Mathew 21

1Naŋ alo neira we rivtag Jerusalem wa me niŋa veta a Bethphage, ape tauwe Olivet, i Jesus qara vatraŋ at o tiŋqoro anana pulrua; 2ti vet mun rara wa, Ura mule ilo vutre vanua we sar taniniga kamurua, wa kamurua te ilo gaplot momurua o ass me ligo vataqav, wa o nati ass amaia; ura mamasug wa ura lav irara ma. 3Pa si isei qe vava o sava mun kamurua, kamurua te vava wa si, I Lord we maros ran rara; wa ni te vatraŋ gaplot irarua ma. 4Pa me ge iloke o manigiu si ilone me vava ti mun i prophet te tira ran apena, ti vet wa,

5Tur gaganag lue mun o nat Sion o tavine wa si,

Ilo ma, nom o maranaga we mule ma suriko,

Pa ineia we aperig, wa ni we pute avawo ass,

Wa avawo nati ass.

6Wa o tiŋqoro anana me mule at, me ge ran tama i Jesus me vareg rarua ti; 7wa me vanogag ma o ass wa o nati ass, wa me map nor o siopa vawo kulanrara, wa ni qara pute avunanrara. 8Wa we qoqo aneane amaira me lilŋag nor o siopa goro o matesala, wa tuaniu me tara late o wotiu ŋaŋ, wa we vear goro o matesala nia. 9Naŋ o sul we mule amoa wa we tataga me awoawo gegese we vet wa, Hosana mun i natun David: Tur wievavae i gene we mule ma alo sasan Lord, Hosana vawo tuka. 10Naŋ ni me niŋa a Jerusalem, o laqlaqe vanua nol me matikotiko, ti vet wa, Pa isei iloke? 11Naŋ o sul wa, I gene iloke i Jesus o prophet ta Nasaret a Galilea.

12Naŋ i Jesus me mule pata ilo vatine we roŋo non God, wa me vure lue iragai nol we wolwol alo vatine we roŋo, wa me wil tapeliŋ o tano som nora valvalete, wa o tano putepute ŋaŋ nora wolwol qona; 13ti vet mun neira wa, Me rave ti wa si, Te log naimak o ima tataro, nava kamiu me ge mun liara vuspalu. 14Naŋ ira matapei tara qages ŋaŋ me mule ma suria alo vatine we roŋo, wa ni me vaesura. 15Pa ra oloolo liwoa ŋaŋ tara vatvatogo me ilo mora o vasasa ŋaŋ ni me ge ti, wa o reremera ŋaŋ we awoawo alo vatine we roŋo wa si, Hosana mun i natun David, wa nalolora me anuanu apena; 16wa me varusia wa, Gai, ko we roŋotag iragai we vava o sava? Naŋ i Jesus muneira wa, We, kamiu gate vasogo tiqa si, Nan navalara nanatmera wa o tete ŋaŋ ape sus ko me ge taurmate moma o liŋe varean? 17Naŋ ni me toavtagira, me sere lue nan o laqlaqe vanua i Bethania, me matmatur aia.

18Wa tavala maran ni we kel mulaŋ ilo laqlaqe vanua, ti maliŋsala. 19Naŋ ni me ilo o fig tuwale pan matesala, we solil apena, pa gate ilo suar o sava avunana, nava vires naunaui gese. Naŋ ti vet munia wa, Nipea o woai a rowolue naniko aŋaisa ti tuai ti tuai. Naŋ o fig me kor gaplot. 20Pa ira tiŋqoro me ilo mora we mamakei, we vava wa si, O fig me kor gaplot gasavai? 21Naŋ i Jesus me valuira we vet muneira wa, We nun na we vava mun kamiu wa, Si o nomtup amen kamiu wa kam qe tete nomvaruarua, kamiu tete ge vires iloke me ge ti ape fig tamaike, nava si kam qe vet mun o tauwe iloke wa si, Ka sau raka, wa te savragiko ilo lama, te lai tamaine. 22Wa o savasava ŋaŋ kam ta paere mun o tataro, wa we nomtup, kam te taur nomiu nol.

