Matayo 26
26
Imigelanihidze gya kumukoma uYesu
(Maluko 14:1-2; Luka 22:1-2; Yohana 11:45-53)
1UYesu aaviye ámalile ukulonga amadzwi gonda ago, akuvalongelaga avanyigendwa vaakwe iitigilaga, 2“Ngita kye mwidzeela, pe fíhelaniidze ifigono fivili, tuhadza twivedza ni kyaka kya Paasaka.#26:2 Kyaka kya Paasaka Lole Ikyaka kya Paasaka ku Figanulo. UMuswamuve va Muunu ahadza iigotolwa ku vatavangwa, ukuta akomwe pa kipindulihidzo.”
3Neke umusika ugo, avateekedzi avakomi na vavaha va Vayahudi, valundanage mu nyumba ingomi ya muteekedzi umuvina#26:3 Muteekedzi umuvina Lole Avateekedzi ku Figanulo. ye aatambulwaga Kayafwa. 4Viigelaniidze ukumwibata uYesu wugendela wa wubanga, ukuta vamukome. 5Neke viidiingʼanage vatigilage, “Tutane ukulima idzo mu kigono ikya kyaka kya Paasaka, ukuta avaanu vatane ukuhula ilyowo.”
Umwayuuva akumuhululidzila amafuta uYesu
(Maluko 14:3-9; Yohana 12:1-8)
6UYesu pe aali mu luvala lwa Betaniya, aaheliye ku nyumba ya muunu ye aatambulwaga Simoni, ye aali ni kinyamuvili pa kutala. 7UYesu pe ali mu kuliya, neke umwayuuva yumwinga aadzage ni supa ya liganga, iyinya mafuta matalamu aganya lunuusi lunofu. Akumuhelelelaga uYesu, akumuhululidzilaga amafuta ago pa mutuwe gwakwe. 8Avanyigendwa vaakwe pe vadziweene idzo, viiviipaga hiilo mu numbula dzaawo, viitigilaga, “Kye kiki ukuyadza amafuta matalamu ago? 9Kiba ngana gakali gagudzwe na magoobeli goloofu, ukuta vapeelwe avahangala!” 10UYesu iidzeelaga dze vaahoodzaga, akuvalongelaga iitigilaga, “Kye kiki mukumudaasa umwayuuva uyu? Umwene áandimiye inofu hiilo. 11Avahangala muli navo ifigono fyonda, neke kangi uneene musili naane ponda. 12Umwayuuva uyu pe áanyululidziye amafuta matalamu ago pa mutuwe gwangu, áambakile ukuta agugelanidze umuvili gwangu pa kusiilwa kwangu. 13Ndakyene ndikuvalongela ndiitigila, ponda pe yiidalikwa iMola iNofu mu nyi dzonda, avaanu valiiwuka nu kugalonga amalimo aga manofu ge áandimiye umwayuuva uyu.”
UYuda Isikalyote akumusutula uYesu
(Maluko 14:10-11; Luka 22:3-6)
14Neke uYuda Isikalyote, yumwinga mu vanyigendwa va Yesu vanyikyumi na vavili (12), ahelelage ku vateekedzi avakomi, 15avawuudzage atigilage, “Ngana ndimugotole uYesu ukwenyo, muhadza mukuunyomba kiki?” Neke vamuhombage magoobeli makyumi gadatu (30).#26:15 Magoobeli makyumi gadatu Aga gaali luhombo lwa mulima-malimo mu myedzi gidatu. 16Ukuhuma umusika ugo, uYuda iivangaga ukutemula umusika umunofu ugwa kumusutula uYesu ukwawo.
Ukwigelanidza ulwa Paasaka
(Maluko 14:12-21; Luka 22:7-13, 21-23; Yohana 13:21-30)
17Mu kigono ikya kutala ikya kyaka kya mikaate igingaya luhaafu,#26:17 Kyaka kya mikaate igingaya luhaafu Lole Ikyaka kya mikaate igingaya luhaafu ku Figanulo. avanyigendwa vaaheliye kwa Yesu, vakumuwuudzaga viitigilaga, “Kwe kwiya kwe wiisaka tuhelele tukakugelanidzile pa kuliila ikyakuliya ikya Paasaka?” 18UYesu akuvahigaga iitigilaga, “Muhelele ku wudzenge wa Yelusalemu kwa mwadaada yumwinga, mukamulongele ukutigila, uMuwulanidzi ávatumile kangi iilonga ukutigila, ‘Umusika gwangu gúhegeliye. Uneene na vanyigendwa vangu tuhadza twiliya ikyakuliya ikya Paasaka ku nyumba yaako.’ ” 19Avanyigendwa avo viihelelaga nu kulima dzonda ngita uYesu kye avalagiidze, viigelanidzaga ikyakuliya kya Paasaka.
