Mathew 22

1Naŋ i Jesus me valui gorora me vava muneira mulaŋ alo vavae tenegag ŋaŋ wa, 2Te tenegag ape marana ta vunana si tama o tuara maranaga me ge o wosolagia ape natuna, 3ti vatraŋ o rowrowovag ŋaŋ anana si a log irasei me suware veta ti ape wosolagia, wa neira gate maros we van ma. 4Wa ni me vatraŋ mulaŋ o rowrowovag ŋaŋ anana we sea, ti vet wa, Tur gaganag mun ragai me suwarera ma ti wasi, Na me ge taurmate paso o sinaga, me vus veta o kau ŋaŋ wa o nat kau we wuras ŋaŋ, me taurmate veta o savasava; van ma ape wosolagia. 5Wa neira me nom mataketake gese apena, wa me totoa, isei ilo utagina isei ape non o wolwol: 6wa ragai qale toga me takul o rowrowovag ŋaŋ anana, we ge lalamasagira, wa we ge mateira. 7Pa i maranaga me roŋotag apena, pa ti lologagara, ti suware at o vavtig vagalo ŋaŋ, ti ge mate sarapun ira vus nawono ŋaŋ ilone, ti siŋ tagea nalaqlaqevanuara. 8Paso nan ni qara vava munra tanun ŋaŋ anana wa, Me ge taurmate veta ape wosolagia, pa iragai me suware ma ti gate sar apena. 9O manigiu apena tur mulemule ilo waŋare matesala ŋaŋ, tur suware ma ape wosolagia irasei kam qe ilo suarira. 10Wa ira tanun ŋaŋ anana ilone me mule ilo matesala ŋaŋ, me vile tuwale irasei nol me ilo suarira ti, ira tatas tara wia mulaŋ, wa o tano wosolagia me uravagira we pute siwo. 11Pa i maranaga me mule pata sin ilo ragai we vug tuwale, wa ni me ilo o tuara tanun gate saru o siopa wosolagia. 12Naŋ ni me vava munia wa, Pulsala, ko me kalo pata ma ga savai, pa ko gate saru o siopa wosolagia? Wa ni me toga roroŋo. 13Naŋ i maranaga qara vava mun ra gagapalag wa, Tur rot goro naraŋona wa napanena, savragia ilo siliga avarea; o areare aia wa o garagara ŋiŋiŋ. 14Ape we qoqo neira me suwarera ma ti, wa o tapai neira me ilo rakatira.

15Paso nan ira Pharise me vanreag, we sikesike saratuwale neira te tiag laia gasei nia alo ni we vavava. 16Wa neira we suware at ira tiŋqoro anara suria, tara tuan ragai nanra Herod, we vava wa, Vatogo, kamam we gilala si iniko we nun, wa ko we vatvatogo mun o liŋe nun ape matesalan God, wa ko gate nom mava apensei, ape ko gate iloilo o nago tanun. 17Wa o manigiu o ine ka vava lue mun kamam, Ko we nonom o sava? We tira ape lea si a vile sargag o som mun i Kaisar, si tagai? 18Naŋ i Jesus me ilo vaglala nor o nurnurug ti vet wa, Apesava kamiu we gale ilo nau, ira sokoi goro kamiu? 19Tur gaganag ma o som me vet si a vile sargag. Naŋ neira we la vano munia o pene. 20Naŋ ti vet muneira wa, Anonsei o totogale iloke wa o raverave apena? 21Naŋ neira wa, Anon i Kaisar. Naŋ ti vet muneira wa, Alova, pa tur la kel mun i Kaisar o gene ŋaŋ anon i Kaisar, wa mun God o gene ŋaŋ anon God. 22Pa neira me roŋotag mamakei; wa me toavtagia, we vanreag.

23Wa alo qoŋ nane ilone ira Saduke me mule ma suria, neira we leasag si o tavaraka kel tagai, wa neira me varusia wa, 24Vatogo, i Moses me vava wa, Si sei qe mate, wa natuna ta tagai apena, i tasina te qara lav leas rasoana, te vawota o nanatui mun tasina. 25Wa amen kamam o retatasiu pul lavearua; wa o moai me lag veta ti pa me mate, wa gate matevtag o natui, wa ni me ukeg i rasoana mun i tasina. 26Wa o varuei tamaine mulaŋ, wa o vatoliu, gai neira lavearua. 27Wa ape kulara nol o tavine me mate vunvun. 28Pa ape me tamaine, alo tavaraka kel ni te rasoansei nan ra lavearua? ape neira nol me lagia ti. 29Pa i Jesus me valuira me vet wa, Kamiu we ava gese, ape kamiu gate gilala o raverave ŋaŋ, wa o mana non God; 30ape alo tavaraka kel gate laglag wa gate togatoga amairasei; nava we tama ra angel anan God vawo tuka. 31Nava, ape tavaraka kel nora mate, kamiu gate vasogo tiqa o vavae amon God me gaganag ti mun kamiu, me vet wa si, 32Inau God Abraham, wa God Isaak, wa God Jakob? God gate God nora mate, nava nora esuesu. 33Naŋ o sul me roŋotag, we mamakei lava ape non o vatvatogo.

34Naŋ ira Pharise me roŋotag si i Jesus me vava naenae ira Saduke, neira me vug tuwale. 35Wa i tuwale nan neira, ineia o vatogo, me meregalea, ti vet wa, 36Vatogo, avea o vavae vatraŋ we liwoa alo lea? 37Naŋ i Jesus munia wa, Ka tape i Lord God iniko mun natoqama nol, wa mun naatama nol, wa mun nom o nonomia nol. 38Iloke o vavae vatraŋ we liwoa wa o moai. 39Wa o varuei we tamaine mulaŋ, Ka tape i tagvanuama tama iniko kel. 40O lea nol wa ira prophet we tako gese ape vavae vatraŋ iloke nirua.

41Naŋ ira Pharise qale vug tuwale, wa i Jesus me varus neira wa, 42Kam we nonom o sava apen i Christ? Natunsei nane ineia? Naŋ neira me vet munia wa, Natun David nane. 43Naŋ ti vet mun neira wa, Si ta tamaine, i David we logia si Lord mun o Vui gasei nia? we vava si,

44I Lord me vet mun i Lord inau wa,

Ka pute ape matuak,

Nau gai map siwo nom o tavalalea ŋaŋ mun tano ververesag ape raŋoma?

45Pa si i David we logia si Lord, ineia natuna gaseinia? 46Wa isei gate valui goroa lai mun o vavae tuwale; wa nan o qoŋ nane ilone i tagai qalo isei we nom mot si a varusia mulaŋ ape sava tea.

Currently Selected:

Mathew 22: MOTA

Highlight

Copy