23Naŋ ni me mule pata ilo vatine we roŋo, wa alo ni we vatvatogo, ira oloolo liwoa tara tamtamaragai tamaira sul me mule ma suria, we vet wa, Mun o mana ta avea ko we ge o ike ŋaŋ? wa isei me la muniko o mana iloke? 24Naŋ i Jesus me valuira, we vava wa, Pa inau mulaŋ na te varus mok kamiu o vavae tuwale; pa si kam qe gaganag mun nau apena, wa inau mulaŋ na te vava lue mun kamiu si mun o mana ta avea nau we ge mok o ike ŋaŋ. 25O vasugroŋo mon John ma avea? ma vunana, si ma nan o tanun? Naŋ neira me varvava vires neira, we vet wa, Si nina qe vava si, Ma vunana; pa ni te vet munina wa, Si ta tamaine, apesa kamiu gate nomtupua? 26Pa si nina qe vava si, Ma nan o tanun; pa nina we gogolo o sul; ape neira nol we nonom apen i John tama si o prophet. 27Naŋ neira me valui goro i Jesus, we vet si, Kamam gate gilala. Naŋ neia mulaŋ muneira wa, Wa inau mulaŋ na tete gaganag mun kamiu si mun o mana ta avea na we gege o ike ŋaŋ. 28Pa kamiu we nonom o sava? Ranatun sei pulrua apena; wa ni me mule sur o moai, ti vet wa, Natuk, mule mawmawui qarig alo nok o tuqe vine. 29Naŋ ni me valuia ti vet wa, Na gate maros; panava galewora ni me nomleas, me mule. 30Wa ni me mule sur i tuara ti vet tamaine munia. Naŋ neia wa, Inau ran gai; pa ni gate mule. 31Isei nan rara me ge qalo o maros non tamana? Naŋ neira wa, O moai. Naŋ i Jesus me vet muneira wa, We nun, na we vava mun kamiu wa si, Ira rowoagtalsom wa o retavine pakapaka we mule pata moai kamiu ilo marana non God. 32O manigiu i John me mule ma sur kamiu alo matesale lea taniniga, wa kamiu gate nomtupua, nava ira rowoagtalsom wa o retavine pakapaka me nomtupua: pa ikamiu me ilo vaglala, paso nan kamiu gate nom leas momiu si a nomtupua.

33Tur roŋotag o vavae tenegag we sea: O tuara tanun o tagiima me riv mona o tuqe vine, wa me tiŋgoro mun o geara, wa me nur o tano varavara alolona, wa me taur o saloima, wa me maukeg galtag mun o tuan mawmawuitag, wa me mule te vanua. 34Pa o tau wo vine me rasu ma, ni qara vatraŋ ira rowrowovag anana sur ra mawmawuitag sin lav o woai ŋaŋ tapena. 35Naŋ ira mawmawuitag me taur ira rowrowovag anana, me towos i tuwale, wa me ge mate i tuara, wa me patuŋ i tuara. 36Naŋ ni me vatraŋ at mulaŋ o rowrowovag we sea ŋaŋ we qoqo nan ragai tamoa; pa neira me ge mulaŋ muneira tamaine. 37Naŋ o paspasoanai ni me vatraŋ at sur neira i natuna, me vava wa, Naapera te maragai i natuk. 38Nava ira mawmawuitag me ilo i natuna, wa we vava vires neira wa, Iloke i lelesiu; sowo, nina ge mateia, wa nina taur navanuana usurag mun vanuanina. 39Naŋ neira me tauria, me virgag luea nan o tuqe vine, me ge mateia. 40Pa aŋaisa alo si o tag tuqei ta kel ma, ni te ge o sava mun ra mawmawuitag ilone? 41Neira we vet munia wa, Ni te ge tatas tagea qet iragai nane we tatas; wa te maukeg o tuqe vine mun o mawmawuitag ŋaŋ we sea, wa neira te la kel mantag munia o woai ŋaŋ tapena alo tur tau.

42Naŋ i Jesus ti vet muneira wa, Pa kamiu gate vasogo ilo tiqa alo raverave ŋaŋ si,

O vat ira tautaur ima me gevtag ti,

Me ge ilone mun qat vat tape sigrai:

Amon i Lord iloke,

Wa o vasasa alo matanina?

43Manigiu o ine nau we vava mun ikamiu wa, Si te lareag aŋaisa nan kamiu o marana non God, wa te le leas mun o sul te uwa o woai ŋaŋ tapena. 44Wa isei ta masu avune vat iloke te niŋag latlatea, nava ta masu avunansei, te qisaŋ sasavurvur ineia. 45Naŋ ira oloolo liwoa tara Pharise ŋaŋ me roŋotag mon o vavae tenegag ŋaŋ, wa we lolomaran si ni we vava ape neira; 46wa we maros we takulia, pa we gogolo o sul, ape neira me nonom ape neia si o prophet.

Currently Selected:

Mathew 21: MOTA

Highlight

Copy