Matayo 15
15
Avaanu vaniniilage indagi dza Nguluvi, valekage imivedzehedze gyawo
(Maluko 7:1-13)
1Neke aVafwalisayo wuli na vawulanidzi va milagililwe, vafikage ukuhuma ku Yelusalemu. Viihelelaga kwa Yesu, vakumuwuudzaga viitigilaga, 2“Kye kiki avanyigendwa vaako vasiikolaatidza imivedzehedze gye vatulekiye avakuhwesu? Viiliya ikyakuliya kitakalava tandi amawoko!”#15:2 Kitakalava tandi amawoko AVayahudi vaafuuwaga ukutigila, umuunu wone apamye ikyakuliya kitakalava tandi, ikyakuliya ikyo kiivedza lupumba, kangi kikumuhulila nave ye iiliya ukuvedza lupumba. 3UYesu akuvahigaga iitigilaga, “Na yuunye, kye kiki mwidzumba indagi dza Nguluvi#15:3 Indagi dza Nguluvi Lole ku Figanulo. wugendela wa kuniniila imivedzehedze gyenyo? 4Pakuva uNguluvi aalongile ukutigila, ‘Uvaginiyage udaado nu nyoko.’#Kuhega 20:12; Lwiwuko 5:16 Kangi aalongile ukutigila, ‘Ye avedzaga ye akumuliga udaadiye enewuli ungʼina, uyo akomwage.’#Kuhega 21:17; Valevi 20:9 5Neke kangi unyeenye mwilonga ukutigila, ‘Umuunu iikwidikwa ukuvalongela avavaha vaakwe ukutigila, “Ikiinu kye ndikali ndikuvapeela ngita kuvatanga, lino ndítawuwe wusembe kwa Nguluvi.” ’ 6Ndeeni, mwilonga ukutigila umuunu asiisakulwa ukuvaginiya udaadiye, enewuli ungʼina. Uko kwe kwene kwe mwibedalila ilidzwi lya Nguluvi wugendela wa kuniniila imivedzehedze gyenyo. 7Unyeenye muli vakedusi! UIsaya aavilile ndakyene wiimila weenyo ukutigila,
8‘Avaanu ava vakuunginiya ulwa pa mulomo hela,
neke kangi inumbula dzaawo dzili kutaali naane.
9Na pe vakwifuunya ukwangu, vakwifwahidza hela,
viiwulanidza imbulanidzo idza milagililwe gya vaanu hela.’#Isaya 29:13 ”
Ifiinu ifikumuhulila lupumba umuunu
(Maluko 7:14-23)
10UYesu iikemeelaga ililugu lya vaanu, akulilongelaga iitigilaga, “Mupulikidzage wunofu nu kulufika! 11Sikookili ikiinu ikiikwingila mu mulomo gwa muunu ikikumuhulila lupumba, nda haamu, kookili ikiinu ikiihuma mu mulomo gwakwe, kye kyene ikikumuhulila lupumba.”
12Neke avanyigendwa vaakwe vahelelage kwa Yesu, vamulongelage vatigilage, “Wiidzeela ukutigila, aVafwalisayo pe vápuliike amadzwi ago ge úlongile, váviipile mbandu?” 13UYesu iihigaga iitigilaga, “Ikimelo kikivedzaga kye asiyaalile uDaada ye ali kukyanya, ahadza iikuula ni midela. 14Muvaleke, pakuva avo valongodzi vabofu, viilongodza avabofu! Ngana umubofu akumulongodza umubofu muyagwe, vonda vavili vahadza viigwila mu lilindi!”
15Neke uPetulo amulongelage atigilage, “Utuganulile ikihwananidzo kya fiinu ifikumuhulila umuunu avedze lupumba.” 16UYesu akuvahigaga iitigilaga, “Na yuunye mwave musikulufika? 17Musikulufika ukutigila, kikivedzaga ikiikwingila mu mulomo, kiikwingila mu lileme neke ku wusililo kiihuma kwivala? 18Neke kangi ifiihuma mu mulomo gwa muunu, fiihuma mu numbula yaakwe, fye fyene ifikumuhulila lupumba. 19Ukuhuma mugati mu numbula ya muunu, mwe mwene mwe giihuma amahoodzo amaviifu, uwuwuladzi, uwudumuli-noolane, uwugoni, uwuhiidzi, uwoolesi wa wudesi na maligo. 20Dzonda idzo, dze dzeene idzikumuhulila lupumba. Neke kangi asiivedza lupumba, pakuva iiliya kitakalava amawoko.”
