Yohana 11
11
Ukufuwa kwa Lasalo
1Aali pwali umuunu yumwinga mutamwa, ye aatambulwaga Lasalo. Iikalaga pamwinga na vahaadzave uMaliya nu Malita mu luvala lwa Betaniya. 2UMaliya uyo, ye mwene ye amubakile amafuta ga lunuusi lunofu uMutwa nu kupolosa mu magulu ni fwili dzaakwe.#Yohana 12:1-8 ULasalo ye aatamiike, aali muhaadzave. 3Neke uMaliya nu Malita vatumage umulomo kwa Yesu ugwitigila, “Mutwave, umudzeela vaako uLasalo mutamwa.” 4UYesu pe aapuliike ulo, iitigilaga, “Uwutamwa uwo si wa kumukoma uLasalo, nda haamu, wiiwoneesa indolo dza Nguluvi, ukuta uMuswamuve va Nguluvi aanukile indolo wugendela wa wutamwa uwo.”
5UYesu aveendile uMalita nu Maliya pamwinga nu muhaadza-vaawo uLasalo. 6Suwe uYesu pe aapuliike ukutigila uLasalo mutamwa, iisigalaga figono fivili kuuko kwe aali. 7Neke avalongelage avanyigendwa vaakwe atigilage, “Tuhelele kangi ku Yudeya.” 8Avanyigendwa vaakwe vakumuhigaga viitigilaga, “Muwulanidzaave, umusika mukeefu hela aVayahudi vakiisakaga ukukutova na maganga. Kye kiki wiisaka ukuhelela kuuko kangi?”
9UYesu akuvahigaga iitigilaga, “Ongo, imuunyi yisili ni fivalilo finyikyumi ni fivili (12)? Ngana umuunu iigenda pa muunyi, asikwikuvadza, pakuva akufiwona fyonda mu lumuli lwa pe naanyi apa. 10Neke kangi umuunu ye iigenda pakilo, akwikuvadza, pakuva ali hela ulumuli ulo.”#Yohana 9:4-5
11Pe aaviye álongile idzo, akuvalongelaga avanyigendwa vaakwe iitigilaga, “Umudzeela veesu uLasalo ágoneeliye, lino ndiihelela kumulamusa.” 12Avanyigendwa vaakwe vakumuhigaga viitigilaga, “Mutwave, ngana ágoneeliye, ahadza iinana.” 13UYesu apa aali álongile ukutigila, uLasalo áfuwe, neke kangi avanyigendwa vaakwe vahoodzage ukutigila iilonga ukutigila, ágoneeliye hela.
14Neke uYesu avalongelage pa weelu atigilage, “ULasalo áfuwe. 15Neke kangi uneene ndiikeela, pakuva sindikali pwali pe iifuwa, ukuta muufuuwage uneene. Lino tuhelele ukwakwe.” 16Neke umunyigendwa yumwinga uTomasi, ye aatambulwaga Munya wungungu, avalongelage avanyigendwa vayagwe atigilage, “Na yuufwe tuhelele, ukuta tukafwilase.”
UYesu ye ludzulubuko nu wuumi
17UYesu pe aafikile ku mugoola gwa Yudeya mu luvala lwa Betaniya, akumuwonaga uLasalo ámalile figono fitayi mu mombwe. 18Uluvala lwa Betaniya lwali ngita kilometa dzidatu wuli ukuhuma ku Yelusalemu. 19AVayahudi voloofu ukuhuma ku Yudeya, vaali váadzile ku Betaniya kuvanyaamadza uMalita nu Maliya, wiimila wa kufuwa kwa muhaadza-vaawo uLasalo.
20UMalita pe aapuliike ukutigila uYesu ali mu ngʼaasi, iihelelaga kumwanukila, neke kangi uMaliya asigalage pa nyumba. 21UMalita akumulongelaga uYesu iitigilaga, “Mutwave, ngana ukali uvedze pwali, umuhaadza-vangu ngali siafuwe. 22Nambe lino ndiidzeela ukutigila, kikivedzaga kye ukumunyilika uNguluvi, ahadza akukupeela.”