20Pe yaafikile ikyamihe, uYesu na vanyigendwa vaakwe vanyikyumi na vavili, vakwikalaga kuliya ikyakuliya. 21Pe vali mu kuliya, uYesu akuvalongelaga iitigilaga, “Ndakyene ndikuvalongela ndiitigila, yumwinga umwenyo ahadza akuusutula.” 22Avanyigendwa vaakwe viihuguvalaga hiilo, nayula iivangaga ukumulongela iitigilaga, “Mutwave, ongo, ndiivedza siye neene?” 23UYesu iihigaga iitigilaga, “Umuunu ye ádzabile umukaate gwakwe mu kitonga pamwinga naane, ye mwene umunya kuusutula ku vatavangwa.#Ndzimbililo 41:9 24Ndakyene uMuswamuve va Muunu iihelela kukomwa ngita kye lúsimbiilwe wiimila wa mwene. Neke kangi ali nu lukali uyo ye akumusutula uMuswamuve va Muunu! Kiba umuunu uyo akali atane ukuholwa.” 25Neke uYuda umunya kumusutula, nave amuwuudzage atigilage, “Muwulanidzaave, ongo, ndiivedza siye neene?” UYesu akumuhigaga iitigilaga, “Uveeve ye úlongile.”
Ikyakuliya kya Paasaka
(Maluko 14:22-26; Luka 22:14-20; 1 Vakolindo 11:23-25)
26UYesu na vanyigendwa vaakwe pe vali mu kuliya, iinyamulaga umukaate, akugufuunyililaga, iimegulingʼasaga, akuvapeelaga avanyigendwa vaakwe iitigilaga, “Kote muliyage, ugu gwe muvili gwangu.” 27Iinyamulaga ni kinywelo ikili ni difwayi, akumuhongedzaga uNguluvi, akuvapeelaga iitigilaga, “Kote, munywedzage nyivonda. 28Pakuva iyi ye danda yangu ya lufingo#26:28 Lufingo Lole Ulufingo ku Figanulo. iyiikwitika wiimila wa voloofu, ukuta uNguluvi avapyanilage indzanangifu dzaawo. 29Ndikuvalongela ukutigila, sindilaanyuwa kangi idifwayi ukufikila ikigono pe ndilaanyuwa idifwayi imiya, pamwinga na yuunye ku wutwa wa Daada.”
30Neke viimbage ulwimbo lwa kumulumba uNguluvi,#26:30 Ulwimbo lwa kumulumba uNguluvi AVayahudi umusika pe vaavedzaga vámalile ukuliya ikyakuliya kya Paasaka, viimbaga Ndzimbililo 113-118. vahegage apo, vahelelage ku Kidunda kya Miseyituni.
UYesu iilonga ukutigila uPetulo ahadza akumukaana
(Maluko 14:27-31; Luka 22:31-34; Yohana 13:36-38)
31Neke uYesu avalongelage avanyigendwa vaakwe atigilage, “Ineengʼuli pakilo, unyeenye nyivonda muhadza mwinyila nu kuundeka. Lwe lwene lúsimbiilwe mu Wusimbe uWiimike ukutigila,
‘Ndihadza ndikumutova umudiimi va ngʼolo,
nadzi ngʼolo dzihadza dziipalaangʼana.’#Sakalya 13:7
32“Neke kangi pe ndiivedza ndídzulubwike, ndihadza ndikuvalongola ukuhelela ku Galilaya.” 33Neke kangi uPetulo amulongelage uYesu atigilage, “Nde vavedzage vakukuleka vonda, uneene sindikukuleka nambi!” 34UYesu akumuhigaga iitigilaga, “Ndakyene ndikukulongela ukutigila, ikilo iya neengʼuli umusika indzogolo pe yisinaa yivika, wiivedza úungʼaanile nyakadatu ukutigila usiindzeeliye.” 35UPetulo akumuhigaga iitigilaga, “Nde ndivedzage ndili munya kufwilasa, uneene sindikukaana nambi!” Avanyigendwa avangi vonda, navo viilongaga ndeeni.
UYesu iilapangila ku Getisemane
(Maluko 14:32-42; Luka 22:39-46)
36Neke uYesu aheleengʼasage na vanyigendwa vaakwe apoono apiitambulwa Getisemane, avalongelage atigilage, “Mwikale apa umusika pe ndiihelela kula kulapangila.” 37Akumunyamulaga uPetulo pamwinga na vaswamuve va Sebedayo vavili, iivangaga ukuhuguvala nu kunyengʼemala hiilo. 38Akuvalongelaga iitigilaga, “Inumbula yangu yili nu wuhuguvafu mbandu ngita kufuwa. Mwikale baaha, muvedzage miiho pamwinga naane.”