Ulufuuwo lukomi lwa mwayuuva ye asili Muyahudi
(Maluko 7:24-30)
21UYesu aahegile apo, iihelelaga ku mugoola gwa Tilo nu gwa Sidoni.#15:21 Tilo…Sidoni Idzi dzaali ndzenge ngomi dza avasili Vayahudi. 22Lolage, umwayuuva yumwinga uMukananayo ye iikalaga uko, aaheliye kwa Yesu, iiyovaga iitigilaga, “Mutwave, Muswamuve va Dawudaave, ungaamyanila! Umwali-vangu íibiitwe ni mibepo imiviifu.” 23Neke kangi uYesu atanage ukulonga lidzwi lilivedzaga. Avanyigendwa vaakwe vakumuhelelelaga, vakumunyilikaga viitigilaga, “Umulongele ahelelage, pakuva umwayuuva uyu iihula umwango kumbele ukwesu.” 24Akuvahigaga iitigilaga, “UNguluvi áanumile ukuvapoka aVaisilaheli, hiilo ávayagile ngita ngʼolo.”
25Umwayuuva uyo iikwadzaga, iifugamaga pawutalo pa Yesu, iinyilikaga iitigilaga, “Mutwave, ndikukunyilika uunange!” 26UYesu akumuhigaga iitigilaga, “Si lunofu ukunyamula ikyakuliya kya vaana nu kusopela imbuwa.”#15:26 Vaana…imbuwa UYesu pe iitambula vaana, iihwananidza na Vayahudi, enewuli avanyigendwa vaakwe. AVayahudi viiwonaga ukutigila vaginalifu ukulutila avasili Vayahudi avangi, pe vakuvahwananidza ngita mbuwa. 27Umwayuuva uyo iitigilaga, “Eena Mutwave, neke kangi nadzi mbuwa nadzo, dzaadziliya utuwuluwulu utwiguwa paanyi ukuhuma pa fitagala ifya vatwa vaawo.” 28UYesu akumuhigaga iitigilaga, “Ve mwayuuvaave, uli nu lufuuwo lukomi hiilo! Luhadza lwivedza ewo, ngita kye wiisaka.” Umusika guugo, umwalive uyo iiponaga.
UYesu akuvananiya avatamwa voloofu
29Neke uYesu ahegage apo, apilukage ku nyandza ya Galilaya, iinukage ku kidunda, iikalage paanyi. 30Avaanu voloofu hiilo viihelelaga kwa Yesu, viihelelaga na vakitagenda, avabofu, avatenda imivili, avakitalonga na vatamwa avangi voloofu, vakuvaviikaga pa magulu ga Yesu, nave akuvananiyaga. 31Avaanu viidzumaga mbandu pe viiwona avakitalonga viilonga, avatenda imivili viipona, avakitagenda viigenda na vabofu viilola. Neke vamupeelage indolo uNguluvi va Vaisilaheli.
UYesu akuvaliisa avaanu mbilima dzitayi
(Maluko 8:1-10)
32Neke uYesu avakemeelage avanyigendwa vaakwe, avalongelage atigilage, “Ndikuvawonela lusungu avaanu ava, pakuva víikalile naane figono fidatu, lino vangaya kyakuliya. Ngana ndivatawule vahelelage ku ndzenge dzaawo vali nu musale, viisunga vadzilike mu ngʼaasi.”
33Avanyigendwa vaakwe vakumuwuudzaga viitigilaga, “Apa padaasi, tuhadza tukugiwona kwiya imikaate igiikwila avaanu voloofu ngita ava?” 34UYesu akuvawuudzaga iitigilaga, “Muli nagyo mikaate gilinga?” Viihigaga viitigilaga, “Tuli nagyo imikaate mufungʼati (7) nu tusomba tukeefu.” 35UYesu akuvalagidzaga avaanu vonda viikale paanyi. 36Neke anyamulage imikaate mufungʼati igyo nu tusomba uto, ahongedzage kwa Nguluvi, amegulingʼasage, avapeelage avanyigendwa vaakwe, navo vakuvagavilaga avaanu avo. 37Avaanu vonda viiliyaga, vakwigutaga. Avanyigendwa viilundasaga utuwuluwulu utwasigiye, fiimemaga fihiivi mufungʼati. 38Avaanu avaaliye vaali vamwadaada mbilima dzitayi (4,000) kitavalila avamwayuuva na vaana. 39UYesu pe aaviye ávatawuwe avaanu vahelelage, iikwingilaga mu waato, iihelelaga ku mbali idza wudzenge wa Magadani.
Currently Selected:
Matayo 15: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
