Mathew 24

1Naŋ i Jesus me rowo lue nan o vatine we roŋo we gisraka; wa ira tiŋqoro anana me niŋa ma suria si a gaganag munia o vat me wosowoso ape vatine we roŋo si we savai. 2Pa ni me valui, ti vet muneira wa, Kamiu gate ilo o gene ŋaŋ iloke? we nun nau we vava mun kamiu wa, Tete tivtag tea iake o vat tuwale avune vat, wa gate sese savrag siwo.

3Paso nan ni me pute siwo a tauwe Olivet, wa ira tiŋqoro me niŋa ma suria alo pupuel, we vet wa si, Si ka gaganag mun kamam, o gene ŋaŋ ilone te wesu aŋaisa? wa o sava o vaglala ape nom o ŋaŋalue ma, wa ape te ge vunvun o marama? 4Naŋ i Jesus me valui gorora we vava muneira wa, Tur ilo nan sei wa valera ikamiu. 5Ape we qoqo te mule ma alo sasak we vava si, Inau i Christ; wa neira te valeraira we qoqo. 6Wa rigrig kamiu te roŋotag ape vagvagalo wa o roro vagalo ŋaŋ; wa tur ilo apena nan natoqamiu wa matikotiko apena; ape tete ava lai pa si te tamaine; nava o ulusui tagai tiqa. 7Ape o sul te tavaraka goro o sul, wa o marana goro o marana, wa o maro wa o rir alo tuan vanua. 8Wa iloke nol o qeteg vivtig nake. 9Pa alo ine neira te ukeg vano kamiu ilo ganawono, wa neira te vus mate kamiu, wa kamiu ira gene soŋus amaira veve sul nol o manigiu nasasak. 10Wa alo ine te ge tutuagira we qoqo, wa te varmaniriŋ neira, wa te varsoŋus.

11Wa o prophet galegale te tavaraka we qoqo, wa te valera neira we qoqo; 12wa ape togara kiskislag me lul o tapeva tamaira sul te mamarir kel. 13Pa isei qe goara taso gai niŋa o ulusui, te ge esu i gene ilone apena. 14Wa te maŋasag lue o lea we wia iloke tape marana alo marama nol mun vaglala mun o veve sul nol, wa paso nan o ulusui qara wesu ma.

15Wa o manigiu o ine, alo si kam qe ilo o gene vasigtag te ge wou, i Daniel o prophet me vava ti apena, we tira alo vatine we roŋo — pa i gene we vasogo ni nonom nurnur apena — 16alo ine nane irasei ŋaŋ ta toga a Judea neira toa i tauwe ŋaŋ; 17wa i gene ta toga avawo ima nipea we vara taqel si a taur reag o gene ŋaŋ alo imana; 18wa i gene alo utag, nipea vusiag kel si a sau kalo non o siopa. 19Pa magarosa raro gene we tiana, tara raro gene o natmera amaira ape sus alo qoŋ ŋaŋ ilone! 20Wa tur tataro nan nomiu o qoŋ toatoa wa wesu alo rara, si alo qoŋ mapsag. 21Ape o ganawono liwoa alo qoŋ ŋaŋ ilone, wa gate ge tiqa tamaine alo qeteg marama ran ma gai niŋa ilokenake, wa tete lai mulaŋ aŋaisa. 22Wa ta tete vakokot o qoŋ ŋaŋ ilone o visogoi nol tete esu lai; nava o manigiu ira iloraka te vakokot o qoŋ ŋaŋ ilone. 23Alo ilone si isei qe vet mun kamiu wa si, Ilo, i Christ iloke, si, Iloke, turpea nomtupua. 24Ape ira Christ galegale ŋaŋ tara prophet galegale te tira raka, wa te la o vaglala ŋaŋ we poa wa o vasasa, si a valera ira ilo raka, si ta lai. 25Tur nonom momiu apena, nau me gaganag moai mun kamiu. 26Pa si isei qe vet mun kamiu wa, Ilo ma, ineia alo vanua vanameag, turpea serelue; si, Ilo ma, alo nin, turpea nomtupua. 27Ape tam o vila ti rowolue ape tano rowone loa wa ti gapilwaŋa niŋa ape tano tulne loa, tamaine gina o ŋaŋalue ma non i Nat tanun. 28Pa natamatera tanun qe avea, o mala ŋaŋ te vug tuwale aia.

