Mathew 25

1Naŋ alo ilone te tenegag ape marana tavunana si tama o malamala pul saŋavul tuwale, me taur nor o pul, we rowolue si a varniŋa i lag. 2Naŋ tavelima nan neira we matanur, nava tavelima o qure. 3Ape iraro qure me la nor o tano pul, nava gate la ilo o ligiu amaira. 4Pa iraro matanur me la ran o ligiu alo nor o tano ligiu, mun nor o tano pul. 5Naŋ alo i lag we maumaul, ineira nol me matmatuav, we matmatur. 6Nava alo tine qoŋ o rorovia wa, Ilo, i lag veta ma; tur rowolue ma si a varniŋa neia. 7Naŋ alo ilone iraro malamala nol ilone me tavaraka, me wurvag nor o pul. 8Naŋ iraro qure me vet muraro matanur wa, Tur le tea ma o tuan ligiu tamen kamiu; ape nomam pul ŋaŋ we matemate. 9Nava iraro matanur we valuira we vet wa, Nipea nane, tete tira wun apen kamam wa apen kamiu; nava tur vano sur ra tuvatuvag, tur la momiu amaira. 10Naŋ alo neira qale mule wolwol i lag me niŋa ma; wa iragai me taurmate veta me kalo pata amaia ilo wosolagia; pa me tipag goro o mate ima. 11Paso nan a tagir o malamala ŋaŋ ilone qale toga me mule mora ma, we vet wa, Lord, Lord, ka waka mun kamam. 12Nava ti valui ti vet wa, We nun na we vava mun kamiu wa, Na gate gilala ikamiu. 13O manigiu o ine tur mamata goro, ape kamiu gate gilala o qoŋ si o masao qoŋ i Nat tanun we mule ma alolona.

14Ape we tama o tanun te mule te vanua, wa ni we suware ma suria ira tur rowrowovag anana, ti la valval mun neira non o savasava ŋaŋ. 15Wa ni me la munsei o talent tavelima, wa munsei nirua, wa munsei tuwale; ti la mun valsei we sasarita ape ni we gagapalag mona lai; paso nan ni qara gisraka te vanua. 16Naŋ gate maul, i gene me taur o talent tavelima ti ti mule, ti gagapalag nia, ti ge tuan mulaŋ o talent tavelima. 17Tamaine mulaŋ gina i gene me la mona ti nirua, me wane mona mulaŋ nirua. 18Wa isei me la ti tuwale, ti van reag, ti gil o tano, ti vatŋorag o som napulan tagina. 19Wa o masaoi we tole me paso i tagira rowrowovag ilone we kel ma, we nunug raka ape pug amaira. 20Wa i gene me taur o talent tavelima ti, me mule ma we vile tuan o talent tavelima mulaŋ, ti vet wa, Lord, ko me map munau o talent tavelima; pa ilo, na me wane tuan ma tavelima. 21Naŋ i tagina me vet munia wa, Aia, matai rowrowovag we kokomag, ape ko me kokomag goro moma o gene o tapai, na te mapuko avune gene ŋaŋ we qoqo; kalo pata ma ilo malakalaka non i tagima. 22Wa i gene mulaŋ o talent nirua amaia ti mule ma suria, ti vet wa, Lord, ko me map munau o talent nirua; pa ilo, na me wane tuan ma nirua. 23Naŋ i tagina me vet munia wa, Aia, matai rowrowovag we kokomag, ape ko me kokomag goro o gene o tapai, na te mapuko avune gene ŋaŋ we qoqo; kalo pata ma ilo malakalaka non i tagima. 24Wa i gene mulaŋ me taur o talent tuwale ti, ti mule ma suria ti vet wa, Lord, na we gilala iniko o tanun wasmata, ko we gorogoro avea ko gate riv moma ti, wa ko we sogon tuwale avea ko gate savsavur ti. 25Wa na me gogolo apena, me mule, me vatŋorag nom o talent alo tano; ilo, ka taur nanoma. 26Naŋ i tagina ti valuia, ti vet wa, Rowrowovag we tatas wa we maraŋ, ko me gilala ape nau we gorogoro avea na gate riv ti, wa nau we sogon tuwale avea na gate savsavur ti. 27Pa amoma si ka tawe ira gagapalag ape som mun nok o som, wa na qe kel ma, te taur kel napulak me rowo lava ti mun nau apena. 28O manigiu apena tur lareag nania o talent, tur la mun i gene o talent saŋavul tuwale amaia. 29Ape te tuan mulaŋ mun valsei me taur veta, wa ni te taur sal; wa isei qe tete taur, te lareag nania o sava tea mulaŋ ta amaia. 30Wa tur savrag reag i rowrowovag me mawmawui sasawuara ilo silsiliga a varea, o areare aia wa o garagara ŋiŋiŋ.