39Iihegelelaga pawutalo padebe, akwigwisaga paanyi kinyalileme, iilapangilaga iitigilaga, “Ve Daada! Ngana lwivagila, uunyedzehedze ikinywelo kya mumuko iki. Neke kangi si kutigila lulimikage lwe ndíkeeliye uneene, nda haamu, lulimikage lwe úkeeliye uveeve.” 40Neke uYesu apilukage pe avalekile avanyigendwa vaakwe vadatu, avawonage vágoneeliye. Akumuwuudzaga uPetulo iitigilaga, “Múlemiilwe ukuvedza miiho pamwinga naane nambe kivalilo kimwinga? 41Muvedzage miiho nu kulapangila, ukuta ingemyo dzitane ukuvalema. Inumbula dzeenyo dzíitawuwe, neke kangi imivili gingaya ngufu.”
42UYesu akuvalekaga kangi, iihelelaga kulapangila ulwa kavili iitigilaga, “Ve Daada! Ngana silwivagila ukuunyedzehedza ikinywelo kya mumuko iki, apo imikeelelele gyako gilimike.” 43Pe aapilwike, iiwonaga vágoneeliye kangi, pakuva amiiho gaawo gaali ni tulo. 44UYesu akuvalekaga kangi, iihelelaga kulapangila ulwa kadatu, pe iilapangila aalongile amadzwi gaagala. 45Pe aapilwike kangi pe avalekile, akuvalongelaga iitigilaga, “Mwave múgoneeliye nu kupola? Lolage! Ikivalilo kífikile, uMuswamuve va Muunu iisutulwa mu mawoko ga vanya ndzanangifu. 46Mwime! Tuhege! Lolage, umunya kuusutula ali biihi!”
UYesu iikwibatwa na valongodzi va Vayahudi
(Maluko 14:43-50; Luka 22:47-53; Yohana 18:3-12)
47Umusika uYesu apila alonga, uYuda, yumwinga mu vanyigendwa vaakwe vanyikyumi na vavili, iifikaga pamwinga ni lilugu likomi lya vaanu. Avo vaatumiilwe na vateekedzi avakomi na vavaha va Vayahudi, kangi vaali na mapanga ni sondzo. 48Umunya kumusutula aali ávapeeliye ikimanyilo avaanu avo, akuvalongelaga iitigilaga, “Umuunu ye ndidzikumunoonela pe ndikumuhungila, ye mwene ye mumwibatage.” 49Umusika guugo, uYuda iihelelaga kwa Yesu, akumulongelaga iitigilaga, “Muwulanidzaave, hwewuli!” Neke amunoonelage.
50UYesu akumuhigaga iitigilaga, “Ve mudzeelaave! Ulime dze úgulumiye.” Neke avangi mu lilugu ilyo vamuhelelelage uYesu, vamwibatage, vamupingage. 51Neke yumwinga mu avo avaali pamwinga nu Yesu, ahoonolage kisaatu ilipanga, amumyatulage ilisiikidza umulimila-vangi va muteekedzi umuvina. 52Neke uYesu amulongelage atigilage, “Upiluse ilipanga lyako mu wugono waakwe, pakuva avaanu vonda aviitovana ni lipanga, viikomwa ni lipanga! 53Ongo, musiidzeela ukutigila sindiilemwa ukumunyilika uDaada, nave asiilemwa ukuunumila liilino avanyamwandza vaakwe ukulutila amalugu makomi ganyikyumi na gavili? 54Ngana ndilime ewo, apo dziikwila wuli dzila idzaasimbiilwe mu Wusimbe uWiimike ukutigila, ndakyene dzinya kuhumila?”
55Neke uYesu avalongelage avaanu avo atigilage, “Mwádzile na mapanga ni sondzo kuundzibata ngita ndikuyigaluka isilikaale? Ifigono fyonda, ndikali naanye mu lipaala lya tembeli ndikiiwulanidzaga, neke kangi musikaandzibatiige! 56Neke lino, dzonda idzo dzíhumiye ukuta dzikwile idzo dze vaasimbile avavidzi mu Wusimbe uWiimike.” Suwe avanyigendwa vaakwe vonda vakumulekaga uYesu, viinyilaga.