29Naŋ o ganawono tape qoŋ ŋaŋ ilone me paso, wa tete maul, pa te siliga goro o loa, wa o vula tete ukeg nasarina ma, wa o vitu ŋaŋ te masu ma alo tuka, wa o gene mana ŋaŋ avunana te mariŋoriŋo. 30Wa alo ilone o vaglala non i Nat tanun te ŋaŋalue alo tuka: wa o veve ŋaŋ a marama te taŋitaŋi; wa ineira te ilo i Nat tanun we mule ma vawo maligo talo tuka mun o mana wa o leŋas we poa. 31Wa ni te vatraŋ ira angel anana at mun o liŋe tauwe liwoa, wa neira te vile tuwale ira ilo raka anana nan o matelaŋ nivat, nan o ulus tuka ma gai niŋa o ulus tuka mulaŋ.

32Pa tur lolomaran o vavae tenegag iloke ape fig; alo si o salitiu qe qeteg quloquloga apena, wa ti awisiga raka, kamiu we gilala momiu si o magoto arivtag ma; 33wa tamaine kamiu, alo si kam qe ilo o ine ŋaŋ, te gilala momiu si neia me rasu veta ma ape mateima. 34We nun na we vava mun kamiu wa, O taraŋiu iloke tete sarapun lai, o gene nol ŋaŋ iloke gai wesu. 35O tuka wa o tano te sarapun, nava nok o vavae ŋaŋ tete sarapun lai.

36Nava isei tuwale gate gilala ape qoŋ wa o masao qoŋ ilone, wa o angel ŋaŋ tavunana tagai, nava i Tamak magesena. 37Pa tama naqoŋin Noa, tamaine gina mulaŋ o ŋaŋalue ma non i Nat tanun. 38Ape tama neira me togatoga alo qoŋ ŋaŋ o moai rowo nan o liliv, we ganagana wa we imaima, we laglag, we togatoga amairasei, gai qoŋ nane ilone i Noa me vega kalo ilo aka alolona; 39wa neira gate gilala o liliv gai liliv, wa me gora savrag qet neira; te tamaine mulaŋ gina o ŋaŋalue ma non i Nat tanun. 40Alo ine pulrua te toga alo utag, te la raka i tuwale wa te rakavtag i tuara. 41O vavine nirua te galolo alo tano galgalolo, te la raka i tuwale wa te rakavtag i tuara. 42O manigiu o ine tur mamata goro, ape kamiu gate gilala alo sava masao qoŋ i Lord ikamiu we mule ma alolona. 43Pa tur gilala momiu o ike wa, si i tagiima me lolomaran ape sava masao mamamata o tanun pal te mule ma alolona, ni me mamata goroa lai, wa ni gate ukeg naimana si neira a tike sau. 44Wa o manigiu o ine kamiu mulaŋ tur toga taurmate; ape o masao qoŋ kamiu gate nonom apena i Nat tanun te mule ma alolona.

45Naŋ isei gai o rowrowovag ilone we kokomag wa we matanur, i tagina me vonogia ti avunara talo imana, sin tirag gar o sinaga muneira alo qoŋira? 46Tur wia o rowrowovag ilone, i tagina ta kel ma, te ilo suaria we gagapalag tamaine; 47we nun nau we vava mun kamiu wa, ni te vonogia avune pulan o savasava ŋaŋ. 48Pa si o rowrowovag ilone we malkeke qe vava alo toqana wa si, I tagik we maul alo we mule ma, 49wa sin qe vusvus raka ira valuna, we qeteg ganagana wa we imaima amaira maleslesu; 50i tagin i rowrowovag ilone te kel ma alo qoŋ ni gate narea alolona, wa alo masao qoŋ ni gate gilala apena, 51wa te sal wora neia, wa te la natanona amaira sokoi goro; o areare aia wa o garagara ŋiŋiŋ.

Currently Selected:

Mathew 24: MOTA

Highlight

Copy