31Pa aŋaisa i Nat tanun te mule ma alo leŋasina wa ira angel nol amaia, wa ni te pute vawo tano leŋasina; 32wa o sul nol ŋaŋ te gogorag tuwale goro nanagona, wa ni te aseg wora ineira tama i altag goro sheep ŋaŋ we aseg wora o sheep ŋaŋ nan o goat ŋaŋ. 33Wa te map o sheep ŋaŋ alo matuana wa o goat ŋaŋ alo galaona. 34Naŋ i maranaga te vava mun ragai alo matuana wa, Ragai, ira gene vawia amon Tamak, tur van ma, tur taur usurag momiu o marana me ge taurmate ti mun kamiu alo me map o sagere marama ma. 35Ape nau me maliŋsala, wa kamiu me vaŋan nau; nau me marou, wa kamiu me le mak o pei ma; nau me salavano, wa kamiu me lav vasgot nau. 36Nau me masara, wa kamiu me saru goro nau mun o siopa; nau me gopa, wa kamiu me vaatev inau; nau me toga alo ima rotrot, wa kamiu me va ilo nau. 37Naŋ ira taniniga te valui te vet wa, Lord, alo sava kamam me iloko o maliŋsala wa ikamam me vaŋaniko; si we marou wa me le mam o pei? 38Alo sava ikamam me iloko o salavano wa me lav vasgotiko; si o masara wa me saru goroko? 39Alo sava ikamam me iloko we gopa, si alo ima rotrot, wa me va iloko? 40Naŋ i maranaga te valuira te vet wa, We nun nau we vava mun kamiu wa, Apen kamiu me ge tamaine mun i tuwale amaira tatasik iloke mantagai aneane, kamiu me ge munau. 41Paso nan ni te vava muragai alo pane galao wa, Ira vivnag, tur van reag nan nau ilo av galava me ge taurmate mun Satan tara angel ŋaŋ anana. 42Ape nau me maliŋsala, wa kamiu gate vaŋan ilo inau; nau me marou, wa kamiu gate la mak o pei ma. 43Nau me salavano, wa kamiu gate lav vasgot nau; nau me masara, wa kamiu gate saru goro inau; nau me gopa, wa me toga alo ima rotrot, wa ikamiu gate vaatev inau. 44Naŋ neira mulaŋ te valuia wa, Lord, anaŋaisa kamam me iloko we maliŋsala, si we marou, si o salavano, si we masara, si we gopa, si alo ima rotrot, wa kamam gate tataga suriko? 45Naŋ alo ilone ni te valuira te vet wa, We nun nau we vava mun kamiu wa, Apen kamiu gate ge tamaine munsei tuwale tamaira tatasik iloke we mantagai aneane, kamiu gate ge munau. 46Wa iloke ŋaŋ te van reag ilo tano sarsar galava, pa ira taniniga ilo esu galava.

Currently Selected:

Mathew 25: MOTA

Highlight

Copy