Mathew 13

1Naŋ alo qoŋ ilone nane i Jesus me rowolue nan o ima, we pute siwo a pan qilo. 2Wa me viletuwale ma suria o sul tar, o manigiu si ni me vega kalo vawo aka, me pute; wa o sul nol we tiratira a pan qilo. 3Naŋ ni me vava vagaqoqo muneira alo vavae tenegag ŋaŋ, ti vet wa, Ilo, i gene we savsavur me sage sin savsavur o sivui; 4wa alo ni we savsavur, o tuan sivui me masu a pan matesala; wa o manu ŋaŋ me rowo ma me kur qet. 5Pa o tuaniu mulaŋ me masu avune warevat, o tano gate purat aia. Pa me totou gaplot sage, ape tano we roro tagai apena; 6wa o loa me rowo raka veta, pa me saqo, wa ape gariu tagai, me kor. 7Wa o tuaniu mulaŋ me masu ilo vatitne molmol ŋaŋ; wa o mol ŋaŋ me sug raka me gis goro. 8Wa o tuaniu me masu ilo matai tano; wa me uwa o woai, iloke melnol, iloke saŋavul laveatea, wa iloke saŋavul tol. 9Isei naqorona apena, ni roŋotag nia.

10Naŋ ira tiŋqoro me mule ma suria, we vava munia wa, Ape sava ko we vavava muneira mun o vavae tenegag ŋaŋ? 11Naŋ ni me valuira, ti vet wa, Ape me vasoal ma mun kamiu si a gilala o gene ŋaŋ we vagis tape marana tavunana, nava gate vasoal mun ragai. 12Ape valsei qe taur mona, te vasoal ma munia, wa te ge sin taur sal; nava isei qe tete taur mona, te lareag nania o gene ni me taur mona ti. 13O manigiu o ine nau we vava muneira mun o vavae tenegag ŋaŋ; ape neira we iloilo nava gate iloilo, wa we roŋroŋotag nava gate roŋroŋotag, wa gate lolomaran. 14Wa me ge tira mulaŋ alo ineira o ligoligog amon Isaia o prophet, wasi,

Kam te roŋotag mun o roŋotagiva, wa tete lolomaran;

Wa kam te ilo mun o ilova, wa tete ilo qalo.

15Ape toqara sul iloke me lologoro,

Wa neira we roŋotag we mava mun naqorora,

Wa neira me vataqav namatara;

Nan neira wa ilo vaglala mun namatara,

Wa we roŋotag mun naqorora,

Wa we lolomaran mun natoqara,

Nan neira wa vusiag kel,

Wa na te vaesura.

16Pa namatamiu we tur wievavae, ape neira we ilo; wa naqoromiu, ape neira we roŋotag. 17Pa we nun na we vava mun kamiu wasi, ira prophet wa ira taniniga we qoqo me maros we ilo o gene ŋaŋ kamiu we ilo, nava gate ilo, wa si a roŋotag o gene ŋaŋ kamiu we roŋotag, nava gate roŋotag.

18O manigiu o ike tur roŋotag o vavae tenegag apen i savsavur. 19Isei qe roŋotag o vavae tape marana wa gate lolomaran apena, i ganganor qara mule ma, wa ti wosag ilone me savur ti alo toqana: iloke ineia me savur ti a pan matesala. 20Pa ilone me savur ti avune warevat, ineia nan we roŋotag o vavae, wa te taur gaplot mun o lakalaka: 21pa o gariu tagai alo ineia kel, wa we toga galewora, pa alo ganawono qe wonot, si o koskos gap ape vavae, rigrig ni te tutuag. 22Wa ilone me savur ti alo molmol, ineia nan we roŋotag o vavae, pa o gene valeŋai ŋaŋ talo marama iloke, wa o galeva tape tar valeŋaleŋa, we gis goro o vavae, wa ti wegowego. 23Pa ilone me savur ti alo matai tano, ineia nan we roŋotag o vavae, wa we lolomaran apena; iloke we uwa ran nake, wa we ge raka tuaniu melnol, wa o tuaniu saŋavul laveatea, wa o tuaniu saŋavul tol.

24Naŋ ni we tuan o vavae tenegag we sea muneira, ti vet wa, Me tenegag ape marana ta vunana tama o tanun me savur o sivui we wia alo tuqena. 25Pa alo tanun ŋaŋ we matur, o tavalalea munia ti mule ma, ti savur o siv sisania alo vatitne korn, pa ti toa. 26Wa o ŋoliu me totou raka wa me uwa, pa o sisania mulaŋ qara ŋaŋa lue raka. 27Wa o rowrowovag ŋaŋ anan i tagiima me mule ma, we vava munia wa, Ko gate riv o sivui we wia alo tuqema, Lord, pa o sisania ma avea apena? 28Naŋ ineia wa, O tavalalea me ge tamaike, Naŋ ira rowrowovag we vava munia wa, Ko we maros si kamam a mule a gir ilone? 29Nava ti vet wa, Tagai wa, nan alo we gir o sisania, kamiu wa lue tuwale wun o korn. 30Tur ukegira neira poa tuwale galtag gai niŋa o gorogoro; wa alo qoŋ gorogoro nau te vava mura gorogoro wa, Tur gir amoa o sisania, wa rot tuwale o rotiu ape siŋ tagea, pa sogon o korn ilo nok o qea.

