Horova 2

Ove Veveke meru

1Pentecost kihorerape la hare ere oaria ita haroapo hareho korukaiavahaeape. 2Hoa haroapo kaia ve mea eapapo ve uara hovea kihoai, ere apeape la uvi heloekoape. 3Auri a uru hovea au kovavaelai haroapo haroapo ereve akea ve hihika epavape. 4Ove Veveke erero oaria heheloekoape. Ere oaria hareho uri lahua lahua oharo hukavavahaeape. Ove Veveke erero kileavahaeape hoveahovea.

5Jerusalem leia apeavahaeape mai ehohoe Jew haela uku, meahaiapo ita lahua lahua oaria ve ekevahaeape haela, 6Ere ma uara iapai, haela oaria korukaiavahaeai ikihorahora eapapo leivahaeape, ehovea ere oaria elarelare uri hukavi iapavahaeape. 7Ere oaria ikihorahora eapapo leivahaeai mari maeaeape, Eavaila, ma oharo hukavalula haela Galilee haela ka ha? 8Ela haela oaria elare epape uri leari iapavahaearo, 9Parthia haela, Medes haela, Elam haela, Mesopotamia apealula haela ila, Judea i Cappadocia i Pontus i Asia ila. 10Phrygia i Pamphylia i Egypt i Cyrene maeamaea la Libya haela: Rome apealula haela, Jew haela i Jew pupu kiva leilula haela; 11Crete i Arabia haela ila: Elaviila erero elaviilave uri Aualari ve horova mekakure oharo hukavavalula iaparo. 12Ere oaria ikihorahora eapapo leivahaeai elarelare maria hukavavahaeape, Ma va iele le ha? 13Aka uku haela heheo mari maeaeape, Ere wine are oaria lalalavahaeaila.

Peter Pentecost iroro ape la oharo

14Aka Peter haela eleven i hareho urai āra mari hape, E Judea haela i Jerusalem apealula haela oaria ila, e ma oharo iapaila, kai arave oharo auhohi iapai kekelakive. 15Ma haela wine v'ila ihape au leila, ehovea mahau hoa 9 hoa hiki. 16Aka ma va peroveta Joel overa maeaeape la oharo:

17Iapaila — Aireaki la hare Aualari maeape,

Ara va arave Ove aivau oaria haela v'ila kakaitakilai,

Eve mekehaku i marita ila peroveta oharo arilai,

Eve harokou haela ivahi eavakilai,

Eve haela hoaha kara ivahi oharo hukavakilai.

18Kaire — ara arave ove arave horova mekehaku i marita v'ila kakaitakilai.

Ere peroveta oharo avahaeakilai.

19Ara kaia akea ve ikihorahora leivahaeaki eharu amoeakilai,

Ara meahaiapo ve ihova leivahaeakilai,

— apu i a ila, a mahumu oaria kara.

20Hare oropa muru le leikilai,

Papare apu hovea koelarikilai

Amua ve hare aire kihorerakilai, hari veveke ila la Hare.

21Iapaila — Amua ve rare itavaki la haela lei makukurikilai.

22Israel haela oaria — ma oharo iapaila — Iesu, Nazareth haela, Aualari e v'ila morapaeape la haela, ehovea Aualari eve oropa ve are v'ila leivahaeape la horova ehoaha i ihova oaria ila — e va la eharu ore overa leivahaeape. 23Aualari iki overa kekela ore overa lei arero avarape, ehovea e pupu haveva haela ve mai v'ila satauro akea hape. 24Aualari, apakive la kakare hareavi, arero urapape, ehovea la kakare arero hahakive hovea ka; 25Ehovea David are v'ila maeape:

Ara Amua arave oropa ve aeavila eavape,

Ehovea are arave mai ore ukai ve aeavila, araro lei hareavaki ave.

26Laelave ara ikiveveke leive, arave auri kara oharo veveke ave:

Arave aivau kara ikiveveke hoa la karikilai.

27Ehovea a arave ove Hades hakurepa va ka:

Ave hehe haela kara a va poae leikive avara va ka.

28A va araro ovokake okiharo kileavahaeape:

A va ave oropape v'ila araro ikiveveke leikilai.

29Apavara, ara ero papa David v'ila hihika maeaeakilai, are apai kapu ve le ihape: areve kapu ita kara ikiki ma hoa elaviilave me aeave. 30Ehovea are peroveta haela, kai ehovea are v'ore Aualari arero okoare maeape — areve meamari aeva areve terona akea ve haiavakilai. 31Laelave, ehovea are ma eharu iki overa kekela, are Keriso ve apai kai urouki hoa v'ila maeape. Are va Hades au aeaila, kai areve aivau poae au leila. 32Ma Iesu Aualari urapape. Ela oaria la eharu v'ila vavavakive. 33Laelave, ehovea are va Aualari ve mai ore v'ila lei urapape, kai ehovea are va Oa v'ila Ove Veveke ve okoare avape, e ovohae eavi iapaki ma eharu are kakaitape. 34Ehovea David kaia akea au pekaila, aka are elare v'ila maeape,

Amua arave amua kai maeape, arave mai ore ukai ve haiavaki.

35Aiai ara ave iri haela ave loa epavaki haha hovea karikikilai.

36Israel haela oaria iele havahu kileavahaeakilai, e satauro akea ve hape ma Iesu, Aualari arero Amua i Keriso ila leipe.

37Ere ma oharo iapai ikihuru leivahaeai Peter i kilea haela oaria maria maeaeape, Apavara ela learia leivahaeakilai ha? 38Peter erero maeaeape, Heaha ve ikihuru leivahaeaki, e haela oaria Iesu ve rare v'ila bapatiso leivahaeaki aiai mai haeae ve hapururukakilai: e va Ove Veveke la meru avakilai. 39Ehovea okoare e v'ila maeaeape — eve akoremari v'ila kara, aiai apehai la haela kara — elave Amua Aualari la itavaki la haela kara. 40Are va oharo oaria v'ila vavavape kai erero ape karava maeaeape maria, E va ma vilakao haeae ve vivilaki. 41Areve oharo iapavahaeape haela oaria bapatiso leivahaeape — la hare erero koperereape haela oaria 3,000 ila.

Keriso ve Haela ve apeaki mai veveke

42Ere oaria aposetolo kilea mai i korukaiavahaeaki mai ila hareho kiva leivahaeape, hare oaria pai kovavaelai ivaiva leilula la mai.

43Haela oaria oaoka leivahaeape, aposetolo haela horova hoaha i ihova oaria leivahaeape. 44Ikikekela haela oaria hareho korukaiavahaeai, eharu elarelare herehere leivahaeape. 45Ere ereve eharu i erohoho eharu oaria ilaea leivahaeai haroapoharoapo hamureape, haela oaria ve ikivere hovea hovea. 46Ere hare oaria Hehe Uvi pekahavape: hare oaria elare ita ve eapai lalavahaeape: ere eapai ikiveveke i mai ehoe ila lalavahaeape. 47Ere Aualari morapaeai haela oaria kara erero ikiheheroe leivahaeape — hare oaria Amua Ovokake leivahaeape haela ae va erero koperereape.

Currently Selected:

Horova 2: ORO

Highlight

Copy