23UYesu akumuhigaga iitigilaga, “Umuhaadzawo ahadza iivedza muumi kangi.” 24UMalita iilongaga iitigilaga, “Mutwave, ndiidzeela ukutigila uNguluvi, pe alaadzulubusa avaanu ikigono ikya wusililo, nu muhaadza-vangu nave alaadzulubuka nu kuvedza muumi ikigono ikyo.” 25UYesu akumuhigaga iitigilaga, “Uneene ndili ludzulubuko nu wuumi. Umuunu ye avedzaga ye akuufuuwa, nde avedze iifuwa, iivedza muumi. 26Ye avedzaga ye ali muumi, kangi akuufuuwa asilaafuwa mbeepali. Wiifuuwa ulo?” 27UMalita akumuhigaga iitigilaga, “Ndakyene Mutwave, ndiifuuwa ukutigila uveeve ve Mesiya, Muswamuve va Nguluvi, ye twahuuvilaga ukutigila, iikwadza pe naanyi apa.”
UYesu iivemba
28UMalita pe aaviye ámulongiye idzo uYesu, iihelelaga kumukemeela umunungʼuve uMaliya. Neke amulongelage pa lubali atigilage, “UMuwulanidzi pwali apa, akukukemeela.” 29UMaliya pe aapuliike idzo, iikwimaga kisaatu, iihelelaga kwa Yesu. 30UYesu aali asinaa afika mu luvala lwa Betaniya ulo, neke kangi aali apila apoono pe aaheliye ukwanukilwa nu Malita. 31AVayahudi avo avaali váheliye kumuwona nu kumunyaamadza uMaliya, vakumuwonaga iilamuka, iihuma kwivala. Suwe vakumuniniilaga, pakuva vaahoodziidze ukutigila, uMaliya iihelela ku mombwe ukuta akavembele uko.
32UMaliya pe aafikile pe agenda uYesu, akwigwisaga pa magulu gaakwe, akumulongelaga iitigilaga, “Mutwave, ngana ukali uvedze pwali, umuhaadza-vangu ngali asifuwe.” 33UYesu pe amuweene uMaliya iivemba, na Vayahudi avaali váadzile pamwinga nave, navo viivemba, iiviipaga#11:33 Iiviipaga Ikiganulo ikingi kiitigila iihuguvalaga, neke kangi uYesu aaviipile wiimila wa wukitafuuwa wa vaanu avaali apo. nu kunyengʼemala hiilo. 34Neke avawuudzage atigilage, “Múmuviikile kwiya?” Vakumuhigaga viitigilaga, “Mutwave, waadze ulole.” 35UYesu iivembaga. 36Neke aVayahudi avo vatigilage, “Lolage kye akamwendile uLasalo!” 37Neke kangi avangi mu avo vatigilage, “Umuunu uyu ye mwene ye akamudinduwe amiiho umubofu yula, ongo, álemiilwe ukutanidza uLasalo atane ukufuwa?”
UYesu akumudzulubusa uLasalo
38Neke uYesu afikage ku mombwe, kuno apila áviipile. Imombwe iyo yaali manga iyaadindiilwe ni liganga likomi pa mulyango. 39UYesu akuvalongelaga avaanu avaali apo iitigilaga, “Mubiilusile pa lubali iliganga ilyo.” Neke uMalita umuhaadzave va ye áfuwe, amuhigage atigilage, “Mutwave, lino umufimba gwivedza gúvangile ukunuungʼa, pakuva fídzumbile figono fitayi ukuhuma pe tukamuviikile mu mombwe.” 40UYesu akumulongelaga iitigilaga, “Ongo, sindikulongiye ukutigila, ngana ukuufuuwa uneene, uhadza ukudziwona indolo dza Nguluvi?”