UYesu iihigwa pa kiwungu ikya Vayahudi
(Maluko 14:53-65; Luka 22:54-55, 63-71; Yohana 18:13-14, 19-24)
57Neke avo avaali vámwibiite uYesu, vahelelage nave kwa Kayafwa umuteekedzi umuvina, kwe vaalundaniye avawulanidzi va milagililwe na vavaha va Vayahudi. 58UPetulo amuniniilaga uYesu pa wutaali, ukufikila pa lipaala lya muteekedzi umuvina. Neke iingilage mugati, iikalasage na vakolokolooni, ukuta alole inongwa ya Yesu kye yihadza yiisila.
59Avateekedzi avakomi pamwinga ni kiwungu kyonda ikya Vayahudi,#26:59 Kiwungu kyonda ikya Vayahudi Lole Ikiwungu kya Vayahudi ku Figanulo. viisakulaga uwoolesi wa wudesi uwa kumutaaha uYesu, ukuta vamukome. 60Neke kangi vasawuweene uwoolesi wuwuvedzaga, nde vavedze vaadzile avoolesi voloofu va wudesi. Pa wusililo, avoolesi vavili viikwadzaga, viitigilaga, 61“Umuunu uyu aalongile ukutigila, ‘Sindiilemwa ukumamula aPiimike pa tembeli ya Nguluvi nu kudzenga kangi mu figono fidatu.’ ”
62Neke umuteekedzi umuvina iimage, amuwuudzage uYesu atigilage, “Ongo, we woolesi wuki uwu we viileeta avaanu wiimila waako? Usiihiga kiinu?” 63Neke kangi uYesu atanage ukuhiga kiinu. Neke umuteekedzi umuvina uyo amulongelage kangi atigilage, “Ndikukuyiigilidza mu litaawa lya Nguluvi ye ali muumi, utulongele ngana uli Mesiya, uMuswamuve va Nguluvi.” 64UYesu akumuhigaga iitigilaga, “Yuuve ye úlongile. Neke kangi ndikuvalongela nyivonda ukutigila, ukuvangila lino muhadza mukumuwona uMuswamuve va Muunu íikalile ulubali ulwa kundiyo#26:64 Ulubali ulwa kundiyo Kwe kutigila, uYesu iitemasa nu Nguluvi. ulwa Nguluvi uMunya Ngufu, pe iikwadza pakyanya pa mafunde ga kukyanya.”#Ndzimbililo 110:1; Danyeli 7:13-14 65Umuteekedzi umuvina pe aapuliike amadzwi ago, iideemulaga umwingila gwakwe, iitigilaga, “Mwípulikiye kye ámulongile fivi uNguluvi! Twisakula kiki kangi ukuvedza na voolesi avangi? Mwípulikiye yuunye uwulonga fivi waakwe! 66Lino unyeenye mwitigila wuli?” Vonda viihigaga viitigilaga, “Ávagiye akomwage!”
67Neke vavangage ukumufuunyila amati uYesu ku miiho, vamutovage ni fundzi. Avangi vakumudzagulaga ni fivaate, 68nu kumulongela viitigila, “Ve Mesiya! Salile, ye ani ye ákutovile?”
UPetulo akumukaana uYesu
(Maluko 14:66-72; Luka 22:56-62; Yohana 18:15-18, 25-27)
69Umusika ugo, uPetulo iikalile mu lipaala. Neke mulimila-vangi yumwinga umuhindza ahegelelage kwa Petulo, amulongelage atigilage, “Uveeve naave ukali pamwinga nu Yesu va ku Galilaya.” 70Neke kangi uPetulo akaanage pa miiho ga vonda avo atigilage, “Sindikudzidzeela idzo dze wiilonga!”
71Neke ahelelage pa mulyango, umulimila-vangi uyungi umuhindza amuwonage, avalongelage avaanu avaali apo atigilage, “Umuunu uyu akali pamwinga nu Yesu muhuma ku Nasaleti.” 72UPetulo iikaanaga kangi, iiyiigaga iitigilaga, “Sindimudzeeliye umuunu uyo!”
73Pe gwaviye gúhelaniidze musika mudebe, avaanu avo aviimile apo, viihegelelaga kwa Petulo, vakumulongelaga viitigilaga, “Ndakyene uveeve ye yumwinga mu vaanu avo, pakuva nayi ndongele yaako yiiwoneesa ndakyene ukutigila wiihuma ku Galilaya!” 74UPetulo iivangaga ukwiyiigilidza nu kuyiiga, iitigilaga, “Sindimudzeeliye umuunu uyo!” Baaho indzogolo yiivikaga.
75Neke uPetulo iiwukage amadzwi ago ge amulongiye uYesu ukutigila, “Umusika indzogolo pe yisinaa yivika, wiivedza úungʼaanile nyakadatu.” Apo iihumaga kwivala, iivembaga hiilo.
Currently Selected:
Matayo 26: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
