Mathew 12

1Naŋ alo masaoi ilone i Jesus me mule sir tuqe korn alo qoŋ mapsag: wa ira tiŋqoro anana we maliŋsala; wa neira me qeteg tawo o wutui ŋaŋ, wa we gana. 2Pa ira Pharise me ilo we vet munia wa, Ilo, ira tiŋqoro anama we ge o gene gate tira ape lea si a ge alo qoŋ mapsag. 3Pa ni me vet mun neira wa, Kamiu gate vasogo tiqa o sava i David me ge ti, alo ni we maliŋsala tara ragai amaia? 4Ni me kalo pata qa ilo iman God, wa me gana o bread we mapmap lue, gate tira ape lea munia sin gana, si munragai amaia, nava munra oloolo magasera? 5Si kamiu gate vasogo ilo tea alo lea apen ra oloolo alo qoŋ mapsag alo ima we roŋo si we ge savsavawora o qoŋ mapsag, pa napugara tagai apena? 6Pa na we vava mun kamiu wa, isei apena iake we liwoa nan o ima we roŋo. 7Pa si kamiu me lolomaran veta o sava iloke wa, Na we maros o magarosa, wa o oloolo tagai, kamiu gate veveg qalo iragai napugara tagai. 8Ape i Nat tanun gina ineia i Lord goro o qoŋ mapsag.

9Wa ni me rowolue nan o vatine, wa we kalo pata ilo ima siwo tuwale tamaira. 10Wa ilo, o tanun aia o rurus me ge napanena. Wa neira me varusia we vet wa, Sa si we tira ape lea si a vaesu tea alo qoŋ mapsag? si neira a tila lai ineia apena. 11Pa ni me vet mun neira wa, Isei qa o tanun amen kamiu si pulan o sheep i tuwale, wa si ilone qe mas alo qaraŋa alo qoŋ mapsag, pa ni tete tak ulia, tete rave kaloa? 12Pa o tanun we mava tam o sava nan o sheep? O manigiu iloke we sar ape lea si a ge wia alo qoŋ mapsag. 13Naŋ ni qara vet mun o tanun wa, Ka sigag lue napanema; wa ni me sigag, wa me rip kel tama o tavaliu. 14Wa ira Pharise me rowolue wa me varvava tuwale goroa si a ge mate gasavai neia. 15Pa i Jesus me gilala apena ti vanreag nan o vatine, wa o sul we qoqo me tataga ineia; wa ni me vaesura nol, 16wa me gatogorora nan wa gaganag luea. 17Si ilone me vava ti mun Isaia o prophet te tira apena, ti vet wa,

18Ilo, o rowrowovag anak na me iloraka neia,

Nok o meratape nau we lolowia aneane neia:

Na we map nok o Vui avunana,

Wa ni te gaganag lue o lea veveg mura sul ŋaŋ we sea.

19Ni tete varleasag, wa tete awoawo;

Wa isei tete roŋotag ilo naliŋana alo matesala ŋaŋ.

20Ni tete ge late o togo me maworawora veta,

Wa tete pun mate o vin maŋ we asuasu,

Ni gai la lue o lea veveg alo lalakete,

21Wa o sul ŋaŋ we sea te nom nerei ape sasana.

22Naŋ neira me tak ma suria isei o vui we tatas we gege neia, o matapei wa o luto; wa ni me vaesua, wa o luto me vava wa me ilo. 23Wa o sul nol me mamakei lava, we vet wa, Pa gate natun David iloke? 24Pa ira Pharise me roŋotag apena, we vet wa, Iloke gate vasaug lue o vui we tatas, nava mun Beelsebub i moai goro o vui we tatas. 25Pa i Jesus me gilala nor o nonomia ŋaŋ ti vet mun neira wa si, Val marana ta vilewora, o tavaliu nan o tavaliu, te pupuel apena; wa val vanua si val ima ta vilewora tete tira lai. 26Wa si i Satan ta vasaug lue i Satan, ni me vilewora kelua; wa non o marana te tira gaseinia? 27Pa si na qe vasaug lue o vui we tatas ŋaŋ mun Beelsebub, ira nanatumiu qa we vasaug luera munsei? O manigiu o ine neira te veveg kamiu. 28Pa si na qe vasaug lue o vui we tatas ŋaŋ mun o Vui non God, o marana non God gai qara rasu ma ivunamiu. 29Si isei te kalo pata lai gasavai ilo iman i vavakae wa te saŋrag pulan o savasava ŋaŋ, si ni qe tete rot moai i vavakae ilone? wa paso nan, ni qara saŋrag naimana.