31Naŋ ni me tuan muneira o vavae tenegag we sea, ti vet wa, O marana tavunana we tama o siv mustard, o tanun me la me riv siwo alo tuqena; 32o gene qa mantagai nan o sivui ŋaŋ; nava alo me totou veta, ti poa sal o gene riv ŋaŋ talo tuqei, ti tangae, si o manu ŋaŋ talo maea a mule ma, a anig alo waŋwaŋarana.

33Naŋ ni me vava muneira o vavae tenegag we sea; O marana tavunana we tam o leven, o tavine me la, me vatŋorag alo wumeto flour nitol, gai lolog leven nia.

34Pa i Jesus me vava iloke ŋaŋ nol mun o vavae tenegag ŋaŋ mun o sul; wa si ta i tagai o vavae tenegag ni gate vava ilo mun neira; 35o manigiu sin tira ran ilone me vava ti mun i prophet me vet wa si,

Na te waka navalak mun o vavae tenegag ŋaŋ;

Na te luag o gene ŋaŋ me vatŋorag ti alo me map o sagere marama ma.

36Paso nan, ni me toavtag o sul, wa qara kalo pata ilele ima; naŋ ira tiŋqoro anana ŋaŋ me mule ma suria, we vava wa, Ka gaganag mun kamam o vavae tenegag ape sisania alo tuqei. 37Naŋ ni me vava wa, I gene me savur o sivui we wia i Nat tanun nane; 38wa o tuqei o marama nane; wa o sivui we wia ira nat marana nane; wa o sisania ira nat ganganor nane; 39wa o tavalalea me riv ineira ti i Satan nane; wa o gorogoro o ulus marama nane; wa ira gorogoro ira angel nane. 40Wa tama ineira we gir o sisania wa we siŋ mun o av, te ge tamaine alo paspasoane qoŋ. 41I Nat tanun te vatraŋ ira angel ŋaŋ anana at, wa ineira te gir savrag nan non o marana o gene ŋaŋ we ge tutuag, wa irasei we gagapalag vitag o lea; 42wa ineira te savragira ilo vasawu av: o areare aia wa o garagara ŋiŋiŋ. 43Alo qoŋ ilone ira taniniga te siŋa lue raka tama o loa alo marana non Tamara. Isei naqorona apena, ni roŋotag nia.

44Mulaŋ, o marana ta vunana we tama o som me vatŋorag ti alo tuqei, wa isei we ilo suar, ti vatŋorag pata mulaŋ, wa ti malakalaka apena, ti mule ti ŋarag reag pulan o savasava ŋaŋ, ti wol o tuqei ilone mun tuqena.

45Mulaŋ; o marana tavunana we tama isei wolwol we sikesike o wo vila we wia ŋaŋ. 46Wa ni me sike suar o wo vila tuwale o tur gene tun, ti mule ti ŋarag reag pulan o savasava ŋaŋ, ti wol ilone.

47Mulaŋ, o marana tavunana we tama o gape taqataqa me tul ilo lama, wa we kokos kalo o val sale iga ŋaŋ; 48wa me saro tul, neira we rave kalo salilina, we pute siwo, we soŋon tuwale o matai iga ŋaŋ ilo tapera ŋaŋ, wa we savrag o mala iga ŋaŋ. 49Te ge tamaine alo ulus marama. O angel ŋaŋ te rowolue ma, wa te aseg wora ira ganganor nan alo vatitnara taniniga, 50wa te savragira ilo vasawu av: o areare aia wa o garagara ŋiŋiŋ.

51Pa kamiu me roŋotag vaglala o vavae ŋaŋ iloke? Naŋ neira wa, Uwe, Lord. 52Naŋ ti vet wa, Manigiu o ine o val vatogo, me qeteg tiŋqoro veta ape marana tavunana, we tama o tanun o tagiima, we lala lue nan non o tano moegene o gene we qaraqa wa ilone ŋaŋ we tuai mulaŋ.

53Naŋ me tamaike, si i Jesus me vava paso o vavae tenegag ŋaŋ iloke, wa ni me levegao nan o vatine; 54wa ni me niŋa veta naturvanuana, ni me vatvatogora alo ima siwo tuwale tamaira; o manigiu si neira a mamakei aneane, we vava wa si, O lolomaran iloke we tavea amen i gene iloke, wa o vasasa ŋaŋ? 55Iloke gate natun i paspasau? gate loglog i ravevena si i Meri, wa ira tatasina i James wa i Joses wa i Simon wa i Juda? 56Wa ra tutuana neira gate toga nol amenina? Pa o savasava ŋaŋ iloke amaia ma avea? 57Wa neira me tutuag ape neia. Nava i Jesus me vava muneira wa, Gate nom mataketake o prophet, nava alo tur vanuana, wa alo imana ran. 58Wa ni gate ge o vasasa we qoqo aia, ape nor o nomtup tagai.

Currently Selected:

Mathew 13: MOTA

Highlight

Copy