Horova 5

Ananias i Sapphira ila

1Haela ae rare Ananias i uva Sapphira ila kekele uku ilaea leipe. 2Kavale uku are muruhari elare aipepe, areve uva kara ore leipe; are uku hiki aposetolo haela ve loa ipi aipepe. 3Aka Peter mariape, Ehovealeve Satan ave iki ure lakileaila Ove Veveke amuraeakive, kekele ve kavale uku elare muruhari aipekive. 4Oropa, ilaea au leila la hoa, are va ave eharu, ava ilaea leipe la hoa kara a paeape la kavale are ka ave eharu ka ha? Ehovealeve a va ma horova ikikekelape ha? A va haela au amuraeaila — a va Aualari lamuraeaila. 5Ananias ma oharo iapai mea ve hilai le apape. La oharo iapavahaeape haela oaria oaoka eapapo leivahaeape. 6Harokou haela uku urai arero pura kohahai, mea ve oraiavi ai karu le ihape. 7Haiapo ka, areve uva kara ekepe — are la horova haveva. 8Peter arero apevelavela leipe, Araro kimaeaki — E va kekele ilaea lei maria kavale avape ha? Are kavale maeape, E, kavale laria. 9Aka Peter arero maeape, Ehovealeve ealila elarelare oharo hukavi Amua ve Ove amuraeakive ha? Iapai, ave vila karu lihaila la haela ve loa okiape mahokaea ve apearo — ere aro kara oraiavi aukilai. 10Are hoa haroapo areve oropa ve hilai le apape. Harokou haela iki arero huru aeavila eavi, arero mea ve oraiavi ai areve vila i hareho karu ihape. 11Ekalesia hareho ma eharu ore leivahaeai oaoka eapapo leivahaeape.

Aposetolo haela ve iahova i horova hoaha

12Ihova i horova lahualahua oaria aposetolo haela ve mai v'ila leivahaeape. Ere oaria hareho Solomon ve okiape la kavu hareho korukaiavahaeape. 13Karikara haela oaria ere i hareho auvahaeaki oaoka leivahaeape, aka haela oaria erero momorapupe. 14Iapavahaeape haela oaria Aualari rare iki kelavape, vilahoaha i uavila ila hareho. 15Laelave ere maea heahaha haela kile i haha ila okiharo ve oraiavi auvahaeape, ehovea Peter ve heaorapaki hoa areve hare ve ove ereve uku haela aerakive. 16Jerusalem maeamaea la karikara haela oaria kai maea heahaha haela i ovehahu ila haela oaria kari ekevahaeape. Ere oaria maea mekaka leivahaeape.

Peter i John ila aeka Amua haela oropa ve

17Aka akea oharo haela i are i hareho apearoape la haela (ere va Sadducee haela) urahukai ikiheaha leivahaeape. 18Ere aposetolo haela mai papaehai uvi muru paparaehape. 19Amua ve aneru oroa hoa uvi muru okiape hapai erero kari kihoai mari maeaeape, 20E v'ai Hehe Uvi epavi haela oaria ovokake oharo iroro arive. 21Ere ma oharo iapai, mea opape hoa ere Hehe Uvi pekahavi haela oaria kileavahaeape.

Aka Akea oharo haela i are i hareho loape haela, elare council haela i Israel akoremari ve council ila korukaiavahaeai, haela uku uvi muru paparaehai erero kari ekevahaeakive. 22Aka ere paparaehape la haela erero uvi muru au eavaila, laelave ere helari ai mari maeaeape: 23Ela uvi muru aheke kolakaukaila laeavila, kiva haela kara okiape mahokaea ve lapeaila: aka ela okiape hapai ureve haela va au koaraila. 24Hehe Uvi kapena haela i oharo haela ila ma oharo iapai, horahora eapapo leivahaeape, ehovea ma eharu eapapo havahu leiki ave. 25Haela haroapo iki leia erero mari maeaeape, Iapai, e uvi muru lapaparaehaila la haela Hehe Uvi haela oaria kileavahaelula epavaro. 26Kapena haela i areve koarai haela ila auvahaeai erero hahari hahari kari ekevahaeape, ehovea ere oaoka haela oaria erero have koavaki ave.

27Ere erero kari iki council haela oropa ve aipevahaeape. Akea oharo haela erero mari maeaeape, 28Ela ero ape karava maeaeape, ma rare v'ila kakileavahaelue. Iapai, E va eve kilea oharo Jerusalem heloe le koape. E va ikivere ma haela ve apu ve haeae mehau ela hiki avakive ha? 29Aka Peter i aposetolo haela ila kavale maeaeape, Ela va haela ve oharo iapa ka — Aualari ve oharo hiki. 30Elave vilali ve Aualari Iesu lai urapape — e va arero kora akea ve avikai hape. 31Aualari areve mai ore v'ila arero morapaeai, Amua i Ovokake avaraki haela leikive, ehovea are v'ila Israel haela ve haeae ve ikihuru lei hapururukakilai. 32Ela ma eharu vavahaelula, Aualari iapailula haela avarape la Ove Veveke kara.

33Ere ma oharo iapai hihiri eapapo leivahaeai erero haeakive ikivere leivahaeape. 34Aka haela ae va rare Gamaliel, haela oaria morapaeape pupu kilea haela, council ureve uroupe. Are erero la haela mahokaea ve paparaehakive maeaeape. 35Are erero maeaeape, Israel haela oaria, e kiva leila, e ma haela learia leivahaeakive. 36Ehovea overa hoa Theudas urai maea pelaea leipe — haela 400 arero koarai auvahaeape. Are apape, kai arero koarai auvahaeape la haela le titavi kari le leivahaeape. 37Aireaki Judas Galilee haela, kavana rare haeape la hoa, urai haela uku kara kari auvahaeape. Are kara apape: areve oharo iapavahaeape haela kara le titavape. 38Laelave ara ero maeaeaive. Ma haela kavale kalaivahaelue, ereve ikikekela i horova ila haela v'ila la leikilava, are kari leikilai. 39Aka are va Aualari ve la lailava, e va erero hereavakive hovea lei va ka, e va Aualari hahari leiki ave.

40Ere areve oharo iapape. Ere aposetolo haela itavi haru hai, ape karava maeaeape, Iesu ve rare kakilealue, kai erero paparaehape. 41Laelave ere oaria council hakurepai ikiveveke eapapo leivahaeape ehovea Aualari erero rare v'ila kakare leikive hovea kekelape. 42Hare oaria ere Hehe Uvi ve i elare uvi ve Iesu va Keriso iele oharo auhohi kileavahaeape.

Currently Selected:

Horova 5: ORO

Highlight

Copy