Genese 28
28
1La hoa Isako Iakobo itavi lei morapaeape kai arero maeape: “A va Kanana ve uamari aea laea v'arekaea. 2Urou, Padana‐arama leia ave lou ve oa Betuela ve uvi aukive, leia ave lou ve akoreapo Labana ve mari aea laeakive. 3Akea iele Aualari aro lei morapaeakive, aro akoremari oaria aiarakive, laria, a va vilaipi eapapo leikilai. 4Are a i ave meavohula oaria Aberahamo ve la mekakure avarakilai; aireaki a va Aualari Aberahamo averape la kovo ita a iele le avakilai, a oropa hahi hiki leiki la ita!” 5Kahara, Isako Iakobo le paraeape. Are Padana‐arama, Betuela Aramaea haela, Rebeka, Iakobo i Esau ila ve lou ve akoreapo, Labana ve leia itaupe.
Esau uva aea laeape
6Esau eavape, Isako Iakobo lei morapaeai Padana‐arama uva leia haropakive paraeape; are kai ore leipe, are arero lei morapaeape la hoa are arero o aheke maeape maria: “A va Kanana uamari kalaealue”, 7are eavape, Iakobo areve oa i lou ila ve oharo iapai Padana‐arama itaupe. 8Esau ovohae eavape, areve oa Kanana haela ve uavila ikivere au leila, la hoa 9Esau Isamaela leia uamari aea laeape, areve uavila orahokaila overa karape, are aire laeape Mahalata, Aberahamo ve akore Isamaela ve mari, Nebaiota ve mariloa.
Iakobo Betela leia ivahi eavape
10Iakobo Beera‐sieba hakurepai Harana la okiharo itaupe. 11Are ita aea ekepe, kai oroa leia aeape, ehovea hare overa hoaupe. Are la ita ve have haroapo kaivi aihari ve aipepe, kai leia avuku uavape. 12Are ivahi eavape, papaita mea ve epavi, pekai areve haro kaia akea ve koperereape; iapai, are Aualari ve aneru pekahavaki kihoahukalula eavape. 13Iapai, Iehova areve akea ve epavi mari maeape: “Ara va Iehova, ave vilali Aberahamo i ave oa Isako ila ve Aualari; a uavaki la ita ara a i ave meavohula ila avarakilai; 14ave meavohula kekele mahuvu ve la maeakoko hovea leivahaeakilai; a va hurava ukai aea kauri ukai, paipai hoa kai diho hoa, kopurapakilai; a i ave meavohula ila ve oki ve meahaiapo vila ipipi oaria lei momorapukilai. 15Iapai, ara a i hareho aeavila, ave aula kelari hoa ara aro kiva leikilai, kai aro ma ita ve aeka lai ekekilai; ehovea ara aro hakurepa va ka aiai ara aro maeaki eharu oaria o iele leivahaeakilai.” 16La hoa Iakobo avuku ve urai maria maeape: “O iele, Iehova ma ita aeavila, aeva ara ore au leikue.” 17Are oaoka lei mariape: “Ara va ma ita horahora eapapo leive! ma ka Aualari ve uvi havahu; ma va kaia akea ve okiape iele.”
18Kahara, Iakobo vevelare havahu uroupe, are aihari leipe la have kaivi urapai areve akea ve tehoro loroape. 19Are la ita Betela rare itavape; aka oropa hoa la ita ve rare va Lusa. 20La hoa Iakobo okoare mariape: “Aualari araro la koarakilava, kai arave okiharo oaria araro kiva la leikilava, kai araro au larive eapai i maea kohahaki pura ailakiarakilava, 21ae va ara aireaki havila ila arave oa ve uvi ve aeka helari laukilava, Iehova arave Aualari leikilai. 22Ara maia la urahukaila ma have va Aualari ve uvi iele leikilai, ae va a araro aikiaraki eharu oaria, ara hiru ten ila hamureai, hiru haroapo ara aro avarakilai.”
Currently Selected:
Genese 28: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
