Matayo 14
14
Imifwile gya Yohana uMudzabisi
(Maluko 6:14-29; Luka 9:7-9)
1Mu musika ugo, umutwa Helode#14:1 Helode Uyu ye Helode Andipa, ye aali mutwa va mugoola gwa Galilaya nu gwa Peleya. aapuliike imola dza Yesu. 2Neke avalongelage avalimila-vangi vaakwe atigilage, “Uyo ye Yohana uMudzabisi, ádzulubwiswe ukuhuma ku wulungu. Kye kileka avedzage ni ngufu idza kuhuufya ifilole.”
3UHelode uyo aali ámwibiite uYohana uMudzabisi nu kumudindila mu ndinde. Aalimile ewo, pakuva aali ámutoolile uHelodya, umudala va Filipo umaamiye. 4UYohana amukenyelaga uHelode aatigilaga, “Lusiikwidikwa mu milagililwe gya Mose, uveeve ukumutoola umudala va maamo!”#Valevi 18:16; 20:21 5UHelode aasakaga ukumukoma uYohana, neke kangi oogopaga, pakuva avaanu vamudzeeliye uYohana uMudzabisi ukutigila muvidzi.
6Umusika gwa lukeelanilo lwa kuholwa kwa mutwa Helode, umwalive Helodya iikinaga pawutalo pa vagendzi, ulo lukumukeeledzaga mbandu uHelode. 7Neke amuhuuvidzage pa kuyiiga ukumupeela umuhindza uyo kikivedzaga kye ahadza akumunyilika. 8Umuhindza uyo pe aaviye áfundiilwe nu ngʼina ikya kunyilika, akumulongelaga uHelode iitigilaga, “Uumeele umutuwe gwa Yohana uMudzabisi mu luhelo.” 9Umutwa uHelode iihuguvalaga mbandu, neke kangi, pakuva aali áhuuviidze pa kuyiiga pa miiho ga vagendzi, iilagidzaga ukutigila umuhindza uyo apeelwe umutuwe ugo. 10UHelode iilagidzaga ukutigila, uYohana akadumulwe umutuwe mu ndinde. 11Suwe umutuwe gwa Yohana gwileetwaga mu luhelo, iipeelwaga umuhindza uyo, nave akumusindikilaga ungʼina umutuwe ugo. 12Avanyigendwa va Yohana viihelelaga kunyamula umufimba, vakugusiilaga. Neke vahelelage kumulongela uYesu ulo úluhumiye.
UYesu iiliisa avaanu voloofu
(Maluko 6:30-44; Luka 9:10-17; Yohana 6:1-14)
13UYesu pe aapuliike ulo, iihegaga apo mu waato, iihelelaga apoono apangaya vaanu. Neke kangi avaanu pe vaapuliike kwe áheliye, viigendaga lwa magulu ukuhuma mu ndzenge, vakumuniniilaga uYesu kwe agenda. 14UYesu pe iihuma mu waato, akuliwonaga ililugu lya vaanu, akuliwonelaga lusungu, akuvananiyaga avatamwa vaawo.
15Pa kyamihe, avanyigendwa vaakwe vakumuhelelelaga, vakumulongelaga uYesu viitigilaga, “Apoono apa padaasi, ikilo yíhegeliye. Uvatawule avaanu ava, ukuta vahelele vakiigulile ikyakuliya ku mbala.” 16UYesu akuvahigaga iitigilaga, “Vatane ukuhelela. Muvapeele yuunye ikyakuliya.” 17Aveene vakumuhigaga viitigilaga, “Tuli ni mikaate#14:17 Mikaate Iki kyali kyakuliya kya figono fyonda ku Vayahudi. gihaanu ni somba dzivili swe.” 18UYesu akuvalongelaga iitigilaga, “Muundeetele apa.” 19Neke avalagidzage avaanu ukutigila viikale pa lusoli. Iinyamulaga imikaate gihaanu igyo ni somba dzivili, iilolaga kukyanya, akufifuunyililaga. Neke amenyulage imikaate, avapeelage avanyigendwa vaakwe, navo vakuvagavilaga avaanu. 20Avaanu vonda viiliyaga nu kwiguta. Neke avanyigendwa vaakwe valundasage utuwuluwulu utwasigiye, vamemyage ifihiivi finyikyumi ni fivili (12). 21Avaanu avaaliye ikyakuliya ikyo, vaali vagoosi mbilima dzihaanu (5,000) kitavalila avamwayuuva na vaana.
UYesu iigenda pakyanya pa lulenga
(Maluko 6:45-52; Yohana 6:15-21)
22Baaho na baaho, uYesu akuvasungʼanidzaga avanyigendwa vaakwe viingile mu waato, vamulongole ukulowoka imwambu ya nyandza ya Galilaya, umusika pe akwilaga ni lilugu lya vaanu. 23Aaviye íilagile ni lilugu ilyo, iikwinukaga mwene ku kidunda, ukuta akalapangile. Pe yaafikile ikilo, aali ásigiye mwene ku kidunda. 24Umusika ugo, uwaato uwo waali pagatinagati pa nyandza, waatowaga na mavingo, pakuva ilivelo likomi lyapugaga. 25Pe yiitema yinyavambula, uYesu akuvahelelelaga avanyigendwa vaakwe iigenda pakyanya pa lulenga. 26Neke kangi avanyigendwa vaakwe pe vamuweene uYesu iigenda pakyanya pa lulenga, viikoogopaga hiilo nu kukoola viitigilaga, “Limulungu!” 27Baaho na baaho, uYesu akuvalongelaga iitigilaga, “Mwikangadze inumbula, ye neene. Mutane ukoogopa.” 28UPetulo akumuhigaga iitigilaga, “Mutwave, ngana ye veeve ndakyene, uungʼemeele ukuta ndaadze ukwako ndiigenda pakyanya pa lulenga.” 29UYesu akumuhigaga iitigilaga, “Waadze.” Neke uPetulo ahumage mu waato uwo, agendage pakyanya pa lulenga, ahelelage kwa Yesu. 30Neke kangi pe aaweene ilivelo likomi liipuga, iikoogopaga hiilo, iivangaga ukudwivala mu lulenga. Iikoolaga iitigilaga, “Mutwave, uumoke!”
31Baaho na baaho, uYesu iigolosaga iliwoko akumwibataga, akumulongelaga iitigilaga, “Uveeve ye uli nu lufuuwo lukeefuave, kye kiki uli nu wugayagaya?” 32Navo pe viingiye mu waato, ilivelo ilyo liilitamaga. 33Neke avanyigendwa avaali mu waato, vamugondamilage uYesu vatigilage, “Ndakyene uveeve uli Muswamuve va Nguluvi!”
UYesu akuvananiya avatamwa
(Maluko 6:53-56)
34UYesu na vanyigendwa vaakwe pe vaaviye válowiike inyandza, viifikaga mu nyi ya Genesaleti. 35Avaanu va uko pe vaakaguwe ukutigila ye Yesu, viitagalidzaga imola dzaakwe imbali dzonda. Neke avaanu vamuleetelage avatamwa vonda. 36Navo vamugongoolaga uYesu, ukuta avaleke avatamwa vamupamyage hela mu mudzivo gwa mwingila gwakwe. Na vatamwa vonda avamupamyaga, vaaponaga.
Currently Selected:
Matayo 14: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
