Horova 3
3
Loa heaha merava haela lei makuripe
1Peter i John ila Hehe Uvi ivaiva hoa pekahavape, hoa hare hihi, 2Areve lou epape hoa ora heaha haela ae ere hare oaria kaivi Hehe Uvi okiape rare Okiape Veveke leia aipepe, ehovea Hehe Uvi pekahavalula haela meru velavela leikive. 3Are Peter i John ila Hehe Uvi pekahavila eavi erealilara meru velavela leipe. 4Peter i John ila arero ovohae eavi mari maeape, Elalilara eavaki. 5Are erealilara ovohae eavape ehovea areve ikikekela erealila meru avarakilai. 6Aka Peter mariape, Ara va silver i gold ila karia, ara ara v'ila aeavila la eharu ara aro avarakilai — Iesu Keriso Nazareth haela ve rare v'ila urai veakive. 7Are arero mai ore pae lai urapape. La hoa havahu areve loa i loa ove ve uki aheke leivahaeape. 8Are hareai au pavi loa veavelaripe. Are hareau hareau erealila i hareho Hehe Uvi Aualari morapaevila pekape. 9Haela oaria arero loa veavelarivila i Aualari morapaeavila eavape. 10Ere ore leipe, are va Hehe Uvi ve Okiape Veveke meru velavela leivila haiavape haela la. Ere va ikihorahora eapapo leivahaeape, ehovea are v'ila leipe la eharu.
11Are Peter i John ila mai paeape la hoa — haela oaria Solomon ve okiape kavu leia harava vivilavahaeape, ikihorahora eapapo iele.
Peter Hehe Uvi ureve ape la iroro
12Peter erero eavi kavale maeaeape, Israel haela oaria e — e va ma haela v'ila horahora ehovealeve ha? E elaro ovohae auhohi eavaki ehovealeve? 13Abraham i Isaac i Jacob ila ve Aualari, elave vilali haela ve Aualari, areve akore Iesu le morapaeape. E va arero hihila epape, Pilate ve oropa ve. Pilate ikivere arero ovokake paraeakive, aka e va areve oropa ve hehepo leivahaeape. 14E va hehe i mai ehoe ila la haela haure leivahaeape: e va haela haeaki haela ikivere leivahaeape, 15Aualari apape hoa ve urapape la ovokake ve Amua e hape. Ela are v'ila vavavahaelula haela. 16Ma haela areve rare ikikekelavila aheke laleila: e va arero ovohae eavi ore overa leipe. Kaire, ehovea areve ikikekela eve oropa ve are aheke havahu le laleila.
17Apavara, ara v'ore e haveva lei ma haeae leivahaeape, eve amua haela kara. 18Aka Aualari areve peroveta haela ve ape v'ila overa amoeape la eharu, Keriso ve la kakare, are laria leivahaeape. 19Eve haeae ve ikihuru leivahaeai iki kekelaki, aireaki Amua ve oropa ve iki veveroro leiki la hoa, eve mai heahaha le hapururukakilai. 20Are ero overa maeaeape la Iesu Keriso, are kai paraeakilai. 21Are kaia ve aiai eharu oaria veveke leivahaeaki la hoa. Aualari la eharu areve peroveta haela ve ape v'ila maeape meahaiapo avare koai ipopeavape la hoa ikiki mahau. 22Ehovea Moses vilali haela iele maeaeape Eve Amua, eve Aualari, elaviila ve arave hovea haela lai urapakilai. Are ero kileavahaeaki la oharo oaria e va iapavahaeakilai. 23Iapai, la peroveta haela ve oharo hahaure leiki la haela oaria hai ka leivahaeakilai. 24Kaire, peroveta haela oaria Samuel ve hoa aiai aireaki oharo kileavahaeape la haela oaria, ma hare v'ila oharo overa kileavahaeape. 25E va peroveta haela i Aualari elaviilave houva haela ila hareho leipe la okoare ve akoremari. Are Abraham maeape okoare maria, Ave meavohula v'ila meahaiapo ve vila‐ipipi oaria ikiveveke leivahaeakilai. 26Aualari areve Akore Iesu lei urapape: Are arero e v'ila oropa paraeape ehovea ero lei veveke leikive, kai eve haela oaria mai heahaha ve haitapai helari?-?vahaeakilai.
Currently Selected:
Horova 3: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
