Mathew 20

1Ape o marana tavunana we tama o tanun o tagiima me va lue alo gap matava sin qil o tanun mawmawuitag ma ilo non o tuqe vine. 2Pa me vatavata veta mun ra mawmawuitag ape pene tuwale ape qoŋ tuwale, ni qara vatraŋ neira ilo non o tuqe vine. 3Naŋ ni me va lue tama alo masao qoŋ vatoliu, me ilo tuan tanun we sea we tira mamasa alo sare wolwol. 4Naŋ ti vava mun neira wa, Tur van, ikamiu mulaŋ, ilo tuqe vine, wa o sava ta sasarita apena, nau te le mun kamiu. 5Naŋ neira me va at. Wa tama alo masao qoŋ laveteai, wa alo masao qoŋ lavevatiu mulaŋ, ni me va lue me ge tamaike. 6Naŋ tama alo masao qoŋ saŋavul tuwale o numei tuwale ni me va lue, me ilo suar o tuan tanun we sea we tira mamasa, we vava mun neira wa, Ape sava kamiu we tira mamasa qoŋ tamaike? 7Naŋ neira munia wa, Ape tanun gate qil tiqa kamam. Naŋ ti vet mun neira wa, Pa kamiu mulaŋ tur van sage ilo tuqei, wa o sava ta sasarita apena kam te taur momiu. 8Naŋ me ravrav, o tag tuqei ti vet mun i ilogoro anana wa, Suware ma ira mawmawuitag, wa ka la o som rusarusai mun neira; ka qeteg amaira sei a tagir, gai niŋa apen ragai amoa. 9Naŋ ragai me mule ma me qilira ti tama alo masao qoŋ saŋavul tuwale o numei tuwale, wa we taur valval neira o pene tuwatuwale. 10Pa ragai tamoa me van ma, we nonom si neira te taur sal, nava neira me taur mora mulaŋ tuwatuwale o pene. 11Naŋ neira me taur, qara wutoto goro o tagiima, we vava wa, 12Ragai a tagir me mawmawui o masao qoŋ gap tuwale, wa ko me ge neira si a sasarita amen kamam me veverag o maran we mava wa o titkeliga. 13Nava ni me valui mun i tuwale nan neira, ti vet wa, Pulsala, na gate ge variava muniko, ko gate vatavata ti mun nau ape pene? 14Ka taur moma napulama, ka vareag; nau we maros we le mun o tanun iloke a tagir tama muniko ran. 15Sa si gate tira ape lea si na ge o sava nau we maros mun pulak? si namatama we tatas ape nau we wia? 16Tamaine gina o tuan rasei a tagir pa te moai aŋaisa; wa o tuan rasei me moai ti te tagir legonia; ape te suware neira we qoqo, nava te ilo raka o tapai.

17Naŋ i Jesus me mule kalo i Jerusalem, wa we lav asau ma ira tiŋqoro saŋavul tuwale o numei nirua, ti vava muneira a matesala wa, 18Ilo, nina we mule kalo i Jerusalem, wa te ukeg vano i Nat tanun munra oloolo liwoa tara vatvatogo; wa neira te veveg qaloa, 19wa te ukegia mun o sul ŋaŋ we sea si a porosagia, wa si a towosia, wa si a woso teterpania; wa alo qoŋ vatoliu te ge raka kelua.

20Paso nan, ravevenra nanatun i Sebede me mule ma suria, tara nanatuna, ti vatieqau goroa, ti paere o sava munia. 21Naŋ ni me varusia wa, Ko we maros o sava? Naŋ ti vet munia wa, Ka vet naliŋama si ranatuk iloke nirua a pute, i tuwale ape matuama, wa i tuara ape galaoma, alo nom o marana. 22Pa i Jesus ti vet wa, Kamtol gate gilala kamtol we paere o sava. Kamrua te ima lai alo lasa na te ima maksa rigrig ti? wa kamrua le la lai momrua o vasugroŋo we vasugroŋo nau nia? Naŋ rara wa si, We lai ran. 23Naŋ neia munrara wa, We nun gai kamrua te ima mak o lasa, wa kamra te la momrua o vasugroŋo we vasugroŋo inau nia; nava si a pute ape matuak wa ape galaok gate amok si na la at, nava munragai amon i Tamak me ge taurmate ti muneira. 24Naŋ ira saŋavul tuwale me roŋotag mora apena, wa nalolora qara anuanu apen rara o retasiu pulrua. 25Nava i Jesus me logira ma suria, ti vet wa, Kamiu we gilala momiu si ira maranaga amaira sul ŋaŋ we sea we riga gorora, wa rasei we liwoa amaira we mana gorora. 26Pa amen kamiu te pea tamaine; nava isei qe maros we liwoa amen kamiu, ni te gagapalag mun kamiu; 27wa isei qe maros we toga moai amen kamiu, ni te rowrowovag mun kamiu. 28Tama i Nat tanun gina gate mule ma si rasei a rowrowovag munia, nava sin rowovag mona munrasei, wa sin ukeg naesuna o tapetape goro tanun tar.

29Naŋ alo neira we rowolue nan o Jeriko, o sul liwoa we tatataga neia; 30wa ilo, o matapei pulrua we putepute a pan matesala, wa we roŋotag si i Jesus we mule talavivis, qara awoawo we vava wa, Ka magarosa ikara, Lord, natun David! 31Naŋ o sul me ŋorov goro rara, si rara a toga roroŋo; nava rara we awoawo raka sage nan amoa, we vava wa, Ka magarosa ikara, Lord, natun David! 32Naŋ i Jesus ti tira late, ti log irara ma, ti vet wa, Kamurua we maros si na ge o sava mun kamurua? 33Naŋ rara munia wa, Lord, si namatan karua ni lik. 34Pa i Jesus we lolo magarosa rara, we taŋo vano ape matarara; wa gaplot namatarara me iloilo kel, wa rara me tataga neia.

Currently Selected:

Mathew 20: MOTA

Highlight

Copy