41Neke vabiilusilage pa lubali iliganga ilyo. UYesu akwinamulaga amiiho kukyanya, iilapangilaga kwa Nguluvi iitigilaga, “Ve Daada, ndikukuhongedza, pakuva úpuliike indapangilo dzangu. 42Ndiidzeela ukutigila, ukuumulika umusika gonda, neke kangi ndiilonga idzi wiimila wa lilugu lya vaanu ava, ukuta vafuuwe ukutigila ye veeve ye úunumile.”
43UYesu aaviye álongile idzo, iikwinusaga isawuti, iikemeelaga iitigilaga, “Lasalo, uhume kwivala!” 44Neke uyo ye aali áfuwe, ahumage kwivala, kuno ápilingiidzwe imyenda imivalafu mu magulu na mu mawoko, kangi vámugubiike na kenda ku miiho. UYesu akuvalongelaga avaanu avo iitigilaga, “Mumuwopole imyenda igyo, mumuleke ahelelage.”
Imigelanihidze gya kumukoma uYesu
(Matayo 26:1-5; Maluko 14:1-2; Luka 22:1-2)
45AVayahudi voloofu avaadzile mu kumunyaamadza uMaliya, pe valuweene lwe álimile uYesu, vakumufuuwaga. 46Neke kangi aVayahudi avangi vahelelage ku Vafwalisayo kuvalongela dze álimile uYesu. 47Neke avateekedzi avakomi na Vafwalisayo vakemeelage ikiwungu kya Vayahudi, viiwuudzage vatigilage, “Tulime kiki? Umuunu uyu iihuufya ifimanyilo fyoloofu. 48Ngana tukumuleka aginage ukuhuufya ifimanyilo ifyo, avaanu vonda vahadza vakumufuuwa, na Valoma viikwadza vaanange fyonda, inyi yeesu ni tembeli.”
49Neke yumwinga mu kiwungu ilitaawa lyakwe Kayafwa, ye aali muteekedzi umuvina#11:49 Muteekedzi umuvina Lole Avateekedzi ku Figanulo. va mwaka ugo, avalongelage atigilage, “Unyeenye musiidzeela kikivedzaga! 50Musiidzeela ukutigila, lwivedza luwumbulilo ukwenyo ngana umuunu yumwinga afuwe wiimila wa vaanu vonda, si ngita avaanu vonda vatipulwe?” 51UKayafwa asaalongile idzo ukuhuma mu mahoodzo gaakwe, nda haamu, aalongile idzo ukuvila, pakuva aali muteekedzi umuvina va mwaka ugo. Aavilile ukutigila, uYesu ahadza iifuwa wiimila wa nyi iya Vayahudi iyi. 52Kangi uYesu asifuwa wiimila wa nyi iyo yeene, nda haamu, wiimila wa vaana va Nguluvi ávapalaangʼiine, ukuta avalundase vonda vavedzage pamwinga.
53Ukuhuma ikigono ikyo, avalongodzi va Vayahudi viivangaga ukutemula ingʼaasi ya kumukomela uYesu. 54Wiimila wa ulo, uYesu iilekaga ukugenda pa weelu mu Vayahudi. Neke lino, ahegage, ahelelage biihi nu lungʼalangʼala, ku wudzenge wa Efulayimu, iikalasage na vanyigendwa vaakwe uko.
55Ikyaka kya Paasaka ya Vayahudi kyali biihi. Avaanu voloofu vaahegile ku ndzenge dzaawo, viihelelaga ku Yelusalemu pe yisinaa yifika iPaasaka wiimila wa kwivaladza.#11:55 Kwivaladza AVayahudi vaasakulwaga kwivaladza, pe kisinaa kivanga ikyaka kya Paasaka. 56Neke vavangage ukumutemula uYesu nu kwiwuudza, pe vaalundiine pamwinga mu lipaala lya tembeli, vatigilage, “Unyeenye mwihoodza kiki? Umuunu uyo iikwadza mu kyaka iki, enewuli asaadza?” 57Vaalimile ewo, pakuva avateekedzi avakomi na Vafwalisayo vaali válagiidze ukutigila, umuunu ye avedzaga ye iidzeela kwe agenda uYesu, avalongelage, ukuta vakamwibate.
Currently Selected:
Yohana 11: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
