Luk 21

1Wa ni me ate laŋ ti ilo ira meresom we saksakarag nor o sogov ilo tano som. 2Wa ni me ilo o tuara naro, o masara, we sakarag aia o qatut som nirua. 3Naŋ ti vet wa, We nun na we vava mun kamiu wa, O naro iloke o masara me sakarag sal neira nol; 4ape neira nol me sakarag tuan o gene sogov ŋaŋ nan napulara we ura sal, nava neia nan napulana gate sasarita amaia me sakarag mona o gene nol ni te esuesu apena.

5Wa alo tuaniu we vava ape vatine we roŋo si me sagilo mun o matai vat wa mun o gene sogov ŋaŋ, ni me vet wa, 6Ape savasava iloke kam we ilo, o qoŋ te roworowo ma ti tete tivtag iake o vat avune vat wa gate sese savrag nan. 7Naŋ neira me varusia wa, Vatogo, aŋaisa o gene ŋaŋ iloke te wesu ma? wa o sava o vaglala ape ike ŋaŋ we susurut ma? 8Naŋ neia we vava wa, Tur nonom apena nan wa gale lera kamiu; ape we qoqo te mule ma alo sasak, we vava wa, Inau ma; wa, O qoŋ me susurut veta ma; turpea tataga nakulara. 9Pa aŋaisa kamiu te roŋotag o roro vagalo, wa o rowovatur, turpea sus malukluk apena, ape tete ava lai pa te tamaine amoa; pa o paspasoanai tete noga gaplot.

10Naŋ ni me vava mun neira wa, O sul te tavaraka goro o sul, wa o marana goro o marana; 11wa o rir liwoa te riŋov, wa alo tuan vanua o maro, wa o gopae solorag, wa o gene kikina ŋaŋ, wa o vaglala ŋaŋ we poa alo tuka. 12Wa moai nan o ine nol neira te takul kamiu, te koskos gap kamiu, we ukeukeg kamiu ilo ima siwo tuwale ŋaŋ, wa alo ima rotrot ŋaŋ, we raverave ikamiu ape nagora maranaga tara governor o manigiu nasasak. 13Pa iloke te rowolue mun vaglala mun kamiu. 14Tur map siwo iloke alo toqamiu, si kamiu nipea we nonom vasarig amoa si te valuira tama avea. 15Ape na te la mun kamiu o valai wa o lolomaran, nomiu o tavalalea nol tete tira goro lai, wa tete leasag. 16Nava ira tamamiu mulaŋ, wa ira tasimiu, wa ira sogomiu, wa ira pulsalamiu te ukeg kalo kamiu; wa o tuanimiu neira te ge mate. 17Wa kamiu ira gene ŋustup mun o tanun nol o manigiu nasasak. 18Pa o tape ului tuwale tape qatumiu tete tagea lai. 19Wa alo nomiu o roŋo malumuaga kamiu te taur raka momiu naatamiu.

20Nava aŋaisa kam te ilo o vavtig vagalo ŋaŋ we niniŋ wawaliog o Jerusalem, alo ine nane kam te gilala si me noga veta munia sin wou. 21Alo ilone irasei a Judea neira toa i tauwe ŋaŋ, wa irasei alo lolona neira sere lue nan, wa irasei a tag taia nipea mulemule ilolona. 22Ape qoŋ raparapa ilone, si o savasava me rave veta ti te tira ran. 23Pa tur magarosa iraro gene we tiana tara raro gene o natmera amaira ape sus alo qoŋ ŋaŋ ilone; ape ganawono liwoa te wonot o vanua, wa o lologagara mun o sul iloke. 24Wa neira te matevag o nago gasal wa te gavagira ilo valvanua ŋaŋ; wa o sul ŋaŋ we sea te varaluqeag o Jerusalem, naqoŋira sul ŋaŋ we sea gai wesu vunvun. 25Wa o vaglala apena ape loa, wa ape vula, wa ape vitu ŋaŋ, wa avune tano o ganawono amaira sul ŋaŋ, we vasiliag neira ape lama wa o rep we rororo; 26nalolor o tanun te suwa kel ape gogolo, wa ape we toga nerei o savasava te mule goro ma o marama; ape gene we mana ŋaŋ tavunana te magologolo. 27Naŋ alo ilone neira te qara ilo mora i Nat tanun we mulevag ma o mana wa o leŋas liwoa vawo maligo. 28Wa aŋaisa o gene ŋaŋ ilone te wesu raka, tur totoepe raka, tur ate laŋ, ape nomiu o ulsag we susurut ma.

29Wa ni me vava tenegag mun neira wa; Tur ilo o fig wa o tangae ŋaŋ we tar; 30neira te awisiga nake, wa kamiu we ilo wa we gilala matapumiu si ilokenake o magoto arivtag veta. 31Tamaine mulaŋ gina kam te ilo o savasava ŋaŋ iloke te wesu ma, wa kam te gilala si o marana non God arivtag veta. 32We nun na we vava mun kamiu wa, O taraŋiu iloke tete sagesaru lai o ike ŋaŋ nol gai wesu. 33O tuka wa o tano te sagesaru, panava nok o vavae ŋaŋ tete sagesaru lai.

34Tur nonom apena, nan natoqamiu wa mava ape ganagana vasusumag, ape woana wa ape gene valeŋai ŋaŋ tape togara iloke, wa nan o qoŋ ilone wa rowo vivis mot avunamiu tam o tiatiag. 35Ape te wesu tamaine mun o sul nol we togatoga alo nago marama nol. 36Pa tur mamata goro vagae, tur tiatias, si kamiu a sasarita si a rowo lue wasawasa nan o gene ŋaŋ iloke te wesu ma, wa a tira goro nanagon i Nat tanun.

37Wa valval maran ti vatvatogo alo tinesara we roŋo, wa alo qoŋ ŋaŋ ni qara roworowolue sin matur a tauwe we log si Olivet. 38Wa o sul nol me nunuuwa ma suria si a tiŋqoroa alo tinesara we roŋo.

Currently Selected:

Luk 21: MOTA

Highlight

Copy