Luk 20

1Naŋ me ge tamaike, alo tuara qoŋ ni we vatogo o sul alo tinesara we roŋo, wa ti gaganag o lea we wia, ira moe oloolo tar o vatogo amaira tamaragai ŋaŋ me peteŋia. 2Wa neira me vava, we vet munia wa, Ka gaganag mun kamam; o mana ta avea ko we ge tamaike nia, wa isei me le o mana iloke muniko? 3Naŋ ni me valui gorora, ti vet wa, Inau mulaŋ na te varus mok kamiu o vavae tuwale, pa tur gaganag mun nau: 4O vasugroŋo mon John, we ta vunana ma, si ma nan o tanun? 5Naŋ neira me varvava vires neira, we vet wa, Nina ta vava si, Ta vunana ma: ni te vet wa, Ape sava kamiu gate nomtupua? 6Pa si nana ta vava si, Ma nan o tanun; o sul nol te patuŋ nina, ape neira me nom mot ran si i John o prophet. 7Naŋ neira me valui goroa si neira gate gilala si ma avea. 8Naŋ i Jesus me vet muneira wa, Pa inau mulaŋ na tete gaganag mun kamiu si mun o mana ta avea na we ge tamaike nia.

9Naŋ ni me vava raka mun o sul o vava tenegag iloke: O tanun me riv o tuqe vine, me maukeg galtag munra mawmawuitag, qara mule te vanua o qoŋ we qoqo. 10Wa alo tur tau, ni me vatraŋ o tuara rowrowovag anana munra mawmawuitag si neira a la o tuan woai talo tuqei munia; panava ira mawmawuitag me towosia, me suware savrag mamasa kelua. 11Wa ni me vatraŋ tuan o tuara rowrowovag, pa neira me towosia, me araresagia, me suware savrag mamasa kelua. 12Wa ni me vatraŋ tuan mulaŋ o tanun vatoliu, pa neira me virgag luea me mataqaga. 13Naŋ o tag tuqe vine me vava wa, O sava na te ge? Na vatraŋ natuk o meratape, neira te apemaragai wun ineia. 14Panava ira mawmawuitag me iloa, me varsikesike vires neira wa, Iloke i lelesiu, sowo, nina ge mateia, si o vanua usurag iloke te pulanina. 15Wa neira me virgag luea nan o tuqei, me ge mateia. Pa o sava o tag tuqe vine te ge mun neira apena? 16Ni te mule ma te ge mate sarapun ira mawmawuitag iloke, te maukeg o tuqe vine mun rasei we sea. Naŋ neira me roŋotag, we vava wa, Nipea ran nane. 17Nava ni me sagaragira, ti vet wa Pa o sava iloke me rave veta ti wa,

O vat ira tautaur ima me ge vitag ti,

Me ge ilone mun qat vat tape sigrai?

18Val sei qe mas avune vat iloke te niŋag latelatea; pa qe mas avunansei, te qisaŋ sasavurvur ineia.

19Naŋ alo masao qoŋ nane ilone ira moe oloolo tara vatogo me sike si a takulua; pa neira me gogolo o sul; ape neira me ilo vaglala si ni me vava o vava tenegag iloke ape neira. 20Naŋ neira me matagisgis goroa, wa me vatraŋ irasei te pute goro palua, we galegale si we taniniga, si a la raka non o vavae, a maniriŋia ilo tano veveg wa o mana non o governor. 21Naŋ neira me varusia we vet wa, Vatogo, kamam we gilala si ko we vava wa we vatogo taniniga, wa ko gate lav vires o nago tanun, wa we vatvatogo nun ape matesalan God. 22We tira ape lea si nina vile sargag o som mun i Kaisar, si tagai? 23Pa ni me ilo vaglala nor o nurnurug, ti vet muneira wa, Ape sava kamiu we meregale nau? 24Gaganag ma o pene. Anonsei o totogale iloke wa o raverave apena? Naŋ neira we vet si, Anon i Kaisar. 25Naŋ neia wa, O manigiu ilone tur le kel mun i Kaisar o gene ŋaŋ non i Kaisar, wa mun God o gene ŋaŋ non God. 26Pa neira gate la raka qalo lai o vavae ilone alo nago sul, wa neira me mamakei ape non o valvalui, wa me naenae roroŋo.

27Naŋ o tuan Saduke ŋaŋ me mule ma suria, neira we leasag si o tavaraka kel tagai, me varusia we vava wa, 28Vatogo, i Moses me rave mun nina wa, Si tasinsei me lag veta, qe mate, wa si natuna tagai, si tasina te lav rasoana, te vawota o nanatui mun tasina. 29Pa o retatasiu lavearua tamaine; wa o moai me lag o vavine, me mate, wa natuna tagai; 30wa o varuei me tataga goro o vavine, me mate, natuna tagai apena; 31wa o vatoliu me lavia, wa iragai lavearua tamaine me mate, wa gate matevtag tea o natmera. 32Wa o paspasoanai o vavine me mate vunvun. 33Pa alo tavaraka kel ni te rasoansei apena? ape neira lavearua me lagia ti. 34Naŋ i Jesus we vet muneira wa, Ira nat marama iloke we laglag, wa we togatoga amairasei; 35panava irasei te vevegira si we sar si a niŋa suar o marama iloneia, wa o tavaraka nanra mate, gate laglag gate togatoga amairasei; 36ape ineira tete mate lai mulaŋ tea aŋaisa; ape we sasarita amaira angel, wa ineira ra natun God, ape neira ra nat tavaraka kel. 37Pa ape we ge raka kel ira mate, i Moses me gaganag lue mona apena ape Tangae qarqaruga, we log i Lord si God Abraham, wa God Isaak, wa God Jakob. 38Naŋ neia gate God nora mate, nava nora esuesu, ape tanun nol we esu suria. 39Wa o tuara vatogo me valui goroa we vava wa, Vatogo, ko me vava mantag. 40Ape neira gate nom mot si a varus iloa tea mulaŋ.

41Naŋ ni me varusira wa, Neira we log tama avea i Christ si natun David? 42Apen i David we vava mona alo raverave psalm wa,

I Lord me vava mun i Lord inau wa,

Ka pute ape matuak,

43Nau gai map siwo nom o tavalalea ŋaŋ mun tano ververesag ape raŋoma.

44Pa i David we logia tamaine si i Lord; pa neia i natuna gaseinia? 45Naŋ alo qorora sul nol ni me vet mun ra tiŋqoro anana wa, 46Tur ilogoro kel kamiu nan ra vatogo, we maros we mulemule kelkel alo siopa we tole, wa we toron we wievavae neira alo sare wolwol ŋaŋ, wa o moe tano putepute alo ima siwo tuwale ŋaŋ, wa o moe tanoi ŋaŋ alo lakalaka ŋaŋ; 47iragai nane we gana sopun naimara ro naro, wa we tataro maul o manig gale; pa ragai ŋaŋ iloke te taur mora raka sage o lea veveg apena.

Currently Selected:

Luk 20: MOTA

Highlight

Copy