoe ma le aiarakilai.”

9Ere la oharo hukavape hoa, Rahela i areve oa ve mamoe ila ekepe; ehovea are erero kiva leivahaeape. 10Kahara, Iakobo areve lou ve akoreapo Labana, ve mori, Rahela i areve lou ve akoreapo Labana ve mamoe ila ovohae eavape la hoa, Iakobo pekai ma koru ve ape la have avarurai areve lou ve akoreapo Labana ve mamoe hiru ma aiarape. 11Iakobo Rahela ape popoape, kai hi eapapo ape. 12Iakobo Rahela maeape; are va areve oa ve apavara, kai Rebeka ve akore; are vivila areve oa la oharo kileape.

Rahela ve mariapo Lea

13Labana areve mariheari ve akore Iakobo ve la hari iapape, la hoa, are harava vivila arero koarape, arero hahavi ape popoape, kai arero uvi lai aupe. Iakobo ma oharo oaria Labana hukavi maeape, 14Labana kai arero maeape: “O iele, a va arave uki i arave aivau ila hovea.” Are kai are i aeaveape papare haroapo.

15La hoa Labana Iakobo maeape: “Ehovea a va arave apavara, a va arave horova leikilai, kavale ava va ka ha? Araro kimaeaki, ara aro le kavale leikilai ha?” 16Labana va marita orahokaila; mariapo ve rare Lea, mariheari ve rare Rahela. 17Lea ve ovohae helara helara, aka Rahela ve maea mekakure iele. 18Iakobo Rahela ikivere leipe; are maeape: “Ara va hitolo 7 ila ave horova lei arave kavale va ara Rahela laeakilai.” 19Labana maeape: “Veveke, ara arero aro avarakive, ara haela ae avara v'arekaea; a ara i aeakive, heroe.” 20Laelave, Iakobo hitolo 7 ila horova leipe, ehovea Rahela ve, are la hitolo oaria hoa kahekai kekelape, ehovea are arero ikivere eapapo leipe.

21Kahara, Iakobo Labana maeape: “Arave uva hela avikiarakive: ara arero laeakive, ehovea arave hoa karia le leipe.” 22Laelave, Labana la ita haela oaria korukaiavahaeape, kai hurae eapapo leipe. 23Hailaea hoa are areve mari Lea lai ai Iakobo avarape; are are i hareho uavape. 24(Labana areve horova mari Silipa, areve mari Lea avarape, areve horova mari leikive). 25La opoa vevelare, iapai, Iakobo ore leipe, are va Lea, Rahela ka; Iakobo Labana maeape: “A va araro learia laleila ha? Ara ave horova leipe ehovea Rahela laeakive; ehovealeve a araro ma maea le leilava?” 26Labana mariape; “Elave ita ve mai maria ka, mariheari vila oropa maepakive. 27Ma mari ve hepetoma haroapo leiki, heroe, aireaki a va hitolo 7 ila aeka horova haela leikive, ela kavale mariheari kai avarakilai.” 28Iakobo laria leipe, kai hepetoma haroapo are ila aeape; la hoa Labana arero Rahela kara maepakive avarape. 29(Labana areve horova mari Biliha Rahela avarape, ehovea areve horova mari leikive). 30Kahara, Iakobo Rahela kara laeape, Iakobo Rahela ikivere eapapo leipe, Lea va perehekai; are hitolo 7 kepea Labana ve horova leipe.

Lea ve akoremari

31Iehova ovohae eavape, Iakobo Lea ikihairihairi leipe, la hoa are arero lei eroila leipe, aka Rahela korovu leipe. 32Lea ero eavi a akore epape; are arero rare Reubena rare itavape, ehovea are mariape: “Iehova arave heraho ovohae eavi ikihuru leipe; o iele, ma hoa arave vila araro ikivere leikilai.” 33Are aeka ero eavi a akore epape; are mariape: “Ehovea Iehova ore leipe ere araro ikihairihairi, laelave, are ma akore kara avilakiarila.” Are arero rare Simeona rare itavape. 34Are aeka ero i eavape; akore le epape, kai mariape: “Ma hoa arave vila ara i hareho koperereakilai, ehovea ara areve akoremari ilehoila erape.” Are arero rare Levi rare itavape. 35Are aeka ero i eavape, kai akore le epape; are kai mariape: “Ma hoa ara Iehova ve rare morapaeakilai.” Laelave are arero rare Iuda rare itavape; kahara, areve ero ila hoa karia leilai.

Currently Selected:

Genese 29: ORO

Highlight

Copy