30Isei qe tete amen nau neia o tavaliu mun nau, wa isei qe tete vile tuwale amenau ni we savrag salsaleŋa. 31O manigiu o ike na we vava mun kamiu wa, O val ganganor wa o val vavae nawono te nomvitag mun o tanun, nava o vava nawono ape Vui tete nomvitag ilo. 32Wa isei qe log o vavae apen i Nat tanun, te nomvitag munia; pa isei qe vava o sava goro o Vui we roŋo, tete nomvitag munia, si alo marama iloke si alo marama te aŋaisa. 33Pa tur ge o tangae ni wia wa nawoana ni wia, si tur ge o tangae ni tatas wa nawoana ni tatas: ape te gilala o tangae ape woana. 34Ira nanat mata, kamiu ira gene we tatas, te vava lai o gene we wia ŋaŋ gasavai? ape o valai we gaganag lue gese o gene ŋaŋ o toqai me uravag ti nia. 35O matai tanun we sese lue o matai gene ŋaŋ nan o tano matai gene ŋaŋ talo toqana; wa o mala tanun we sese lue o mala gene ŋaŋ nan non o tano mala gene. 36Pa na we vava mun kamiu wa, Ape vavae gap ŋaŋ o tanun ŋaŋ we vava apena, neira te gaganag kel ape pug apena alo qoŋ veveg. 37Ape te veveg taniniga ko mun nom o vavae ŋaŋ, wa te veveg qalo ko mun nom o vavae ŋaŋ.

38Naŋ alo ine o tuaniu nan ra vatvatogo tara Pharise me valui goroa, we vet wa, Vatogo, kamam we maros we ilo o vaglala amaiko. 39Naŋ ni me valui gorora, we vet muneira wa, O taraŋiu kiskislag wa o manpakapaka we sikesike o vaglala; pa tete la lue o vaglala munia, nava o vaglala gese non i Jona i prophet. 40Ape tama i Jona me toga alo toqe kio o maran nitol, wa o qoŋ nitol, tamaine gina i Nat tanun te toga alo lolo tano o maran nitol wa o qoŋ nitol. 41Ira ta Nineve te tavaraka tuwale alo qoŋ veveg amen o taraŋiu iloke, wa te veveg qaloa; ape neira me nomleas ape toretore mon Jona; wa, ilo ma, isei apena iake we liwoa nan i Jona. 42O tavine maranaga ta i sage te tavaraka tuwale alo qoŋ veveg amen o taraŋiu iloke, wa te veveg qaloa; ape ni me mule ma nan o ulus marama sin roŋotag o lolomaran amon i Solomon; wa ilo ma, isei apena iake we liwoa nan i Solomon.

43O vui gagavu ta rowolue nan o tanun, ti seneut ilo rea ŋaŋ, we sike mona o tano mapsag, nava gate sike suar. 44Naŋ ti vet wa, Na te vusiag kel ilo imak na me rowolue ma ti nan; wa ti mule niŋa, ti ilo suar we toga mamasa, me werasa, wa me valug mantag. 45Paso nan ti van at, ti lav tuania o vui mulaŋ lavearua we tatas nania; wa neira we mule pata we toga vawlig alolona; wa o gene ŋaŋ a tagir amen o tanun ilone we tatas nan o moai. Pa te tamaine mulaŋ amen o taraŋiu iloke we ganganor.

46Naŋ alo ni te qale vavava mun o sul, ilo, i ravevena, tara tatasina, we tiratira avarea, we sike si a vava munia. 47Naŋ isei me vava munia wa si, Ilo, i ravevema tara tatasima we tira avarea, we sike si a vava muniko. 48Pa ni me valui goro, me vet mun i gene me gaganag ti munia wa, Pa isei i ravevek? wa irasei ira tatasik? 49Naŋ ti sigag lue napanena munra tiŋqoro anana, ti vet wa, Ilo ma, i ravevek nake tara tatasik; 50ape isei qe ge o gene ŋaŋ i Tamak tavunana we maros, ineia i tasik, wa i tutuak, wa i ravevek.

Currently Selected:

Mathew 12: MOTA

Highlight

Copy